Марселино Гарсија Торал ја објави својата одлука да го заврши престојот на кормилото на шпанскиот прволигаш Атлетик Билбао. Тој и онака го завршува договорот со баскијците на 30 јуни, па како што најави на прес-конференција, нема намера да ја продолжи соработката.
Марселино беше на чело на Атлетик од јануари 2021 година и му помогна на тимот да го освои Суперкупот на Шпанија.
Фудбалскиот шампион на Србија, Црвена Звезда, го продолжи договорот со тренерот Дејан Станковиќ до 2025 година.
Иако имаше доста информации дека 43-годишниот Станковиќ, на крајот од сезоната ќе го напушти клубот од Белград и ќе прифати понуда за тренерска работа во Италија, тој сепак се одлучи да остане на клупата на „црвено-белите“ и во наредните три години.
Откако ја освои шампионската титула за оваа сезона, Станковиќ ќе има шанса за двојна круна, бидејќи следува финалето во Купот на Србија, каде Звезда за противник го има вечниот ривал Партизан.
Играчот од средниот ред на Арсенал, Мохамед Елнени, го продолжи договорот за уште една сезона.
29-годишниот фудбалер пристигна во Северен Лондон во 2016-та од тимот на Базел. За шест сезони одигра 147 натпревари со ефект од пет голови и 10 асистенции.
„Го сакам клубот и го чувствувам како дел од семејството. Сакам да продолжам да играм и многу сум возбуден за иднината“, – изјави Елнени за клупската веб-страница.
Ракометарот Филип Миркуловски на крајот од сезонава ќе добие нова улога во својот клуб Вецлар. Имено тој ќе биде асистент на главниот тренер на екипата, со што и официјално ќе започне со својата тренерска кариера.
„Среќен сум што ќе започнам со тренерската работа во Вецлар. Му благодарам на клубот за дадената шанса. Со нетрпение го очекувам стартот на новата сезона и соработката со стручниот штаб и играчите“, изјави Миркуловски.
Еден од играчите на Барселона кој треба да биде на продажба – Мемфис Депај покажа дека не планира да го менува клубот. Медиумите се убедени дека со добра понуда холандскиот напаѓач би можел да биде продаден, бидејќи од една страна на Каталонците им требаат средства, од друга не успеа да блесне минатата сезона.
Денес, сепак, Депај на својот Твитер профил го напиша следново:
„Мојата прва сезона не беше онаква каква што замислував. Мора да продолжиме да работиме и да станеме посилни за да ги постигнеме нашите цели во следната сезона, Само Барса“.
Овој фудбалер ја заврши сезоната со 13 гола и две асистенции во 38 натпревари во дресот на Барселона во сите натпреварувања.
Фудбалерот на Челзи, Кристијан Пулишиќ, во наредните недели ќе се сретне со менаџерот на лондончани, Томас Тухел.
23-годишниот игрча забележа 22 настапи во Премиер лигата во кои постигна 6 гола и 2 асистенции. Тренерот, на крајот на сезоната го пофали Американецот.
„Кристијан Пулишиќ беше во иста ситуација како Каи Хаверц. Тие заслужуваат да бидат наградени бидејќи работат напорно и тоа се гледа на теренот“, изјави германскиот тренер.
Кубанецот Куни Моралес, кој настапува на позицијата десен бек, го продолжи договорот со ракометниот клуб Вардар 1961, и ќе остане во тимот и наредната сезона.
Моралес со своите одлични игри во црвено-црниот дрес како во Лигата на шампионите така и во домашното првенство, ги задоволи критериумите на раководството на клубот од Скопје кое се одлучи да го задржи во тимот уште една година.
Менаџерот на Ливерпул, Јирген Клоп, е избран за менаџер на годината во Премиерлигата за сезоната 2021/2022, објави официјалниот сајт на лигата.
Германскиот стратег по вторпат во кариерата ја освои оваа награда. Клоп за првпат беше прогласен за менаџер на сезоната во 2020 година.
Ливерпул ја заврши Премиерлигата на втората позиција со 92 бода. Во исто време, „црвените“ ги освоија двата национални купа – англискиот Лига куп и ФА Купот.
Полицијата нема да покрене обвинение против менаџерот на Кристал Палас, Патрик Виеира за инцидентот на Гудисон Парк по натпреварот со Евертон.
Приврзаниците на „карамелите“ бурно ја изразија својата радост по крајот на мечот. Тогаш камерите уловија како еден од навивачите му приоѓа на Французинот и прави непристоен гест кон неговото лице.
Виеира тогаш го фати за рака а потоа го удри со нога а навивачот падна на земја.
Денес на 25. мај, во организација на компаниите Евротип, Голд Слот и Голд Фелициа од Битола, беше успешно спроведена шеста по ред хуманитарна акција на која и се приклучија и компаниите ЈК Травел и Сн Финансии.
Акцијата „Дарувај крв, спаси живот“, беше успешно одржана во деловните простории на овие три компании. Покрај редовните крводарители, на хуманитарната акција имаше и граѓани кои доброволно се приклучија. На акцијата беа собрани 30 крвни единици, кои се директно дистрибуирани до одделението за трансфузиологија при Клиничкиот центар Битола.
Со оглед на тоа дека ова беше шеста по ред крводарителска акција, со гордост можеме да истакнеме дека уште од првата хуманитарна акција па досега имаме собрани вкупно 180 крвни единици со најдрагоцената течност.
Упатуваме голема благодарност до сите што учествуваа во оваа хуманитарна акција што значи живот.
Во иднина ќе продолжиме со организирање на вакви акции и ги покануваме сите компании кои сакаат да учествуват нека ни се приклучат зошто дарување на крв спасува живот.
