Селекторот на фудбалската репрезентација на Курасао, легендарниот Холанѓанец Гус Хидинк нема да може да го води тимот во квалификациите за СП 2022.
Поранешниот селектор на „лалињата“ се опоравува од коронавирусот кој го поминал со многу потешка клиничка слика. 74-годишниот Хидинк побарал од директорот на академијата на Барселона, Патрик Клајверт, да го замени на претстојните квалификациски средби на чело на Курасао.
Клајверт ја прифатил неговата покана и побарал од претседателот на Барса, Жоан Лапорта, да го ослободи за привремена работа во репрезентацијата на Курасао. Лапорта му дозволил, по што Клајверт ќе биде на клупата на оваа селекција на 5 јуни против британските Девствени острови и на 8 јуни на средбата со Гватемала.

Македонскиот судиски интернационалец, Александар Ставрев, ќе биде главен судија на финалето во Купот на Македонија. Финалето на националниот куп е на програмата во среда на Националната Арена во Скопје. Познато е дека во битката за пехарот се среќаваат екипите на Академија Пандев и Силекс, а мечот стартува во 19:00 часот. На Ставрев ќе му помагаат Дејан Костадинов и Гоце Петрески, додека четврти ќе биде Марјан Маркоски, кој со овој меч веројатно се простува од својата долгогодишна успешна судиска кариера.

Милан по киксот против Каљари го остави Јувентус во игра, но и понатаму сам одлучува за својата судбина. Ако победат против Аталанта во Бергамо, неважен ќе биде дуелот на Јувентус со Болоња. Дали Пирло ќе преживее доколку го освои Купот и стигне до четвртото место. Ако го земе само трофејот и биде петти, секако не. Во случај да се пласира во Лигата на шампионите, би можел да остане. Јувентус наводно преговараше со Алегри, но сега се појави Реал кој во Италијанецот гледа замена за Зидан. Самиот Зидан е желба на Ањели, но Јувентус нема многу финансии, плус веројатно Французинот сака одмор. Како име сега се појави Џенаро Гатузо. Тој е прва алтернатива, заминува од Наполи, се зборува за Фиорентина. Наполи, доколку ја победи Верона, ќе се пласира во Лигата на шампионите идната сезона. Се верува дека Гатузо, кој е одличен мотиватор и човек кој заговара дисциплина, ќе успее да извлече максимум од Јувентус. Тој, во таков случај, би го наследил својот најдобар пријател од светот на фудбалот, Пирло. Тие двајца беа и цимери, а „Моцарт“ во биографијата изнесе и неколку смешни детали од нивното другарување и заедничките настапи во Милан и репрезентацијата.

Италијанскиот стручњак Масимилијано Алегри се сретна со управата на Реал Мадрид минатата недела и сака да го преземе местото тренер во мадридскиот клуб, пишува новинарот Фабрицио Романо. Зидан скоро сигурно го напушта клубот на крајот од сезонава, а се чека само уште официјалната потврда. Романо наведува дека Алегри е во контакт со Реал веќе неколку месеци, го сакаат и некои италијански клубови, пред сите веројатно Јувентус, но за Алегри приоритет е заминувањето во Мадрид. Сепак, се уште не е сигурно дека во Мадрид ќе се одлучат за него. Се разгледуваат и други опции, а една од нив е и клупската легенда Раул, кој во моментот го води вториот тим. За Раул тоа би бил прв тренерски ангажман, додека Алегри е слободен од летото 2019. година кога го напушти Јувентус после освоената петта титула по ред.

Барселона го совлада Челзи со 4-0 во финалето од женската Лига на шампиони, и со тоа каталонскиот клуб го освои женскиот турнир за првпат во својата историја. Фудбалерките на Барселона беа незапирливи и постигнаа извонреден резултат со што станаа првиот клуб кој ги има освоено и машкото и женското издание на ЛШ на УЕФА. „Мислам дека не треба да бараме никаква грешка во тимот на Челзи. Овој тим на Барселона е можеби најдобриот клупски тим во женскиот фудбал во моментов. Нивната победа е заслужена”, изјави Тим Стилман, аналитичар на Гардијан.

Шпанска Примера продолжува наредниот викенд, во кој ќе биде и завршена оваа сезона. Се игра последното коло кога конечно ќе го дознаеме и освојувачот на титулата шампион на Шпанија, но дојде до поместување и последното коло нема да се игра во недела, туку во сабота на 22. мај. Причината е Виљареал, екипата која ќе игра во финалето од Лига Европа, па шпанскиот сојуз одлучи да го помести последното коло како „жолтата подморница“ би имала ден повеќе за подготвување за финалето. Виљареал во последното коло гостува кај Реал Мадрид, кој е конкурент за титулата.

Оле Гунар Солскјер зборуваше за времето за враќање на дефанзивецот Хари Мегваер.
„Се надевам дека ќе имаме што е можно побрзо добра вест. Ќе чекаме до последен момент за настапот на Хари во финалето во Лига Европа. Тој ја покажа својата важност на Манчестер Јунајтед. Сите одамна знаевме што тој значи за нашиот тим, но можеби некои го забележаа тоа само кога тој се повреди. Секако чувствував дека Мегваер и претходно беше многу важен играч на Манчестер Јунајтед. Хари е наш лидер. Тој е капетан. Тој скоро секогаш игра на највисоко ниво, така што во моментов неговото отсуство е голем проблем за мене, но се надевам дека ќе се опорави до финалето на Лига Европа. Ќе му дадам колку што му треба време. Ќе почекам додека тој ми каже да или не“, изјави Солскјер за „Скај Спорт“.
Хари Мегваер не беше во можност да го заврши мечот од 35. коло во Премиер лигата со Астон Вила (3-1) поради повреда на скочниот зглоб.