Поранешниот фудбалски репрезентативец на Македонија, Ферхан Хасани се врати во својот матичен клуб, Шкендија.
31-годишниот фудбалер повторно се враќа во клубот од Тетово, после неговиот престој во Тирана каде настапуваше за екипата на Партизани.
Популарниот „Буба“ беше член на Шкендија на два пати и тоа од 2007 до 2012 и од 2015 до 2018 година.
НБА тимот Далас Маверикс на специјална церемонија му искажа огромна чест на легендарниот Дирк Новицки. Неговиот дрес со број 41 беше подигнат во салата каде настапуваат Маверикс.
Овај настан се случи после две години откако популарниот германски кошаркар објави дека се повлекува од активното играње.
Новицки пристигна во екипата од Далас во 1998 година како деветти пик на драфтот, и целата своја кариера ја помина во редовите на тимот од Тексас, со кого стана НБА шампион во 2011 година.
Играчот од средниот ред на Јувентус, Арон Ремзи, кој не е во плановите на тренерот Алегри, ја одби понудата на Барнли.
31-годишниот репрезентативец на Велс сака да се врати во Премиер лигата, но во некој поамбициозен клуб. Поранешниот играч од средниот ред на Арсенал се поврзуваше и со можен трансфер во Њукасл, но од тоа засега нема ништо.
Ремзи оваа сезона одигра само три натпревари.
Екипата на Ливерпул е со големи шанси да ја доведе ѕвездата на Порто, Луис Дијаз.
Тренерот Јирген Клоп беше многу импресиониран од 24-годишниот Колумбиец на натпреварите против Порто во Лигата на шампионите оваа есен и сега клубот сака да го забрза трансферот, иако првичните очекувања беа дека тоа ќе се случи на лето.
Отсуството на Мохамед Салах и Садио Мане, како и бројните повреди во тимот можно е да ја забрзаат реализацијата на овој трансфер за кој се очекува Ливерпул да издвои 60 милиони евра.
Екипата на Барселона е заинтересирана за играчот од средниот ред на Ливерпул, Наби Кеита, и ќе се обиде да го доведе во своите редови за време на летниот период.
Репрезентативецот на Гвинеја, пристигна на „Енфилд“ во 2018 година од РБ Лајпциг за 53 милиони фунти, но не успеа да се избори за посериозна улога во тимот на Јирген Клоп. Поради неговите чести повреди во изминативе сезони, Кеита имаше слаба минутажа во Ливерпул.
Оваа сезона може да се каже дека е една од неговите најдобри откако го носи дресот на „црвените“, бидејќи веќе настапи на 16 меча во сите натпреварувања, притоа постигнувајќи и три гола. Сепак голема е веројатноста Ливерпул во текот на летото да се раздели со 26-годишниот Кеита, а како негова нова дестинација се споменува Барселона, иако за него се интересираат и Баерн Минхен, Милан и Рома.
Според француските медиуми, францускиот вицешампион Париз Сен Жермен сака да се раздели со напаѓачот Мауро Икарди, и ќе проба во своите редови да го врати Моизе Кин од Јувентус.
Неодамна беше објавена веста дека од Јувентус веќе стапиле во контакт со претставниците на Икарди. Јувентус сака да го доведе Аргентинецот во Италија откако тој со своите игри не успеа да се наметне во ПСЖ по неговиот трансфер од Интер.
Но според информациите, челниците на „Старата дама“ не се согласуваат да платат 50 милиони евра, колку што побарува ПСЖ за Икарди.
Поради оваа причина, двата тима можат да направат меѓусебна размена на играчи – Кин за Икарди. Спортскиот директор на екипата од Париз, Леонардо е голем фан на 21-годишниот Италијанец и сака повторно да го види во екипата каде минатата сезона играше како позајмен играч.
Лино Червар не ги крие симпатиите кон Македонија пред Европското првенство кое ќе стартува на 13. јануари.
Червар ги анализираше селекциите во регионот и испрати поддршка за Лазаров и Македонија.
„Искрено, јас ќе навивам за мојата втора татковина, Македонија. Мораме да сме објективни, репрезентацијата на Македонија поминува низ многу промени доаѓа смена на генерации. Тимот го води најголемата легенда во државата, Кире Лазаров. Кире е човек кој го сакам и почитувам, сите треба да го следат неговиот пример. Иако рано влезе во тренерските води мислам дека има квалитет да покаже многу. Сигурен сум дека на ниту една репрезентација нема да и биде лесно со Македонија“, изјави Червар.
Алваро Мората е голема желба на Барселона и се шпекулираше дека Шпанецот може да се пресели на „Камп Ноу“ во зимскиот преоден рок.
Меѓутоа, тренерот на Јувентус, Макс Алегри денес потврди дека Мората сигурно останува во Торино до крајот на сезоната.
„Јас и директорот на клубот се сретнавме со Алваро Мората и му ја соопштивме одлуката – тој не е за продажба. Алваро е под договор со нас, ние не планираме да се разделиме и нема сомнеж дека тој ќе остане до крајот на сезонава. Мората останува 100%, крај на приказната“, изјави Алегри.
Еден од најталентираните македонски фудбалери и досегашен член на Работнички, Лука Станковски, направи трансфер во турскиот прволигаш Газијантеп. Тој во наредните четири и пол години ќе го носи дресот на турскиот прволигаш.
„Среќни сме што можеме да го потврдиме трансферот на нашиот досегашен фудбалер, талентираниот Лука Станковски во турскиот прволигаш Газијантеп. Работнички продолжува да реализира големи трансфери на своите фудбалери и во овој тежок период на пандемија на коронавирусот низ целиот свет“, изјави претседателот на ФК Работнички, Драган Поповски.
Тимот на Работнички ќе ги стартува зимските подготовки на 8. јануари, а втората фаза ќе ја одработи во Анталија, од 20 до 31 јануари.
Дарко Мицевски е нов играч на ФК Вардар. Тој денес потпиша четири и пол годишен договор со најтрофејниот македонски фудбалски состав. Повратникот во Вардар е освојувач на шампионската титула во сезоната 2019/20.
“Ми претставува голема чест и задоволство враќањето во Вардар, едноставно повикот од најтрофејниот македонски фудбалски клуб не се одбива. Им благодарам на сопственикот Слободан Крстевски и спортскиот директор Александар Бајевски за повикот и довербата, лесно се договоривме и заеднички ги усогласивме целите на клубот. Верувам во овој проект, искрено се надевам дека ќе биде еднакво успешен како и при мојот претходен престој тука. На сите навивачи и приврзаници на Вардар им ја честитам новата година и божиќните празници, се гледаме на терен, да го вратиме Вардар таму каде што му е местото.”, изјавил Мицевски.
