Џанлуиџи Донарума се уште не го потпишал продолжувањето на договорот со Милан. Иако неговиот агент Мино Раиола се труди од клубот да извлече поголема плата за него, сепак главната причина не се парите.
Донарума е во тесниот круг на најдобри голмани на светот, но се уште нема одиграно натпревар во Лигата на шампионите. Токму тоа натпреварување е и негова цел и со клубот нема да го продолжи договорот се додека не биде сигурен дека Милан наредната сезона ќе настапи во Лигата на шампионите.
Тоа го наведуваат италијанските медиуми и потсетуваат дека 22-годишниот чувар на мрежата игра за шест милиони евра по сезона, дека понудата на клубот беше продолжување со зголемување на платата за два милиони, а Раиола за својот клиент се обидува да осигура 10 милиони евра по сезона. Со потпис, во новиот договор би требало да има и откупна клаузула, а истиот би бил со важност до 2023. година.

Јувентус казни тројца фудбалери кои организираа забава во домот на Вестон Меккени во средата, а со тоа го прекршија правилото кое е на сила во Италија, а кое се однесува на мерките за спречување на ширењето на коронавирусот.
Меккени во својот дом организирал приватна забава на која повика десет луѓе. На истата присуствуваа и Пауло Дибала и Артур. Сите тројца се суспендирани од страна на клубот и немаат право на настап на лигашкото градско дерби против Торино во сабота. Истата суспензија би можела да биде продолжена и на натпреварот кој Јувентус го игра против Наполи во среда.
Во Италија на сила е полициски час од 22. часот до 5. часот наутро. Полицијата во домот на Меккени пристигнала по повик на сосед околу 23.30 часот.

Младиот Енцо Зидан, син на славниот Зинедин Зидан својата среќа ќе ја побара преку океанот.
Играчот за врска од октомври минатата година е слободен фудбалер, Алмерија се одлучи да не го продолжи договорот со Зидан Јуниор.
Енцо својата кариера ја започна во младинскиот погон на Јувентус, во 2012. година се пресели во младиот тим на Реал Мадрид, каде се задржа пет сезони, а потоа следеше трансфер во Алавес. Настапуваше и за Лозана, Авеш и Алмерија, па се чини дека дојде време за преселба во МЛС, а ЕСПН пренесува дека Интер Мајами го доведе Енцо на проба.
Најмладиот тим во МЛС е проект на Дејвид Бекам, па останува да видиме дали Енцо ќе успее кај некогашниот соиграч на неговиот татко.

Џорџ Гарди е менаџерот на Ељиф Елмас во Италија, а токму тој за медиумите од оваа земја изјави дека вредноста на македонскиот репрезентативец скокнала, па сега тој на трансфер пазарот вреди 40 милиони евра. „Кога имате стандарден репрезентативец, кој постигнува голови, ја креира играта на националниот тим, нормално е цената да се зголеми. Наполи има фудбалски бисер во тимот, кој сега вреди 40 милиони евра“ – изјави Џорџ Гарди. Наполи досега потврди дека нема намера да го продава Елмас, велејќи дека тој е важен играч за славниот клуб од Италија кој има намера да го направи стандарден првотимец на клубот.

Американската компанија –„Fenway Sports Group“ , која е сопственик на Ливерпул, продаде 10% од акциите на приватната инвестициска компанија –„ RedBird Capital Partners“. Договорот е вреден 638 милиони евра и ќе им олесни на „црвените“ да се справат со ефектите од пандемијата. Тоа значи дека кошаркарската мега-ѕвезда, Леброн Џејмс, кој е малцински акционер во Ливерпул од 2011 година, ќе има поголем капитал. Леброн и неговите деловни партнери Маверик Картер и Пол Вотер ќе бидат дел од заедничкото управување на „FSC“ и „RedBird Capital Partners“. Ливерпул поради пандемијата претрпе загуби од 141 милиони евра во текот на изминатата година.

Баерн Минхен сака да ја искористи ситуацијата околу прекинот на преговите помеѓу Хјун-Мин Сон и Тотенхем и веќе испратил порака за Јужнокореецот. 28-годишниот фудбалер игра фантастична сезона и е еден од најдобрите играчи во Премиер лигата во моментов. Уште во октомври Тотенхем започна преговори за нов договор и „спарси“ му нудат плата од 200.000 фунти неделно. Меѓутоа, преговорите не одат во добра насока. Англиските медиуми пренесуваат дека Баерн стапил во контакт со агентот на Сон и му нуди 5-годишен договор со значително повисока плата. Доколку Сон не потпише нов договор до крајот на сезоната, Тотенхем сериозно ќе размислува за негова продажба.

Македонската фудбалска „икона“ , Горан Пандев, кој стана највозрасниот фудбалер што постигнал погодок против Германија во квалификациите за Мундијалот, се огласи на социјалните мрежи. „Во фудбалот некогаш се случуваат чуда. храбрите ги прати среќата. со борба, верба и срце на терен оваа генерација заслужи и заслужува многу поголем респект“, напиша Пандев. Пандев кој вчера го постигна 37-от гол за репрезентацијата, доби честитки и од неговиот клуб, Џенова.

Клубовите од англиската фудбалска Премиер-лига платиле вкупно 272,2 милиони фунти како трошоци за агентите задолжени за трансфери од почетокот на 2020 година до февруари 2021 година. Во тој период, тимот на Челзи има најмногу трошоци и покрај пандемијата со ковид-19. Лондончани ги привлекоа Тимо Вернер, Хаким Зијаш, Бен Чилвел, Каи Хаверц и Едвард Менди а нивните менаџери добија вкупно 35,2 милиони фунти. Лидерот на табелата, Манчестер Сити потроши 30,1 милиони фунти на провизии на агенти додека Манчестер Јунајтед им плати 29,8 милиони фунти на менаџерите. Најмалку пари потроши Вест Бромвич – 4,2 милиони фунти.

Претседателот на Република Србија, Александар Вучиќ најави дека таа држава годинава ќе започне со изградба на национален стадион. Истиот ќе се наоѓа во близина на излезот на автопатот Белград – Сурчин.
„Изградбата на стадионот ќе биде огромен проект за целата општина, но и за целата земја. Недалеку од стадионот ќе се гради и спојување на автопатот, па пристигнувањето ќе биде уште полесно. Србија во моментот е најголемото градилиште во Европа.“ – вели Вучиќ.
Се работи за стадион од 55 илјади места и за неговата изградба ќе се издвојат 250 милиони евра. Тој ќе стане најголем српски стадион и од првото место ќе ја симне Маракана, која може да прими 53 илјади гледачи.

Фудбалското првенство на Словенија е прекинато поради пандемијата на коронавирус.
Со тоа, Словенија стана првата земја во Европа која во 2021. година го прекина првенството поради влошената епидемиолошка ситуација. Словенечките власти ги забранија сите спортски активности, со што е прекината сезоната во Првата лига, но и во останатите натпреварувања.
Фудбалскиот сојуз на Словенија испрати молба до властите сепак да дозволат продолжување на натпреварите, а одговор се уште се чека.
Словенија последните неколку денови има по повеќе од илјада заразени со коронавирус.