Останува неизвесноста за иднината на Џанлуиџи Донарума во Милан. Договорот на 22-годишниот голман истекува на крајот на сезоната, а тој сè уште не го продолжил. Според италијанските медиуми, клубот му понудил 5-годишен договор со годишна плата од 7 милиони евра плус уште 1 милион евра за секој пласман во Лигата на шампионите. Сепак, оваа понуда се разликува од барањата на агентот на играчот – Мино Рајола. Тој се залага за договор не повеќе од две години со плата од 12 милиони евра по сезона, што раководството го смета за претерано. Донарума и Рајола чекаат да видат дали „росонерите“ ќе се пласираат во Лигата на шампионите пред да одлучат за иднината на голманот. Во меѓувреме, ситуацијата околу новите договори на Златан Ибрахимовиќ и Хакан Чалханулу изгледа охрабрувачка. 39- годишниот напаѓач се согласи да потпише уште една сезона со сегашната плата од 7 милиони евра и се очекува тоа да се случи наскоро. Разликите меѓу понудата на директорите на клубот и желбата на турскиот плејмејкер драстично се намалија. Двете страни можат да се договорат за четиригодишен договор со плата од 4,5 милиони евра по сезона плус бонуси.

Јувентус внимателно ја следи ситуацијата со тренерот на Реал Мадрид, Зинедин Зидан и сака да го донесе во Торино. Челните луѓе на „старата дама“ не кријат дека се незадоволни од работата на актуелниот тренер, Андреа Пирло, додека шпанските медиуми се убедени дека францускиот стручњак ќе си замине од „Сантијаго Бернабеу“ на крајот од актуелната сезона. Весникот „АС“ пренесува дека Јувентус и француската репрезентација чекаат разврска во Мадрид, бидејќи сакаат да го ангажираат Зидан. Доколку Зидан одлучи да замина на лето, ќе има две опции каде да ја продолжи кариерата. „АС“ тврди дека сепак е поблиску до Јувентус, бидејќи смета дека е рано за кормилото на репрезентацијата.

Македонија во третото коло од групата Ј во квалификациите за Светското првенство ја победи Германија на гостински терен со 2:1. Така, Македонија стана првата репрезентација која ја победи Германија во квалификациски натпревар за Светско по цели 35 натпревари. Ова за нашите фудбалери е нов голем успех, по историскиот пласман на Европското првенство. По натпреварот, селекторот Игор Ангеловски тешко наоѓаше зборови. „Што да ви кажам? Не можам ништо од емоција и среќа. Ги направивме Македонците среќни и горди. Ова е како освојување на Европско првенство.“ – рече Ангеловски, па истакна: „Дојдов со овие момци тука бидејќи ми ветија победа. Мојата сопруга лежеше во болница, имаше симптоми на КОВИД-19. За среќа, сега е подобро. Децата ми дадоа поддршка. Благодарам на сите, не знам друго што да кажам? Единствено да заплачам.“ Горан Пандев во својата 37. година ја предводеше репрезентацијата до сензација. „Тој е неверојатен човек, лидер на екипата. Се бореа лавовски да испишат историја на својата земја.“ – заклучи македонскиот селектор.

Манчестер Сити и Атлетико Мадрид покажува сериозен интерес за дефанзивецот на Аталанта, Робин Госенс, пренесуваат италијанските медиуми. Пеп Гвардиола е голем симпатизер на квалитетите на левиот бек и сериозно размислува да го доведе на „Етихад“ на лето. Сити е во потрага по лев бек бидејќи на лето готово сигурно ќе се раздели со Зинченко, а Госенс е на врвот на листата желби. „Граѓаните“ ќе треба да ја победат конкуренцијата, бидејќи за Госенс веќе подолго време интерес покажува Атлетико Мадрид. 26-годишниот Германец игра уште една фантастична сезона со Аталанта, каде на 34 меча постигна 10 гола и запиша 7 асистенции.

Корентин Толисо, најверојатно ќе биде продаден по завршувањето на сезоната. Јувентус се појавува како главен фаворит за привлекување на францускиот интернационалец. Според –„ Калчо Меркато“, двете страни преговараат за можен трансфер. Куриозитет е дека во 2017 година Толисо имаше понуда од Јувентус, но, избра да се пресели во Германија. Во тоа време за него беа платени рекордни 41,5 милиони евра кога станува збор за Бундеслигата. Толисо во сезонава настапи за Баерн на 22 меча и постигна три гола.

УЕФА има намера да ја укине одредбата со која максималниот дозволен број на гледачи за време на пандемијата на коронавирусот е 30 отсто од капацитетот на стадионот, а сето тоа како би се зголемил бројот на навивачи за претстојното Европско првенство.
Руските и англиските власти веќе најавија дека на стадионите во Санкт Петербург и Лондон би можеле да дозволат поголем број на гледачи, па УЕФА согласно тоа подготвува одредба со која максималниот дозволен број на навивачи ќе можат да го одредат локалните власти.
Домаќините на Европското првенство до 7. мај треба да одлучат колку гледачи ќе бидат дозволени на нивните стадиони, а мнозинството се надева дека нивните влади ќе дозволат отворање на трибините.

Серхио Агуеро и официјално ќе го напушти Манчестер Сити по крајот на сезоната, па како слободен играч со 33 години ќе тргне во потрага по нов клуб каде ќе ја продолжи кариерата. Го напушта Сити како најдобар стрелец на сите времиња со постигнати 257 погодоци во 384 одиграни натпревари.
Последните неколку денови се пишуваше дека кариерата би можел да ја продолжи во Барселона, каде го бара репрезентативниот соиграч Лионел Меси, но шпанските медиуи наведуваат дека тоа не е дел од визијата на Роналд Куман.
Заинтересирани за Агуеро има. Ако Барселона навистина се откаже од неговото доведување, Агуеро ќе може да ги разгледа и другите понудени опции. Во прашање се клубови со шампионски амбиции, па се наведува дека постои интерес од Интер и Јувентус, Париз Сен Жермен, а се споменува и дека во Англија би можел да остане во Манчестер, но во дресот на Јунајтед.
Сите наведени заинтересирани клубови веќе стапија во контакт со агентот на аргентинскиот напаѓач.

На официјалната прес конференција во пресрет на натпреварот против Германија од квалификациите за Светското првенство 2022. селекторот на македонската репрезентација, Игор Ангеловски и капитенот Горан Пандев истакнаа дека посебна мотивација за мечот со големиот противник и не треба. Германија е голем фаворит, но ние во минатото покажавме дека можеме да се носиме и со репрезентации од рангот на противникот.
„Германија не е фаворит само против нас, туку е фаворит на сите Светски и Европски првенства. Ова ќе биде специјален меч за нас и ќе биде задоволство да се игра со ваков противник. Затоа не ни треба посебна мотивација и самото тоа што играме против поранешен светски шампион ни ја зголемува желбата и мотивот за надигрување. Очекувам возбудлив натпревар. Против силни противници играме добро. Верувам дека така ќе биде и на утрешниот дуел. Германците се физички силни и имаат огромен квалитет. Доколку после тренингот биде се добро со Велковски и Адеми и двајцата ќе конкурираат за место во почетникот состав.“ – изјави Ангеловски.
„За нас е чест што ќе играме против голем противник. Ние сме подготвени да го дадеме максимумот, иако ова ќе ни биде трет натпревар за седум дена. Германците знаат против кого играат, знаат со каков квалитет располагаме и сигурно одлично ја анализирале нашата игра. Но, ние сме сосема различна репрезентација од пред пет или шест години, сега сме далеку посилни, сега сме учесници на ЕП и сметам дека и противникот ќе биде претпазлив. Тие се фаворити, тоа е јасно, но мораме да веруваме во себе и да веруваме дека може да ги изненадиме.“ – изјави Пандев.

Навивачите на Барселона го прогласија Диего Армандо Марадона, како најдобар фудбалер што настапил во дресот на Каталонците гледано низ историјата. Веднаш до Аргентинецот е неговиот сонародник, Лео Меси, кој е сопственик на неколку рекорди. Потоа се наредени: Роналдињо, Јохан Кројф, Андрес Иниеста, Чави, Луис Суарез, Роналдо, Жерард Пике и Карлес Пујол. На листата што ја направија фановите ги нема Нејмар, Ривалдо и сегашниот тренер, Роналд Куман.