Јувентус го победи Наполи со 2:0 и по деветти пат во историјата го освои италијанскиот Суперкуп. Шампионот на Италија поведе со голот на Роналдо во 65. минута, а конечните 2:0 ги постави Мората. За Роналдо тоа беше 20. погодок во исто толку настапи сезонава, но со овој гол стана најдобар стрелец во историјата на фудбалот. За португалецот тоа беше 760. гол во кариерата, со што го помина рекордот стар 66 години на чехот Јозеф Бикан, кој од 1931. до 1955. година постигна 759 погодоци. Легендарниот Пеле тврди дека во кариерата постигнал повеќе од 1000 голови, но многу од нив беа на неслужбени и тренинг-натпревари, па не се забележани. Роналдо во кариерата настапуваше само за четири клубови. За Спортинг постигна пет погодоци во 31 настап, за Јунајтед 118 во 292 натпревари, за Реал 450 голови во 438 натпревари, а за Јувентус 85 погодоци во 108 натпревари. За португалската репрезентација одигра 170 натпревари и дури 102 пати се најде меѓу стрелците. Од 760 голови, 113 постигна од пенал, 57 од слободен удар и 569 од игра.

Брајан Робсон призна дека би сакал да го види неговиот стар клуб како потпишува договор со Џек Грилиш. „Црвените ѓаволи“ сакаа да го ангажираат фудбалерот и изминатата година, но, тој го продолжи договорот со Астон Вила откако беше обезбеден опстанокот во Премиер-лигата. Робсон сега проценува дека репрезентативецот на Англија ќе биде одлично засилување за тимот од „Олд Трафорд“. „Тогаш донесе добра одлука бидејќи ја доби капитенската лента. Мислам дека е сега позрел и дека треба да одлучи да го облече дресот на Манчестер Јунајтед“, изјави Робсон за англиските медиуми.

Фенербахче повторно сака да се засили од Работнички. По стапките на Елиф Елмас кој денес игра во Наполи би можел да тргне талентираниот фудбалер на Работнички, Лука Станковски кој одигра одлична полусезона во првата македонската лига. Според информациите на „Трт Спорт“ Фенербахче започнал преговори за доведување на 1.90 високиот Станковски. Станковски е член на репрезентацијата на Македонија до 19 години, а сезонава постигна седум голови и подели две асистенции на 15 натпревари. Останува да видиме дали преговорите помеѓу Работнички и Фенербахче ќе бидат успешно завршени.

По разговорите кои ги имаше со својот фудбалер Сократис, Арсенал донесе одлука да го прекине неговиот договор со заедничка согласност. Ова му дава слобода на популарниот Папа Сократис да преговара за договор со нов клуб и да се врати во натпреварувачки ритам што е можно побрзо. Грчкиот интернационален дефанзивец му се приклучи на Арсенал од Борусија Дортмунд во јули 2018 година и оствари 69 настапи за оваа екипа. Тој беше дел од составот на „Емирати“, освојуваќи го ФА купот во август и одигра 12 натпревари во Лигата на Европа во 2019 година. „Во име на Микел Артета, нашите тренери, играчи и сите во клубот, јас би сакал да му се заблагодарам на Папа Сократис за неговиот придонес во клубот. Тој беше важен дел од нашата екипа и беше професионалец во текот на целиот период. Преговорите за раскинување на неговиот договор завршија успешно и посакуваме многу успеси на Сократис и неговото семејство“ изјави техничкиот директор Еду.

Дени Ингс не брза со одлуката за својата иднина со „светците“. Тој доби понуда за нов четиригодишен договор, според кој би станал најплатениот играч во историјата на клубот. Сепак, 28-годишниот напаѓач има амбиции да игра на повисоко ниво или поточно во Лигата на шампионите. Тотенхем имаше интерес за него изминатото лето, но сеапак отиде на поевтина опција во лицето на Карлос Винисиус. Ингс има договор со Саутемптон за уште 18 месеци, а клубот веројатно нема да сака да го пушти без пари. Ако две страни не се договорат, тој најверојатно ќе замине ова лето. Играчот сака да има клаузула за раскин на новиот договор, но од Саутемтон не сакаат да вклучат такво нешто, бидејќи не сакаат да бидат ограничени во однос на износот на трансферот.

Дивок Ориги може да го напушти Ливерпул во зимскиот преоден рок и да се преслеи во Италија. Веста ја објави новинарот Николо Шира на Твитер.
Според него, услугите на 25-годишниот белгиски фудбалер му биле понудени на Интер. Претходно беше објавено дека „нероаѕурите“ се заинтересирани за Дивок.
Ориги се приклучи на Ливерпул во 2014 година од Лил, по што помина уште една година во Франција на позајмица. Потоа, тој замина на позајмица во Волфсбург. Со Ливерпул, напаѓачот стана шампион на Англија, ја освои Лигата на шампионите, УЕФА Суперкупот и Светското клупско првенство, но оваа сезона одигра само четири натпревари во англиската Премиер лига.

Челзи и понатаму е во длабока фудбалска и резултатска криза, а се поизвесно е дека Лампард ги брои последните денови на клупата на Стемфорд Бриџ.
Според пишувањата на медиумите, потрагата за нов тренер е веќе започната, се чини дека тој ќе биде од германско потекло, а се споменуваат имињата на Тухел, Рангник и Нагелсман.
Тухел моментално е без ангажман, откако заврши неговата епизода во ПСЖ. Тој веќе соработувал со Пулишиќ, а нема сомнеж дека поранешниот тренер на Борусија Дортмунд лесно ќе најде заеднички јазик и со Хаверц и Вернер.
Нагелсман и понатаму реди успеси во Лајпциг, на четири бода се од водечкиот Баерн, а ги чекаат и дуели со Ливерпул во Лигата на шампионите, па се чини дека Нагелсман е најтешка мета за клубот од Лондон.
Од друга страна, Рангник по шпекулациите за преземање на Милан остана во Лајпциг. Тој ја обавува функцијата директор за спорт и развој во Ред Бул компанијата, па прашање е колку е заинтересиран за враќање покрај аут-линијата.
Јасно е дека големата мотивација за промена е во тоа најголемите две засилувања, Хаверц и Вернер конечно да проработат.

Лисандро Лопез е на мета на Аталанта. Наводно започнале преговорите помеѓу Аталанта и сегашниот клуб на Лисандро, Расинг.
Ништо не би било изненадувачки во овој трансфер ако Лисандро немаше 37 години и не беше на залезот на кариерата.
Меѓутоа Аталанта не е единствениот клуб во игра за неговиот потпис. Лисандро Лопез има понуда и од Атланта Јунајтед. МЛС тимот му нуди договор на Лопез до декември 2021 година, а оваа опција изгледа како најреална.
Лисандро Лопез во кариерата најголема трага остави во Лион за кој постигна 59 голови на 119 натпрвеари. Дресот на Порто го носеше на 106 натпревари и постигна 48 гола.