Фудбалерот на Лидс и репрезентативец на Англија, Калвин Филипс ќе стане нов член на шампионот Манчестер Сити, пренесува британскиот „Атлетик“.

Според договорот популарните „граѓани“ за трансферот на Филипс ќе издвојат 52,2 милиони евра, од кои 49 милиони се фиксна исплата а остатокот ќе биди исплатен во бонуси.

За играчот за врска на Лидс освен Сити, интерес покажуваа и Арсенал, Манчестер Јунајтед и Њукасл. 

Филипс целата своја професионална кариера ја помина во Лидс. За репрезентацијата на Англија има одиграно 23 натпревари.

Поранешниот турски фудбалски репрезентативец, Окан Бурук, го презеде кормилото на гигантот Галатасарај и потпиша договор на две години, соопшти екипата од Истанбул.

Тој во 2020 година го предводеше Башакшехир до првата шампионска титула во домашното првенство.

Бурук за селекцијата на Турција настапи на 56 натпревари а во Галатасарај помина 12 години.

Денес беше објавен распоредот за новата сезона во Серија А која започнува на 14 август. Шампионот Милан одбраната на Скудетото ќе ја започне на Сан Сиро против Удинезе.

Интер првиот меч ќе го игра на гостински терен кај Лече а Наполи кај Верона. Јувентус на стартот ќе го пречека Сасуоло додека Рома ќе гостува кај Салернитана.

На другите терени во 1 коло ќе играат: Фиорентина – Кремонезе, Лацио – Болоња, Монца – Торино, Специја – Емполи и Сампдорија – Аталанта

Трансферот во Ајнтрахт може да му помогне на Марио Геце да се врати во германската репрезентација, смета поранешниот тренер на Бундестимот, Јоаким Лев.

Пред неколку дена 30-годишниот Геце се врати во Бундеслигата откако последните две сезони ги мина во холандски ПСВ Ајндховен. Играчот од средниот ред, кој го постигна голот со кој Германија ја освои светската фудбалска титула во 2014 година, нема играно за својата земја од 2017 година, кога Лев се уште беше на кормилото на тимот.

„Повторно ќе игра во Лигата на шампионите, повторно ќе биде во центарот на вниманието во Бундеслигата и ќе сака да учествува на Светското првенство. Ги има сите квалитети да го направи тоа. Се разбира, не очекувам Марио веднаш да биде повикан во националниот тим. Но, среќен сум за него и за Ајнтрахт. Марио е одличен играч, голем професионалец и мислам дека ќе биде одличен за тимот на претстојните големи натпревари.“, изјави Лев за Скај Германија.

Медиумите ширум светот минатата недела ја објавија сензационалната вест за можниот трансфер на Луис Суарез во аргентинската Ривер Плата, но по се изгледа дека од големата најава ова лето нема да има ништо.

Искусниот напаѓач реши да не оди во Ривер бидејќи не сака да игра под толкав притисок на возраст од 35 години, бидејќи го знае менталитетот и барањата на јужноамериканските фудбалски фанови. 

На Суарез договорот со Атлетико Мадрид му истекува за една недела, и засега приоритет му е да остане во шпанската Примера. Наводно за него интерес покажале три клуба. Тоа се Севиља, Виљареал и Реал Сосиедад.

Претседателот на Париз Сен Жермен Насер ал Келаифи, изјави дека клубот од Париз оствари приходи од 700 милиони евра после пристигнувањето на Лионел Меси во редовите на францускиот шампион.

35-годишниот аргентински фудбалер минатата година за 110 милиони евра направи трансфер од Барселона во Париз Сен Жермен, потпишувајќи тригодишен договор.

Ал Келаифи изјави дека ПСЖ за помалку од една година направи профит од 700 милиони евра, и дека доаѓањето на Меси му донесе на клубот десет нови спонзорски договори.

Челниците на ПСЖ информираат дека минатата сезона за првпат во својата историја клубот продаде повеќе од милион дресови, од кои најголемиот дел се со името на Меси.

Исто така од клубот информираат дека ги соборија рекордите за побарување на влезници за домашните натпревари на ПСЖ, и дека од пристигнувањето на Меси, клубот доби нови 15 милиони следбеници на социјалните мрежи.

Британскиот „Дејли мејл“ пренесува дека ѕвездата на Манчестер Јунајтед Кристијано Роналдо ги предупредил челниците на клубот дека ќе го напушти Олд Трафорд доколку екипата не донесе играчи како засилувања во летниот преоден рок.

Ливерпул го донесе Дарвин Нуњез, Сити го ангажира Ерлинг Халанд, а постојат шпекулации дека Јунајтед ќе ги купува Френки де Јонг и Ентони, но засега нема ништо од тоа. Португалскиот напаѓач изјавил дека е фрустриран од недостатокјот на амбиции на клубот по прашањето на трансферите.

37-годишниот Роналдо минатата сезона на 39 натпревари за Јунајтед постигна 24 погодоци.

Фудбалерот на Ајакс, Ентони, има желба во текот на летниот трансфер период да ги напушти „копјаниците“ и да се пресели во редовите на Манчестер Јунајтед, објавија денеска дел од медиумите во Англија.

22-годишниот Бразилец сака повторно да работи под диригентската палка на тренерот,  Ерик тен Хаг, кој од 1 јуни седна на кормилото на тимот од „Олд Трафорд“.

Трансферната вредност на Ентони е околу 35 милиони евра што не треба да биде проблем за премиер-лигашот.