Напаѓачот на Јувентус, Пауло Дибала се согласил да премине во Интер следната сезона. Ова го соопшти авторитетниот спортски весник, „Газета дело спорт“.

Според изворот, миланскиот клуб разговарал со претставниците на напаѓачот минатата недела. Се очекува Аргентинецот на лето да потпише четиригодишен договор со „нероаѕурите“ со годишна плата од 6 милиони евра плус дополнителни бонуси.

Јувентус не сакаше да го продолжи договорот со аргентинскиот напаѓач и тој по завршувањето на сезоната ќе го напушти Торино како слободен играч.

Голманот на Наполи, Давид Оспина може да потпише нов договор со тимот од Неапол. Претходно беше објавено дека Лацио има интерес да го купи колумбискиот чувар на мрежата, но по се изгледа тој сака да остане во тимот на нашиот Елмас.

Иднината на Оспина во Наполи зависи од друг голман – Алекс Мерет, кој може да го напушти тимот ова лето. Наполитанците во овој случај на својот нов голман ќе му понудат нов договор.

33-годишниот Оспина му се приклучи на наполитанскиот клуб од Арсенал во јули 2019 година.

Италијанските гиганти Јувентус и Милан покажуваат интерес за доведување на офанзивниот играч за врска на Манчестер Јунајтед, Џеси Лингард. 

Договорот на 29-годишниот фудбалер со Манчестер Јунајтед му истекува летово, и се очекува тој да го напушти „Олд Трафорд“ како слободен играч. 

Како лидери во трката за потписот на Лингард се истакнуваат екипите на  Јувентус и Милан, меѓутоа интерес за играчот покажуваат и неколку тимови од Премиер лигата.

Шефот на стручниот штаб на Реал Мадрид, Карло Анчелоти (62) изјави дека планира да се пензионира по ангажманот во „Кралскиот клуб“.

„После Реал Мадрид, најверојатно ќе престанам да работам како тренер, изјави Анџелоти во интервју за „Прајм видео“ и додаде: „Но, не знам колку долго ќе трае. Ако Реал планира да ме задржи уште 10 години, тогаш јас ќе бидам тренер толку долго“.

Италијанскиот фудбалски стручњак стана првиот тренер во историјата кој освоил титули во сите пет лиги: во Серија А со Милан, во Премиер лигата со Челси, во Лига 1 со ПСЖ, во Бундес лигата со Баерн и во Ла Лига со Реал Мадрид.

„Како ја гледам мојата иднина? Сакам да бидам со моите внуци и да одам на подолг одмор со сопругата. После тоа, има толку многу работи што би сакал да ги направам и за кои немам време во моментов. Никогаш не сум бил во Австралија или Рио де Жанеиро. Сега не ја посетувам сестра ми колку што сакам. За жал, не можете да постигнете се одеднаш, но кога веќе не сум тренер, тоа се работите на кои сакам да се посветам“, заклучи 62-годишниот Анчелоти.

Фудбалерот на Лил, Ренато Санчез е многу блиску до трансфер во гигантот Милан, пренесуваат италијанските новинари.  Според информациите, 24-годишниот играч за врска е главната цел на миланезите претстојното лето.

Милан во моментот е во напредни преговори со менаџерот на играчот и се надева на финализирање на договорот. 

Ренато Санчез оваа сезона за Лил во Лига 1 има 2 гола и 5 асистенции на 24 натпревари, а неговиот договор истекува летото 2023 година.

Одличните партии на Рафаел Леао во дресот на Милан од почетокот на сезоната не останаа незабележани од европските гиганти.

Португалецот се етаблираше во еден од најдобрите млади фудбалери во Европа, па неколку европски гиганти веќе покажуваат силен интерес за неговиот потпис.

Интерес за него покажуваат Манчестер Сити, Арсенал и Њукасл, кои се спремни да понудат 70 милиони евра за неговиот потпис.

Милан сака да го „блиндира“ со нов договор и му понудил тројно зголемување, па е спремен да ја одбие секоја понуда која ќе пристигне за Португалецот.

Тимот на Бурнмаут и официјално се врати во англиската Премиер лига. Популарните „Цреши“ промоцијата ја обезбедија со победата над директниот конкурент Нотингем Форест со резултат 1:0 во 45. коло на Чемпионшип.

Бурнмаут освои 85 бодови и го обезбеди второто место во конечниот пласман на табелата. Нотингем останува на 3. место со и ќе игра во плеј-офот за влез во елитната англиска лига.

Буррнмаут се враќа во Премиер лигата по само една сезона во Чемпионшип. Тие ќе му се придружат на Фулам, кој исто така се врати во елитата откако ја обезбеди шампионската титула.

Ѕвездата на Ливерпул, Мохамед Салах не го криеше задоволството од пласманот во финалето на Лигата на шампионите, после елиминацијата на Виљареал. 

Својот противник за финалето, екипата на Ливерпул ќе го добие после полуфиналниот реванш помеѓу екипите на Реал Мадрид и Манчестер Сити.

Салах со нетрпение очекува можен реванш против Реал Мадрид, од кого загубија во финалето во 2018 година.

“Ако треба да бидам искрен, го сакам Реал Мадрид. Сити е многу тежок противник, игравме со нив неколку пати оваа сезона. Но лично јас го претпочитам Реал бидејќи го загубивме финалето од нив и се надевам дека ќе добиеме реванш”. изјави Салах за англиските медиуми.

Тренерот на Виљареал, Унаи Емери, упати пофалби кон својот тим за одличниот настап во првото полувреме од полуфиналниот дуел во Лигата на шампионите против Ливерпул.

Виљареал до полувремето имаше водство од 2:0, но во вториот дел гостите од Ливерпул одиграа одлично и направија целосен пресврт за победа од 2:3.

„Планот беше да се контролира топката и да се изврши притисок врз Ливерпул на нивната половина. Првиот дел се одвиваше според планираното сценарио, се израмнивме со резултатот од првиот дуел и имавме шанса да го елиминираме противникот.Во вториот дел немавме одговор за навистина исклучителната игра на Ливерпул. Не успеавме да го направиме последниот чекор кон финалето, но сме на добар пат“, потенцира тренерот на „жолтата подморница“, Емери.