Македонската фудбалска репрезентација до 21 година предводена од Драган Канатларовски ги започна подготовките за септемвриските квалификациски натпревари.

Во овие мечеви се очекува да настапат и Стефан Чолаковски и Метју Божиновски, кои доаѓаат од Австралија, од тимовите на Мелбурн Сити, односно Мелбурн Виктори. Едниот напаѓач со 21 година, додека вториот дефанзивец со 20 години.

Тренинзите ќе се одработуваат во Скопје на терените на ФФМ, а потоа следува деби натпреварот за Канатларовски на клупата во Ле Ман каде гостуваме на Франција.

По враќањето од Франција, нашиот стручен тим и играчите се селат во Охрид каде ќе се одигра втората средба во квалификациите за ЕП. Гостува селекцијата на Србија на „Билјанини извори“ на 7. септември, а свечено во употреба ќе биде ставена и новата трибина која ја изгради фудбалската федерација.

Реал Мадрид му даде ултиматум на ПСЖ да одговори на понудата за Килијан Мбапе, затоа што сметаат дека евентуален одговор од кога се собира француската репрезентација само би го закомплицирал трансферот.

Последната понуда на Реал Мадрид изнесува 180 милиони евра и 10 милиони сигурни бонуси, но откако истата пристигна, спортскиот директор на ПСЖ Леонардо, кажа дека баш ништо не се променило.

Многумина сметаат дека Мбапе одлучил дека сака да замине во Реал Мадрид поради пристигнувањето на Меси, затоа што не бил воодушевен од играњето со него. Сепак, Мбапе на својот Инстаграм профил објави фотографија која ги загрижи фановите на Реал Мадрид.

На неа се гледа насмеаниот Мбапе со Меси, што покрена коментари од фановите на Реал Мадрид, кои се плашат дека двете ѕвезди почнале да се согласуваат, па Французинот поради тоа би можел да се откаже од трансферот.

Со победите на Тотенхем над Ватфорд и поразот на Арсенал против Манчестер Сити, се промени историјата во Премиерлигата.

Имено, по првпат во постоењето на ова натпреварување, Тотенхем викендот го заврши на првото место, а Арсенал како последнопласиран. Целосен контраст владее помеѓу двата тима на стартот на сезоната. Тотенхем има три победи, меѓу кои и онаа над Манчестер Сити, а Арсенал има три порази, меѓу кои е и дебаклот од споменатиот Сити.

И покрај тоа што потрошија најмногу од сите европски клубови ова лето, барем засега, Арсенал не поседува конкретен стил на игра, ниту засилувањата во видот на Бен Вајт, Арон Ремсдејл, Мартин Едегард, Алберт Самби Локонга и Нуно Тавареш покажаа зошто се доведени. Се уште е рано да се прогнозира, но делува дека оваа сезона ќе биде една од оние во кои навивачите на Арсенал ќе немаат многу причини за радост.

Од друга страна, Тотенхем ги одбиваше сите налети на Манчестер Сити за Хари Кеј и како што стојат работите, капитенот ќе остане во лондонскиот клуб, иако имаше желба да замине.

Манчестер јунајтед ќе мора да донесе одлука за тоа кој ќе ја носи легендарната „седумка“ на „Олд Трафорд“ оваа сезона.

Бројот седум е заштитен знак на Роналдо, но тој број има посебна тежина и на „Театарот на соништата“ затоа што во историјата го носеа голем број легенди како Ерик Кантона, Џорџ Бест и Дејвид Беакм.

Интересно е тоа што Премиерлигата на својот официјален сајт ја додели „седумката“ на двајцата фудбалери. На профилот на играчите на Кавани и Роналдо и двајцата го имаат истиот број, но Јунајтед уште не реши официјално чиј ќе биде бројот.

Постои можност да си замине и Ентони Марсијал, па неговиот број да го добие Кавани, а бројот седум да му припадна на Роналдо, но засега ништо не е познато.

33-годишниот бразилски играч од средниот ред на Арсенал, Вилијан, е се поблиску до приклучување кон Коринтијанс.

Според информациите, бразилскиот клуб веќе се договорил со Вилијан за соработка до 2023 година, а двете страни во моментов ги договараат за конечните детали од договорот.

Претходно беше објавено дека Арсенал е подготвен да го пушти играчот бесплатно за да заштеди на неговата плата.

Селекторот на македонската репрезентација, Благоја Милевски со свое видување во пресрет на собриот на репрезентацијата за квалификациските натпревари во септември за пласман на Светското првенство.

“Започнуваме нов репрезентативен предизвик и се радувам на собирот и деновите кои ни следуваат. Подготовките се кратки и мора да ги искористиме максимално. Ја знаеме нашата цел, знаеме со што располагаме и одиме да го потврдиме квалитетот. Некои промени се неизбежни, но не стравувам. Напротив, јас стојам зад репрезентацијата и фудбалерите и имам мотив и енергија да работиме квалитетно, максимално професионални и да бидеме конкурентни. Јас сум селектор и притисокот е врз мене. Фудбалерите мора да продолжат да веруваат во себе и во својот квалитет. Нашата заедничка цел е борба до крај во тековните квалификации, создавање група во која тимот, а не индивидуалци ќе биде најбитен и крајно да направиме се за да бидеме конкурентни за настап на следното Европско првенство“.

Ефектот наречен Кристијано Роналдо му донесе голем бенефит на Манчестер Јунајтед уште по првиот ден на потврдата на трансферот. По официјалната потврда од клубот дека Португалецот се враќа во дресот на тимот од „Олд Трафорд“, вредноста на клупските акции се зголемила за 8%.

Статистиката вели дека и официјалните профили на клубот на социјалните мрежи добиле милион следачи плус откако е објавена веста за доаѓањето на Роналдо.

Томас Тухел по натпреварот со Ливерпул објави дека играчот од средниот ред Н’Голо Канте се соочува со повреда и дека истата се провлекува веќе подолго време.

„Канте има повреда. Тој пропушти дел од натпреварот со Арсенал поради болки во глуждот и благо воспаление. Во принцип, нема ништо сериозно таму, бидејќи Канте успеа да се врати на тренинг. Со Ливерпул во една од епизодите во борбата за топката, мислам дека тој повторно го искриви глуждот и се чувствува исто како и пред натпреварот со Арсенал. Поради ова, тој ја загуби брзината на движење и моравме да направиме замена“, вели Тухел.

Екипата на ЖФК Љуботен се засили со Бразилката Јосане Де Фреитас Азаведо или позната како „Лулу“.

Бразилката повеќе од еден месец беше во клубот, а сега и ќе потпише договор.

„Јосеане Де Фреитас Азеведо Лулу е нов член на нашиот тим.Популарната Лулу како што е позната во Бразил речиси еден месец е дел од нашиот колектив по што може да констатираме дека ЖФК Љуботен го доби едно од најквалитететните интернационални засилувања во домашниот шампионат ако не и најдоброто. 33 годишната искусна и прекалена Лулу во својата кариера настапуваше за повеќе Бразилски прволигаши исто така има настапувано и во шампионатот на Израел со што гарантира дека ЖФК Љуботен во новата сезона ќе има гранитна одбрана. Патот до успехот мора да се изоди со квалитет и работа, а Лулу со својот професионализам го донесе во екипата“, објавија од клубот.

Кристијано Роналдо го напушти Јувентус, па сега во финишот од преодниот рок „старата дама“ ќе се обиде да доведе негова замена.

Се споменуваа неколку имиња, Моис Кин е фаворитот, но наводно тој е „план Б“ ако не се постигне договор со ПСЖ за Мауро Икарди. Според последните информации, Јувентус испратил официјална понуда за Икарди и сега се чека одговорот од Париз.

Икарди изгледа како одлична опција за Јувентус затоа што Серија А му е добро познато од времето во дресот на Интер. И за Икарди ваквиот трансфер би можел да биде позитивна работа бидејќи во ПСЖ јасно е дека ќе нема премногу простор за игра.

Во овој момент напаѓачот се опоравува од повредата која ја заработи во натпреварот од Лига 1 против Брест (4:2) и се очекува до крајот на септември да биде спремен за настап. Во ПСЖ Икарди постигна 35 гола и забележа 10 асистенции на 66 натпревари.