По одличната етапа која ја имаше како менаџер во Премиер лигата, Роберто Мартинез веќе петта година е селектор на репрезентацијата која има најголем подем во изминатата деценија, селекцијата на Белгија која произведе навистина огромен број на фудбалски ѕвезди.
Една од нив секако е Ромелу Лукаку кој доживува втори ѕвездени моменти во италијанската Серија А.
„Лукаку во овој момент постигнува голови како што малкумина го прават тоа во фудбалска Европа. Креира голови и постигнува погодоци, креира и погодува, едноставно не престанува да го прави тоа. Тој пристигна во Милано во вистински момент, сега стана комплетен фудаблер и напаѓач, а тоа е така благодарение на Антонио Конте. Денеска не постои посилен и помоќен напаѓач од него“, рече белгискиот селектор.

Иако веќе една деценија е незаменлив, Рафаел Варан би можел да го напушти Реал Мадрид. Оваа вест ја пласираше мадридски „Ас“, кој истакнува дека зад трансферот се крие желбата на Варан за нови предизвици, но и тоа што е еден од најскапите играчи со чија продажба клубот би можел да направи реконструкција.
Проблем е тоа што Варан се уште не сака да го продолжи договорот кој му истекува во 2022. година, па претстојното лето е последниот момент за Реал да заработи од негова продажба.
Наводно, Реал бара 70 милиони евра и верува дека би можел да ги добие за услугите на дефанзивецот. Дел од овој план е и желбата на Реал да го доведе Жил Кунде, веројатно потенцијално најбараниот дефанзивец, чија клаузула во Севиља изнесува 90 милиони евра.
Не треба да се заборави и дека Реал има начелен договор со Давид Алаба, а и Серхио Рамос повторно е блиску до продолжување на договорот.
Со продажбата на Варан, Реал би можел да направи стоперски тандем Кунде-Рамос, додека Алаба ќе игра како стопер и лев бек.

Европската фудбалска унија (УЕФА) сериозно ја разгледува можноста, ЕУРО 2021, да биде организирано во една држава. Пандемијата на коронавирусот е сериозна закана за плановите на УЕФА, дека Европското првенство да биде организирано во 12 градови низ континентот.
Челниците на УЕФА биле блиску до одлуката, организацијата на ЕУРО 2020 да и биде доделена на Англија. Конечната одлука, УЕФА, треба да ја донесе во април.
Европското првенство ќе се одржи од 11 јуни до 11 јули.
Пласман на ЕП избори и репрезентацијата на Македонија. Македонските фудбалери, според првично објавениот распоред првите два натпревари треба да ги одиграат во Букурешт, против Австрија на 13.јуни и Украина, четири дена подоцна, а третиот натпревар во Амстердам, против Холандија, на 21 јуни.

Роман Абрамович е подготвен во наредниот летен трансфер период повторно да ја „наполни“ екипата со ѕвезди, па од следната сезона да ја нападне титулата во англиското првенство. Во тој поход, би му помогнал Ерлинг Халанд, за кој е подготвен да плати вистинско богатство.
Според пишувањата на англиските медиуми, 20-годишниот напаѓач на Борусија Дортмунд е означен како најголема желба на сопственикот на Челзи, а Абрамович нема намера да штети како би го довел во клубот. Свесен е за услугите на фудбалерот, кој за Дортмунд во 43 натпревари постигна исто толку погодоци и забележа 10 асистенции. Заинтересирани се и други великани како Реал Мадрид, Манчестер Јунајтед и Барселона, но русинот веќе потврди дека клубот е подготвен да се замеша во трката.

Милан по реванш натпреварот со Црвена Ѕвезда се враќа на домашните обврски, а тимот на Пиоли има тешко гостување во Рим кај Рома.
Евентуален пораз би бил трет во низа, што би овозможило Интер уште повеќе да се одлепи на врвот, а и самата Рома ќе се приближи до позицијата број два. Се очекува од почетокот да го видиме Ибрахимовиќ, но излегоа и вести за планот на Малдини за иднина.
Големо прашање е дали Ибрахимовиќ ќе остане во Милан и наредната сезона, негоата замена во видот на Манџукиќ исто така има добар број на години, па спортскиот директор брка нова „деветка“.
Италијанските медиуми пренесуваат дека Чиро Имобиле е мета број еден за подобрување на нападот. Капитенот на Лацио е фантастичен во Рим уште од своето доаѓање во 2016. година, ретко кога не е во трката за најдобар стрелец. Има 31 година, оваа сезона има 14 погодоци на 21 натпревар во Серија А.
Прашање е дали е подготвен за настап во поголем клуб, своевремено во Јувентус не доби прилика, додека не се снајде баш најдобро ниту во Дортмунд и Севиља.

Реал Мадрид ја следи ситуацијата во Париз, веќе подготвува и план „Б“ во Дортмунд, но нема да биде нималку лесно.
Килијан Мбапе и Ерлинг Халанд се одредени како главни мети во новата ера на „галактикос“, а во овој момент ниту еден трансфер не се чини како реален. Мбапе и понатаму се двоуми околу продолжувањето на договорот со Париз Сен Жермен, тековниот му истекува во 2022. година и не е исклучено да го одработи до крај и да си замине како слободен играч.
Халанд од летото 2022. година ќе има откупна клаузула од 75 милиони евра, па во Мадрид веруваат дека со потенцијално засилување на таа понуда ова лето ќе можат да ги искористат одличните односи со Дортмунд и да го „украдат“ норвежанецот.
Шпанските медиуми пишуваат дека во овој момент пореален е трансферот на Халанд, но далеку од тоа дека истиот ќе биде лесно остварен.

Хари Кејн има желба да го напушти Тотенхем, смета дека доволно чекаше, а и дека тимот со овие вложувања не може да се бори за важни трофеи и врвот на табелата. Капитенот на Англија ќе има можност да го освои Лига купот, но на тој пат стои Манчестер Сити. Тотенхем игра и во Лига Европа, но Кејн е заинтересиран за настап во Лигата на шампионите.
Дури и Тотенхем би сакал да го продаде капитенот како би ги покрил загубите, за нив пандемијата дојде во кошмарно време, кога очекуваа заработка од новиот стадион.
И местото на Мурињо не е гарантирано, се зборува за Нагелсман, но засега тоа останува само далечна можност.
Проблемот со Кејн е цената. Тој има договор уште три и пол сезони, а во време на криза никој нема да ја плати сумата која Тотенхем ја бара.
Се работи за 150 милиони фунти за капитенот кој даде 209 голови на 319 натпревари за клубот.

Ливерпул ќе мора да купува ова лето со цел да го прошири тимот и да ги избегне проблемите со кои се соочува оваа сезона. Вистинско чудо е како Клоп успева да „склопи“ екипа, а најнова повреда во низата е онаа на капитенот Џордан Хендерсон. Англичанецот ќе се врати дури во април и ќе пропушти некои важни натпревари, но и репрезентативните обврски.
Германски Билд јавува дека Клоп го има својот „пик“ на играчот за врска на Борусија Менхенгладбах, Флоријан Нојхаус.
23-годишниот фудбалер веќе втора сезона по ред прикажува одлични партии во дресот на клубот од Менхенгладбах, кој по оваа сезона ќе остане без Марко Розе. Нојхаус сезонава одигра 31 натпревар, со учинок од по шест голови и асистенции.
Се работи за квалитетен играч кој има договор до 2024. година, па јасно е дека Клоп ќе мора да го „одврзе“ ќесето за да го доведе на Енфилд.