Италијанските медиуми пренесуваат дека португалскиот играч за врска, Ренато Санчез е главна трансфер цел на Милан.
Ренато Санчез важеше за најголем европски талент, направи трансфер во Баерн каде не се снајде.
Португалецот ја „оживеа“ својата кариера во Лил, каде веќе втора сезона игра фантастично и го привлече вниманието на многу европски гиганти.
Тренерот на Милан, Пиоли бара квалитетно засилување за средниот ред бидејќи се поизвесно е дека „росонерите“ следната сезона ќе играат во Лигата на шампиони.

Англиската фудбалска Премиер лига објави дека постигна договор околу продажба на правата за телевизиски преноси од натпреварите со Скај спортс, БТ Спорт, Амазон Прајм Видео и Би-Би-Си Спорт, вреден околу 5,5 милијарди евра за период од 2022. до 2025. година.
Износот е речиси еднаков како и претходниот тригодишен договор, за 1,83 милијарди евра по сезона, и доаѓа како резултат на непосредна спогодба, а не преку јавно наддавање, за што Премиер лигата, поради пандемијата на коронавирус, доби дозвола од британската Влада.
Договорот вреден 5,5 милијарди евра ја остави Премиер лигата на водечкото место според заработката од телевизиските права, пред француската Прва лига, со приход од 1.172 милијарди евра (за периодот 2020 – 2024), германската Бундеслига (1.16 милијарди евра, 2017-2021), шпанската Ла Лига (1.14 милијарди евра 2019-2022) и италијанската Серија А со заработка од 973 милиони евра по сезона за периодот од 2019-2021 година.

Многу се пишува овој период за тоа дали македонската фудбалска икона Горан Пандев ќе игра и наредната сезона во редовите на Џенова. Пандев зад себе има фантастична сезона во која обезбеди опстанок со Џенова и со Македонија се пласираше на Европското првенство. Поради ваквата сезона, но и добриот старт на квалификаците за СП во кој имавме и победа против Германија се најавува дека Пандев ќе одигра уште сезона. Самиот тој истакна дека се уште ништо не се знае. „Пензија? Сега уживам во изборениот опстанок со Џенова, па потоа следи Европското првенство. Идејата како што знаете од претходно ми е да ставам крај по Европското, но ништо не се знае“, изјави Пандев за италијанскиот „Скај Спорт“.

Веста од пред два дена дека Златан Ибрахимовиќ ќе ги пропушти последните три дуели од сезоната дојде во најлош момент за Милан, кога води голема борба за пласман во Лигата на шампионите наредната сезона.
Милан минатиот викенд го „растури“ Јувентус на гостински терен со 0:3, а во 66. минута Швеѓанецот поради повреда го напушти теренот. Се чини дека повредата на коленото е уште потешка отколку што првично се мислеше.
Сега, Ибрахимовиќ има две варијанти за опоравување. Првата е да доаѓа на терапии, а втората да оди на операција. Во случај да се одлучи на операција, Ибрахимовиќ би го пропуштил Европското првенство, но веројатно би бил подготвен за почетокот на следната сезона.
Во случај да се одлучи за традиционални терапии, нема гаранции дека ќе биде подготвен пред септември. Со оглед на тоа што има 39 години и дека договорот со Милан му истекува следното лето, италијанските медиуми пишуваат дека оваа повреда би можела да му ја заврши кариерата.

Иако Барселона до крајот на Примера, останати се уште две кола, може да ја освои шампионската титула, таа можност е во сферата на чиста математика. Две кола до крајот, каталонците заостануваат четири бода зад водечкиот Атлетико (имаат и полош меѓусебен скор), а два бода зад второпласираниот Реал. Накратко, и самите се свесни дека титулата е загубена.
Во Лигата на шампионите беа елиминирани во нокаут фазата, а посебно болен беше поразот од 4:1 од ПСЖ.
Барселона веќе неколку години е сенка на клубот кој не така одамна беше синоним за најубавиот и најубиствен фудбал на светот. Екипата која нанижа трофеи, денеска мора да се задоволи само со Купот.
Со оглед на тоа, управата на клубот, на чело со новиот претседател Лапорта, одлучи да направи целосен ремонт.
Каталонски Мундо Депортиво пишува дека донесена е одлука дури 14 играчи да имаат дозвола да го променат клубот, а со планираните засилувања, примарна цел е да се задржи Меси на Камп Ноу.
Мундо споменува 14 играчи, а седум од нив се именувани. Тоа се: Миралем Пјаниќ, Нето, Самуел Умтити, Жуниор Фирпо, Матеус Фернандес, Филипе Кутињо и Мартин Брејтвајт. Статусот на останатите играчи не е до крај дефиниран, но секако продажбата доаѓа во обзир доколку пристигне нова понуда.

Испаѓањето на Вардар во Втората лига и понатаму е тема на спортската јавност на просторите на поранешна Југославија. Дарко Панчев, во интервју за „Моцарт спорт“, открива што се случувало во клубот, во периодот кога тој бил спортски директор. „Кога се пласиравме во Лигата на Европа им кажав на луѓто во клубот дека немаме тим кој може да биде конкурентен. Добивме пет милиони евра од УЕФА, со тие пари можевме да го проектираме буџетот за наредните три сезони. За условите во македонскиот фудбал тоа се големи пари. Јас не ја препознав желбата кај нив дека сакаат да работат на засилување на тимот. И бев во право. Реал Сосиедад ни даде шест, Зенит пет гола. Само со Розенборг одигравме нерешено на домашен терен“, рекол Панчев. Европскиот и светски првак со Црвена Звезда, вели дека клуб со традиција каков што е Вардар мора да ја има поддршката и од државата.

Ирската фудбалска репрезентација не се пласираше на Европското првенство, но еден од најпознатите пејачи од таа земја ќе има важна улога.
Пол Дејвид Хјусон, попознат како Боно Вокс од групата У2, ја пее песната „We are the people“, која е претставена како официјална химна на Европското првенство. Песната ја изведува заедно со познатиот гитарист Дејвид Хауел Еванс, а автор на истата е холандскиот ди-џеј Мартин Гарикс.
Гарикс песната започнал да ја пишува пред три години. Имаше големи планови, но ни во сон не се надеваше дека членовите на У2 ќе се согласат да соработуваат со него.
„Морав да го исклучам микрофонот кога ми се јавија бидејќи вреснав. Се ежев цело време. Човеку, Боно Вокс е покрај мене и пее моја песна.“ – изјави Гарикс за страницата на УЕФА.
„Оваа песна доаѓа во вистинско време, кога луѓето повторно се враќаат на нормалниот живот.“ – вели Гарикс.

Арсенал размислува да влезе во битка за потписот на напаѓачот на Атлетико, Муса Дембеле, кој е под договорна обврска со Олимпик Лион. Лондончани гледаат на 24-годишниот Французин како потенцијална замена за Александар Лаказет и Едвард Нкетија, кои може да ги сменат клупските бои на крајот на сезоната. Атлетико има опција да го откупи Дембеле за 30 милиони фунти, но бидејќи напаѓачот одигра само 6 натпревари за Атлетико, Лион може да го продаде за 25 милиони фунти.

Италијански Газета дело Спорт јавува дека Интер ја намалил цената за Лаутаро Мартинез и сака да го продаде ова лето.
Новиот шампион на Италија финансиски не стои добро, па од 111 милиони евра, Лаутаро може сега да оди за 80 милиони, ова го тврди престижниот весник од Италија.
Лаутаро и Интер имаат договор до 2023 година, но клубот од Милано сака да профитира, го донесе за 25 милиони евра, сега има понуда од Барселона која тежи 80 милиони.
Барселона притискаше за Лаутаро минатата сезона, но Интер не отстапи од откупната клаузула која изнесува 111 милиони, сега таа е намалена за 31 милион.