feature

Манчестер Јунајтед ставен на продажба од семејството Глејзер

Maнчестер Јунајтед и официјално е ставен на продажба, гласините кои се појавија се потврдени со официјално соопштение.

Долго време навивачите на Манчестер Јунајтед посакуваа продажба на клубот, а желбата сега конечно ќе им се оствари.

Семејството „Глејзерс побарало совет од банките за продажбата, а во опција се три варијанти – целосна продажба, продажба на дел од акциите и стратешко партнерство со трета страна.

Не е потврдено, но се шпекулира дека бараат шест милијарди фунти за продажбата на клубот. Многумина сметаат дека интервјуто на Роналдо во кое зборува против Глејзерс и ги критикува има голем удел во одлуката да го продадат клубот.

Ренар: Луди работи се случуваат во фудбалот

Селекторот на фудбалската репрезентација на Саудиска Арабија, Ерв Ренар, изјави дека во светот на фудбалот понекогаш се појавува лудило како што беше на мечот со фаворизираната Аргентина.

„Им честитам на моите фантастични играчи, секогаш им честитам и тоа го правам три години. Не смееме да заборавиме дека тие беа непоразени на 36 натпревари. Аргентина е актуелен шампион на Јужна Америка“, вели Ренар.

Саудиска Арабија е лидер во групата пред Мексико и Полска додека Аргентина е на последното место.

Кејн под знак прашалник за настап против САД

Капитенот на репрезентацијата на Англија, Хари Кејн, поради повреда на скочниот зглоб би можел да го пропушти натпреварот од второто коло во групата Б против селекцијата на САД.

Капитенот Кејн се повреди на натпреварот со Иран кој Англија го доби со 6:2. После дополнителните прегледи е одлучено напаѓачот да направи скенирање на повредата и се претпоставува дека е можно да го пропушти дуелот со САД кој се игра во петок.

Повеќе детали за состојбата на Кејн се очекува во текот на денот.

Франција го продолжува Мундијалот без Лукас Ернандез

Фудбалскиот сојуз на Франција соопштува дека репрезентативецот Лукас Ернандез ги скина предните вкрстени лигаменти од коленото и дека ќе го пропушти остатокот од Светското првенство во Катар.

Ернандез се повреди на натпреварот на кој Франција славеше триумф над Австралија со резултат 4:1. Над 26-годишниот фудбалер на Баерн Минхен после натпреварот се направи магнетна резонанца на која се потврди претходната дијагноза. Селекторот на Франција, Дидие Дешамп, нема право на дополнителна замена за играчот, па така Франција до крајот на Мундијалот ќе игра со 24 фудбалери.

ФИФА се оправда со статистика за полни трибини во Катар

ФИФА објави соопштение во врска со конфузијата околу капацитетот на стадионите за Светското првенство во 2022 година во Катар.

На отворањето на натпреварот меѓу Катар и Еквадор, беше објавено дека стадионот го посетиле 67.732 гледачи, иако претходно беше објавено дека арената има капацитет од 60.000.

ФИФА забележува дека привремената бројка од 40.000 гледачи е референтен капацитет што ги исполнува барањата на организацијата. Конечниот капацитет ќе биде одреден откако ќе бидат завршени сите подготовки на стадионот. Еве какви се конечните бројки за капацитетот на стадионите на ова СП.

Капацитет на стадионот за Светското првенство во 2022 година:

„Ахмед бин Али“: 45.032 гледачи;

Ел Бајт: 68.895 гледачи;

„Ел Џануб“: 44.325 гледачи;

„Ел-Тумама“: 44.400 гледачи;

„Едукејшн Сити стадион“:: 44.667 гледачи;

Калифа Интернaционал: 45.857 гледачи;

Лусаил Аиконик: 88.966 гледачи;

„974“: 44.089 гледачи.

Крај на драмата – Роналдо го напушти Манчестер Јунајтед

Конечно се стави крај на драмата во која главни улоги имаа Кристијано Роналдо, Ерик тен Хаг и сопствениците на Манчестер Јунајтед.

Водечките луѓе на клубот од Олд Трафорд преку официјално соопштение ја потврдија разделбата со Кристијано Роналдо. Во соопштението се вели дека е постигната спогодба Роналдо да го напушти Манчестер Јунајтед, и таа одлука стапува на сила веднаш. Клубот му се заблагодари на Роналдо за неговиот огромен допринос во клубот за кој постигна 145 гола на 346 натпревари.

Кристијано Роналдо во својата изјава вели дека е подготвен за нови предизвици во нов клуб, и дека навивачите на Манчестер Јунајтед засекогаш ќе останат во неговото срце.

Ларс Валтер: Промашивме многу зицери на натпреварот

Екипата на Еурофарм Пелистер доживеа пораз на домашен терен од германскиот Фуксе Берлин со резултат 43:34, во натпревар од третото коло во Лига Европа.

Тренерот на битолската екипа, Ларс Валтер, после натпреварот изјави дека голем проблем за екипата било отсуството на некои стандардни играчи во тимот, но и некои проблеми во играта кои не се случуваат прв пат.

„Добро го отворивме натпреварот, но потоа имавме големи проблеми со враќањето во одбраната. Ова ни се случува втор пат оваа сезона, а за да не ни се случи повторно мора да извлечеме поуки. Ми се допадна како го одигравме вториот дел. Не се предававме и со оглед дека ни фалат неколку ракометари, а се повреди и Сери, одлично го одработивме тој дел од натпреварот“, изјави стратегот на Еурофарм Пелистер.

Нареден натпревар за Еурофарм Пелистер е гостувањето во Германија кај Мотор Запорожје.

Бускетс најави крај на својата репрезентативна кариера

Капитенот на шпанската фудбалска репрезентација, Серхио Бускетс, најави дека Мундијалот во Катар ќе биде негов последен на кој ќе учествува како фудбалер.

Првотимецот на Барселона посакува во репрезентативна пензија да замине со титулата на светски шампион.

„Оваа генерација на Шпанија има квалитет и капацитет да се закити со титулата светски шампион и за тоа ни се потребни седум победи. Првата од тие победи треба да ја оствариме против Костарика и ние сме потполно фокусирани на тој тој дуел. Ова е мое четврто светско првенство и сум возбуден што повторно добив прилика да ја претставувам својата земја. Како што стојат работите ова ќе биде мој последен Мундијал“, изјави 34-годишниот Бускетс.

Кеирош: Ако не ја бодрат репрезентацијата, подобро да се вратат дома

Првиот натпревар на Иран на Светското првенство во Катар донесе измешани емоции кај играчите и стручниот штаб, пред се поради високиот и болен пораз, но и поради случувањата во земјата кои направија условите за игра да бидат уште потешки.

Во период кога еден дел од граѓаните во Иран се борат против режимот во оваа земја и се трудат жените да имаат исти права како мажите, фудбалерите го изразија својот револт кон случувањата во татковината такашто не ја пееја националната химна, но поддршката која ја испратија до сонародниците кои протестираат не наидоа на поздрав од сите навивачи.

Фудбалерите на Иран беа исвиркувани од сопствените навивачи по поразот од 6:2, а тоа не му се допадна на искусниот Кеирош кој од неодамна е селектор на оваа селекција.

„Ова за мене не беше пораз, ова за мене беше добар тренинг. Знаевме дека нема што да бараме против Англија, ова беше подготовка за следните натпревари. Резултатот не беше важен, важно е што ќе направиме со Велс и САД. За нас е тешко да мислиме само на натпреварот после тоа што се случува во Иран. Тешко е да се концентрираш, но сигурен сум дека ќе се насочиме на фудбал на следните два меча. Дојдовме тука поради фудбал и мора да ја завршиме нашата работа. Не ми е јасно само едно. Не знам зошто навивачите се свртеа против тимот. Не се бодри тимот само кога победуваш, туку и кога не оди добро. Ако се тука да не исвиркуваат, подобро да останеа дома“, порача Карлос Кеирош.

Гвардиола го продолжи договорот со Сити

Медиумите во Англија пренесуваат дека тренерот на Манчестер Сити, Пеп Гвардиола, го продолжи договорот со англискиот клуб до јуни 2025 година.

Претходниот договор на Гвардиола со шампионот на Англија имаше важност до јуни 2023 година. Шпанецот седна на клупата на Сити во 2016 година, и со клубот има освоено 11 трофеи.

Некои англиски медиуми претходно шпекулираа дека постои можност Гвардиола да стане селектор на Шпанија или да тренира клуб од американската МЛС лига, меѓутоа тој одлучи да остане во Манчестер и како главна цел постави освојување на Лигата на шампиони.

«< 1492 1493 1494 1495 1496 >»