Миланските гиганти Милан и Интер се силно заинтересирани за младиот аргентински напаѓач, Матео Ретеги.

23-годишниот Ретеги е дете на Бока Јуниорс, но игра на позајмица во дресот на Тигре каде блеска веќе втора сезона.Ретеги важи за најталентираниот напаѓач во Аргентина и на 46 меча за Тигре постигна 37 гола, а од почетокот на новата сезона на 6 настапи постигна исто толку голови.

Ретеги има италијански корени и може да добие повик од Манчини, а скаутите на Милан и Интер го следат веќе подолго време.

„Росонерите“ веќе стапиле во контакт со неговиот агент и работат на трансферот, па сакаат да го донесат на лето на „Сан Сиро“.

Пари Сен Жермен ќе биде кандидат за купување на „Стад де Франс“ што го најави државата, тврди весникот „Л‘Екип“. Продажбата на спортскиот објект треба да се случи летото 2025 година. Бидејќи преговорите со градското собрание на Париз за можното купување на „Паркот на принцовите“, историскиот стадион на ПСЖ, се во ќорсокак, клубот се позиционира како можен купувач на „Стад де Франс“, кој има капацитет од 80.000 и неговата цена, според државата, изнесува 647 милиони евра.

Државата објави две понуди за „Стад де Фрас“ на 7 март, една за нова концесија, а барателите треба да поднесат документи до 27 април до 12:00 часот. Со стадионот, кој беше изграден за Светското првенство во 1998 година, досега стопанисуваа две гигантски компании – „Винчи“ и „Буиг“. ПСЖ сакаше да започне со реконструкција на „Паркот на принцовите“ и да го зголеми неговиот капацитет од 47.000 на 58.000 седишта, што би чинело 500 милиони евра.

Барселона е во тешка финансиска ситуација и на лето ќе мора да продава фудбалери за да може да прави трансфери.
Поради тоа Каталонците може да се насочат кон слободни агенти, а најголема желба на клубот е секако да ја врати легендата Меси на „Камп Ноу“.

„Ел Национал“ тврди дека Лапорта смислил план како да го добие Меси за минимална плата. Имено, Барселона ќе му даде симболична плата од 200.000 евра годишно, но кога Меси ќе ја заврши кариерата, тие ќе организираат проштален меч и сиот приход од тој меч, од ТВ правата за натпреварот, спонзорските договори, маркетингот, приходите од влезниците ќе отидат на сметката на Меси.

Прогнозата на каталонскиот медиум е дека Меси во таков случај би добил околу 100 милиони евра.
Меси во моментов преговара за нов договор со ПСЖ, но засега двете страни се далеку од такво нешто.

Медиумите во Шпанија наведуваат дека ветеранот, Лука Модриќ, веројатно нема да добие продолжување на договорот кој ќе му истече во текот на летото.

Наводно, првиот човек на „кралевите“, Флорентино Перез, има намера да направи голема реконструкција и да се ослободи од Хрватот кој наскоро ќе наполни 38 години.

Модриќ кој го облече дресот на Реал Мадрид во 2012 година, успеа да освои пет пехари во Лигата на фудбалските шампиони.

Тренерот на Реал Мадрид Карло Анчелоти, изјави дека најдобриот напаѓач во тимот Карим Бензема поради повреда на скочниот зглоб ќе го пропушти дуелот во Пример со Еспањол, меѓутоа би требало да биде подготвен за натпреварот со Ливерпул во ЛШ.

Бензема поради повреди, оваа сезона има пропуштено 12 натпревари на Реал Мадрид, но го пропушти и Мундијалот во Катар.

„Кралскиот клуб“ во среда го очекува реванш натпревар против Ливерпул во осминафиналето од Лигата на шампионите. Првиот дуел меѓу двете екипи се одигра на „Енфилд“ каде Реал славеше со 5:2.

Жоао Кансело поминува низ проблематичен период во неговата кариера. Кансело важи за еден од најдобрите десни бекови во светот, но веќе и се забележува дека има проблеми кога не успеа да се избори за место во стартниот тим, ниту кај Гвардиола во Сити, ниту кај Нагелсман во Баерн.

Добро му одеше на Кансело во Сити, меѓутоа во еден период Гвардиола почна да го остава на клупата за резерви. Сепак, изненадување беше неговата позајмица во зимскиот преоден рок. Португалецот си замина затоа што не сакаше да биде резерва. Дојде во Баерн кој има опција да го откупи за 70 милиони евра, но како што стојат работите тоа нема да се случи.

Сити од друга страна е одлучен да се ослободи, но Баерн не сака да го откупи, па вратата ја отвори Барселона. Лапорта е во добри односи со Жоао Мендеш кој го застапува Кансело и тоа би можело да биде клучно во реализацијата на трансферот. Барса има финансиски проблеми, но не е невозможно да го доведе прво на позајмица со право на откуп.

Сепак, каталонските медиуми денес пренесуваат дека за воопшто да дојде трансфер Барселона сака Кансело да помине одредени психолошки тестови. Во клубот сметаа дека во главата на Кансело има одредени „блокади“ кои не треба да ги има кај еден професионален фудбалер на тоа ниво.

Баерн Минхен нема да влезе во трката за потписот на Хари Кејн, иако медиумите тврдеа дека Баварците се најсериозен кандидат.

Ули Хенес во разговор со „Скај Спорт“ истакна дека баварскиот гигант не планира да плати 100 милиони евра за услугите на англискиот репрезентативец. Кејн сака да си замине следното лето од Тотенхем затоа што сака да игра за клуб каде ќе освојува титули.

„Јас можеби би сакал Баерн да плати 100 милиони евра за фудбалер, но тоа е невозможно. Кејн има речиси 30 години. Тотенхем лани за него одби 160 милиони евра од Манчестер Сити“, вели Хенес.

Во моментов како најсериозен кандидат за неговиот потпис се споменува Манчестер Јунајтед, кој наводно е спремен да ја плати споменатата сума.