Германскиот судија Феликс Брих утре ќе ја заврши својата меѓународна судиска кариера. Тој по рекорден 70-ти пат ќе ја дели правдата во Лигата на шампионите на дуелот од 6. коло од групната фаза што ќе го одиграат Реал Мадрид и Интер.

46-годишниот Брих, сепак, нема да заврши со својата судиска работа, затоа што ќе продолжи да суди во Германија.

Фудбалскиот клуб Милан ќе настапи без Тео Ернандез и Рафаел Леао на дуелот против Ливерпул во рамките на 6.коло од групната фаза во Лигата на шампиони.

31-годишниот Ернандез натпреварот ќе го пропушти поради болест, додека неговиот клупски колега Рафаел Леао нема да настапи поради повреда која ја заработи на натпреварот со Салернтитана  во Серија А.

Дуелот помеѓу Милан и Ливерпул ќе се игра на 7 декември и е последен натпревар од групната фаза.

Лидер на Б групата е Ливерпул со 13 бода и тој веќе обезбеди учество во наредната фаза. Втор е Порто со 5 бода а екипата на Милан се наоѓа на третата позиција со освоени 4 бодови.

Веспрем објави дека ги продолжил договорите со двајца играчи. Верноста кон клубот ја продолжиле Петар Ненадиќ и Патрик Лигетвари.

Српскиот репрезентативец Ненадиќ ќе остане во Веспрем и во сезоната 2022/2023. Ненадиќ во моментот е повреден, сигурно нема да игра до крајот на годината поради што е неизвесен неговиот настап на Европското првенство.

Ненадиќ во 2018 година од Фуксе Брлин пристигна во Веспрем.

За разлика од Ненадиќ, Лигетвари потпиша нов двегодишен договор со Веспрем.

Велшкиот напаѓач во дресот на Реал Мадрид, Герет Бејл се врати на тренинзите. Играчот може да биде дел од тимот на Анчелоти на натпреварот од 6. коло од Лигата на шампионите со Интер, кој ќе се одигра утре.

Според изворот, Бејл на вчерашната сесија тренирал со комплетната група на Реал Мадрид. Во меѓувреме, Даниел Себаљос почна со индивидуални тренинзи.

Голема е веројатноста, првиот напаѓач на тимот, Карим Бензема, да го пропушти овој натпревар поради повреда

Фабијан Руиз е интересен за англиски Ливерпул.

25-годишниот шпански играч за врска за шефовите на Ливерпул е совршена аквизиција за засилување на средниот ред. И самиот фудбалер е подготвен да го направи следниот чекор во кариерата, а трансферот може да се реализира во летото 2022 година.

Руиз игра за Наполи од 2018 година, кога дојде во Италија од Бетис. Договорот на Руиз истекува во 2023 година.

Шампионот во Серија А, екипата на Интер, оваа недела ги започнува преговорите со менаџментот на Марсело Брозовиќ за продолжување на неговиот договор со клубот.

Од Интер се подготвени на 29-годишниот хрватски интернационалец да му понудат плата од 6 милиони евра по сезона и да го задржат во своите редови до 2025 година.

Актуелниот договор на Марсело Брозовиќ истекува во јуни 2022 година. По изминати 18 натпревари од стартот на сезоната, тој во „сино-црниот“ дрес има постигнато 1 гол и 2 асистенции.

Интер е втор на табелата во Серија А со 37 бода, еден помалку од лидерот Милан кој има 38.

Тренерот Клод Пуел не е повеќе тренер на францускиот Сент Етјен. Тој доби отказ по поразот на домашен терен од тимот на Рен со 0:5, во натпревар од 17.коло на француското првенство.

Од Сент Етјен за отказот на тренерот Клод Пуел објавија официјално соопштение на клубската веб страна во кое се вели дека одлуката за негова смена ја донел извршниот претседател на клубот.

60-годишниот Пуел беше поранешен тренер во англиската Премиер лига каде ги водеше екипите на  Лестер и Саутемптон.

Сент Етјен е на последното место од табелата во Лига 1 со освоени 12 бода по 17 одиграни натпревари.

Ливерпул ќе се обиде во зимскиот трансфер период да го доведе крилниот напаѓач на Вулверхемптон, Адама Траоре.

25-годишниот шпански репрезентативец, би можел да се пресели на „Енфилд“ за 20 милиони фунти. Траоре посакува нов предизвик во својата кариера а популарните „волци“ сакаат да заработат од неговата продажба бидејќи неговиот договор истекува во јуни 2023 година.

Тренерот на Ливерпул, Јирген Клоп е во потрага на офанзивни играчи оваа зима поради  заминувањето на Мохамед Салах и Садио Мане на Купот на Афрички Нации кој се одржува во февруари 2022.

Според италијанските новинари, екипата на Сампдорија постигнала начелен договор со Дејан Станковиќ за преземање на тренерската позиција во клубот од Џенова.

Меѓутоа од Црвена Звезда, клубот во кој 43-годишниот Станковиќ е актуелен тренер, бараат плаќање на финансиска отштета од Сампдорија за предвремен раскин на договорот со него кој е со важност до 2024 година.

Сега останува да се види дали претседателот на калчолигашот има намера да го плати обештетувањето за Србинот.

Дејан Станковиќ на клупата на Сампдорија би го заменил Роберто Д`Аверса кој се очекува да добие отказ после слабите резултати на клубот оваа сезона.