ПСЖ во 29. коло изненадувачки загуби од Нант на домашен терен со 2:1. Францускиот првак водеше со голот на Дракслер, но гостите со головите на Коло и Симон дојдоа до пресврт. Сепак, фудбалот падна во втор план во 62. минута, кога тренерот на ПСЖ Маурисио Покетино изненадувачи го извади од игра Анхел Ди Марија, а го внесе Леандро Паредес. Ди Марија мораше да излезе бидејќи во тие моменти се одвиваше голема драма во неговиот дом. Информацијата прв ја дозна спортскиот директор Леонардо кој седеше во ложата. Потоа, информацијата стигна до самиот тренер кој веднаш реагираше.
Додека излегуваше од игра, Покетино му говореше на Ди Марија дека крадци влегоа во неговиот дом во кој во тие моменти беше неговото семејство. Аргентинскиот фудбалер веднаш од стадионот замина дома. Според некои информации, сцените во куќата на Ди Марија за време кражбата биле исклучително насилни и членовите на неговото семејство биле киднапирани, но никој не е повреден. Во истовреме, крадци влегле и во куќата на родителите на Маркињос.

Спортскиот директор на Јувентус, Фабио Паратичи ја пофали улогата на 36-годишниот португалски напаѓач Кристијано Роналдо во неговиот клуб. „Несомнено, Кристијано е иднината на Јувентус. Јас сум целосно сигурен во ова. Чест ни е што Роналдо е дел од нашиот тим. Нам ни одговара и ни се допаѓа, многу сме среќни што таквите шампиони се со нас“, изјави Паратичи. Да потсетиме, по сензационалното испагање на Јувентус од Лигата на шампионите во осминафиналето од Порто, медиумите почнаа да шират информации за можно заминување на Роналдо од Јувентус. Интерес за него се припишува на Манчестер Јунајтед, ПСЖ и Реал Мадрид. Својата класа Роналдо ја покажа и на денешниот натпревар со Каљари од 27. коло на италијанската Серија А, Роналдо постигна хет-трик за 32 минути во првото полувреме.

Јувентус покажува сериозен интерес за дефанзивецот на Марсеј, Бубакар Камара, пренесуваат медиумите на Апенините. 21-годишниот дефанзивец игра одлична сезона со Марсеј, а скаутите на Јувентус веќе подолго време ги следат неговите настапи и неговиот развој. Камара е поливалентен играч кој може да игра како централен дефанзивец, но и како последен играч за врска. Јувентус во него гледа идеална замена за Киелини, кој најави пензионирање. Италијанските медиуми пренесуваат дека Марсеј е спремен да ја пушти својата ѕвезда за 40 милиони евра, но Јувентус ќе треба да ја победи силната конкуренција.

Дефанзивецот на Реал Мадрид и шпанската репрезентација Серхио Рамос проговори за неговите професионални планови. „Во моментов уживам во она што досега го имам направено. Се чувствувам посилно. На 34 години, се чувствувам како на 28. Мислам дека повеќе сакам да ја завршам кариерата поради некои психолошки проблеми, а не поради физички проблеми. Јас ја гледам својата форма и се грижам за моето здравје. Можам да играм на Светското првенство што ќе се одржи во Мексико, Канада и САД во 2026 година. Тогаш ќе станам единствениот фудбалер кој успеа да се натпреварува на шест светски шампионати. Ова го велам врз основа на моменталните чувства. Има се повеќе и повеќе играчи на високо ниво, кои имаат над 35 години“, изјави Рамос за „Марка“. Рамос е дел од шпанската репрезентација од 2005 година. Како дел од националниот тим, дефанзивецот е светски шампион (2010) и европски шампион (2008, 2012 година).

Ромелу Лукаку ќе остане на „Џузепе Меаца“ и покрај интересот на Манчестер Сити. Ова беше објавено од страна на еден од водечките медиуми во Италија, „Газета дело Спорт“ откако претходно се појавија информации од Англија дека Манчестер Сити веќе најде замена за Серхио Агуеро и тоа во името на Ромелу Лукаку. Нормално, по одличниот настап на Ерлин Халанд во осминафиналето од Лигата на шампионите, британските медиуми го свртеа вниманието кон него и почнаа да го поврзуваат со преселба во тимот на Пеп Гвардиола. Лукаку, од друга страна, нема намера да го напушти местото каде што ја оживеа својата кариера и стана еден од најдобрите напаѓачи во светот. „Газета дело Спорт“ посочува на два главни фактори во решеноста на Белгиецот да остане во Интер – неговиот прекрасен однос со тренерот Антонио Конте и партнерот во нападот Лаутаро Мартинез.

Продолжуваат подготовките и преговорите меѓу Премиерлигата и британската влада за враќање на гледачите на стадионите во последните две кола од сезоната. Максимум 10.000 гледачи ќе можат да ги следат натпреварите на секоја домашна екипа од 18-20 мај и 23 мај. „Се надеваме дека во последните две кола ќе присуствуваат 10.000 луѓе по натпревар. Ние сме во постојани разговори со владата и се надеваме дека ќе обезбедиме фантастичен крај на сезоната”, рече извршниот директор на Премиерлигата Ричард Мастерс, за „Би-Би- Си“. „Кон крајот на сезоната ќе се приближиме на загуби од 2 милијарди фунти поради недостаток на навивачи на трибините оваа сезона и на крајот на минатата сезона. Клубовите продолжуваат да вложуваат пари за да ги подобрат своите состави, но вистината е дека фудбалот во моментов генерира помалку приходи и затоа ќе мора да се направат помали трошоци“, рече Мастерс.

Рик Карсдорп го продолжи својот договор со италијанскиот клуб Рома.
Холанѓанецот минатата сезона ја помина во Феенорд, но сезонава успеа да се избори за место во тимот каде докажа дека се работи за квалитетен фудбалер.
Оваа сезона одигра 23 натпревари, забележа пет асистенции и има еден постигнат погодок.
Сега, тој потпиша нов договор кој ќе биде важечки до јуни 2025. година.
„Навистина сум среќен за продолжувањето на договорот. Сакам да им се заблагодарам на сите оние кои ме следеа на овој пат.“ – изјави Карсдорп.
Карсдорп пристигна во Рома во јули 2017. година за сума од 16 милиони евра.

Медиумите во Италија се повикуваат на договорот играчот од Брегот на Слоновата Коска, Френк Кеси кој е до летото 2022 година, како и зголемениот интерес за него по серијата одлични настапи во средниот ред на „росонерите“. Прашањето за можни понуди до него стана особено актуелно по неговиот одличен натпревар против Манчестер Јунајтед во Лигата на Европа, по што англиските изданија веќе се натпреваруваат да му препишат нов клуб кој е заинтересиран за него. Сепак, Милан има поитни преговори за нови договори со нови играчи, бидејќи Џанлуиџи Донарума и Хакан Чалханоглу се практично слободни да договорат нови тимови затоа што ќе бидат слободни агенти во јули. Раководството на „росонерите“ со месеци разговараше за нови договори со нивните агенти, но сеуште нема договори.