feature

Ибрахимовиќ испрати посебна честитка до Донарума за европската титула

Златан Ибрахимовиќ го пропушти Европското првенство поради повреда, а неговата Шведска го заврши настапот на турнирот во осминафиналето со пораз од Украина. Напаѓачот на Милан по завршувањето на ЕУРО се огласи на Инстаграм, каде испрати честитка до Италија, а посебно до голманот на италијанската репрезентација и поранешен соиграч, Џанлуиџи Донарума.

„Не е лошо да се игра во Серија А, мојот втор дом. Честитки Италија.“ – порача Ибрахимовиќ, а потоа се осврна на Донарума, кој како фудбалер порасна во Милан, а од наредната сезона ќе игра за Париз Сен Жермен.

„Година дена со мене и сфати. Нема на што.“ – напиша Ибра.

Тоа беше пораката на Швеѓанецот со фотографија на Донарума како го држи трофејот во раце.

Англиските навивачи со петиција да се повтори финалето!

Англиските навивачи покренаа петиции со кои бараат да се повтори финалето од Европското првенство помеѓу Англија и Италија, а како причина за своите барања го наведуваат според нив лошо досудениот момент во кој Киелини со влечење го запре Букајо Сака.

Во прашање е ситуацијата од 96. минута од натпреварот во која Сака беше во контранапад покрај десната аут-линија. Киелини, во моментот кога Сака го претрча, со двете раце го повлече од зад грб и англискиот фудбалер се сруши на земја.

Италијанскиот стопер за тој старт доби жолт картон, но помеѓу англиските навивачи владее мислење дека беше „преблаго“ казнет и требаше да биде исклучен. Таквите навивачи бараат повторување на натпреварот.

Покренати се поголем број на петиции, а според наводите на англиските медиуми, одзивот не е баш сјаен.

Борусија ја одреди цената за Халанд

Томас Тухел сака сериозно да го засили тимот на европскиот шампион и побара од управата на Челзи ова лето да му го донесе Ерлинг Халанд од Борусија Дортмунд, пишува Мирор.

Германски Билд реагираше на оваа вест со објаснување дека нема да има ништо од тој трансфер годинава.

Халанд има договорна клаузула според која може да замине за 75 милиони евра, но само во летото 2022. година. За следната сезона, Борусија сериозно смета на него и бара дури 175 милиони за предвремена разделба со Норвешкиот напаѓач.

Затоа, трансферот ова лето не е реален, но доколку се реализира, тој ќе биде втор по големина на сите времиња. Рекордер е сепак Нејмар, кој од Барселона премина во ПСЖ за 222 милиони евра.

Бајиќ: Да ја подмладиме репрезентацијата и да се вратиме на големи натпреварувања

Новиот селектор Драган Бајиќ официјално ја презеде македонската сениорска репрезентација, како наследник на Александар Тодоров.

Претходните денови тој тренираше со неколку потенцијални репрезентативци кои треба да бидат потпора на поискусните, но оние кои го носеа товарот претходните години, започнаа неделава.

На првиот тренинг, Бајиќ објасни што очекува од македонската репрезентација во следниот период.

„Се надевам дека ќе можеме да ги повториме резултатите од некоја не толку далечна иднина. Се што правевме од почетокот на моето преземање е со таа цел и јас од него не планирам да се откажам.

Сакам репрезентацијата да се подмлади, да направиме некој план и пат за во иднина за да успееме да се вратиме на големите натпреварувања. Од моето назначување, се обидов да ги следам сите кандидати за националниот тим, разговарав со сите нив и избрав некои момци на кои сега можам да сметам.

Ќе бидат тука 16 кошаркари кои ќе ги користиме во тренажниот процес и сите ќе конкурираат за репрезентацијата. Просечната возраст изнесува околу 24 години и мислам дека тоа треба да биде патот за иднината“- рече Бајиќ пред првиот собир на сениорите во малата сала на СЦ „Јане Сандански“ во Скопје.

Колку заработи Италија со освојувањето на ЕУРО?

Според пишувањата на италијанските медиуми, Италијанскиот фудбалски сојуз заработи 28,5 милиони евра откако Италија го освои Европското фудбалско првенство, а играчите добија премија од по 250 илјади евра.

Калчомеркато пишува дека во случај на пораз, секој играч би добил по 200 илјади евра, 150 илјади доколку беа елиминирани во полуфиналето, а 80 илјади во случај на елиминација во четвртфиналето.

Од сите Европски првенства досега, Италија заработила околу 100 милиони евра, повеќе од било која друга репрезентација во историјата на фудбалот.

Манчини: Доминиравме и заслуживме да се радуваме среде Лондон

Роберто Манчини го предводеше својот тим до втората европска титула во историјата на Италија. Неговата селекција го доби финалето на Евро 2020 против Англија на „Вембли“ на пенали.

Италијанците примија гол на стартот на натпреварот, но тренерот верува дека после тоа неговиот тим доминираше на натпреварот. Низ солзи во очите, тој рече дека сега секој во неговата татковина може да слави.

„Момците добро се снајдоа. Примивме ран гол и тоа ни ја отежна работата, но од тој момент доминиравме. Моите играчи се фантастични, не знам што друго можам да кажам. Ова беше важен успех за сите луѓе во нашата земја“, рече Манчини.

Ова беше 34-ти последователен натпревар без пораз за Италија под водство на овој селектор, а последен пат беа поразени од Португалија во 2018 година.

„Среќен сум што играме добро и победуваме. Верувам дека сите слават токму сега. Среќни сме и само тоа е важно. Се чинеше неверојатно дури и да се размислува за тоа, но момчињата беа неверојатни. Немам зборови, тие се одличен тим. Не беше лесен натпревар, всушност беше доста тежок, но сепак доминиравме. Потребна ви е и малку среќа со пеналите. Затоа малку ми е жал за Англија. Нашиот тим порасна многу, но сепак можеме да напредуваме. Среќен сум за сите Италијанци, немам зборови“, заврши Манчини.

НБА лигата го менува логото за јубилејната 75-та сезона

Најсилната кошаркарска лига на светот на својата официјална веб-страница го објави новото лого во чест на јубилејното издание.

Сезоната 2021/2022 ќе биде 75-та за НБА. Новото лого ќе биде поставено на сите страници, производи, арени и на Интернет.

Во финалето на НБА оваа сезона играат Милвоки бакс и Феникс санс. Сонцата водат во серијата со резултат 2-1.

Шпанецот Педри прогласен за најдобар млад фудбалер на Европското првенство

Mладиот фудбаелр на Барселона и човек кој истрча најмногу во полуфиналето помеѓу Италија и Шпанија, Педри е избран за најдобар млад фудбалер.

Педри собра најмногу гласови во изборот на специјалната комисија на УЕФА составена од легендите: Фабио Капело, Козмин Контра, Паки Бонер, Естебан Камбиасо, Корин Диакре, Жан-Мишел Домерк, Штефан Фројнд, Душан, Фицл, Франс Хок, Аитор Каранка, Роби Кин, Жинес Менендез, Дејвид Мојс, Вили Ротенштајнер, Миску Питалаинен и Питер Рудбек.

Оваа награда се избираше помеѓу фудбалери родени 1998 година и помлади. По Европското првенство Педри доби неколку слободни денови, па ќе се приклучи на Шпанија за турнирот на Летните Олимписки Игри во Токио.

Кејн: Најболен е поразот по пеналите, ќе го паметите цел живот

Хари Кејн беше крајно разочаран од поразот во финалето на Европското првенство. Италија ја доби битката за трофејот по изведувањето на пеналите на „Вембли“.

„Немаше што повеќе да се даде. Момчињата немаа што повеќе да дадат. Губењето на пенали е најнепријатното чувство на светот. Не беше наша вечер, но тоа беше фантастичен турнир и мора да сме со кренати глави. Секако, боли сега. Ќе боли некое време, но ние сме на добар пат, градиме добар тим и се надевам дека ќе продолжиме“, рече Хари Кејн.

„Игравме против многу добар тим. Започнавме совршено. Веројатно се повлековме премногу наназад во одредени моменти. Тие многу ја држеа топката, но не создадоа многу шанси. Израмнија по прекин, а ние имавме некои шанси во продолжението, а кога ќе дојдат пеналите, тоа е веќе друга работа“, додаде Кејн.

Меси играл повреден во финалето на Копа Америка

Аргентинскиот селектор Лионел Скалони му оддаде признание на Лионел Меси, обелоденувајќи дека капитенот настапил повреден во триумфот (1-0) над Бразил во финалето на Копа Америка во Рио де Женеиро.

„Ако знаете што се поднесуваше и начинот на кој го одигра Копа Америка ќе го сакате уште повеќе, им изјави Скалони на новинарите по победата на Аргентина на стадионот „Маракана“. Никогаш не можете да играте без фудбалер како него, дури и кога не е во најдобра форма или е повреден“, додаде Скалони, кој не изнесе повеќе детали за повредата на Меси во ноќта кога Аргентинците масовно излегоа на улиците за да ја прославата првата титула по пауза од 28 години.

Меси и неговиот поранешен соиграч во Барселона, Бразилецот Нејмар, ја поделија нагрaдата најдобар фудбалер на Јужноамериканското првенство.

«< 1336 1337 1338 1339 1340 >»