ПСЖ е најновиот гигант кој ќе застане во редот за Упамекано
Европскиот шампион ПСЖ подготвува терен за купување на ново засилување. Дајот Упамекано сè уште го нема продолжено договорот со својот клуб Баерн Минхен. Договорот истекува летово и многу лесно може да се случи играчот да замине од клубот.
Доколку двете страни не постигнат договор, можно е да се случи Упамекано да биде мета и на некоја од екипите од Премиер лигата.
Во случај Упамекано да не постигне договор со Баерн и влезе во последните шест месеци од актуелниот договор играчот има право да преговара со други клубови.
Охрид слави во дербито со Алкалоид, прва дерби-победа за Ројевиќ
Во првиот натпревар од 12.коло од ракометната Супер лига вечерва во Охрид истоимената домашна екипа го совлада Алкалоид со 28-24.
Во првиот дел по 6-6 во 14.минута ракометарите на Охрид предводени од словенечкиот интернациналец Тилен Стрмљан стигна до висока предност од шест разлика која беше и на полувремето 17-11. Во второто полувреме избраниците на Кирил Лазаров намалија на 22-20, кон средина на полувремето. Но, домашниот тим во завршните повторно ја консолидираше играта и дојде до ново највисоко водство од 28-21.
Најефикасен на дуелот беше Стрмљан со 11 голови.
Со денешната победа Охрид со 19 бодови го мина Алкалоид на табелата и се искачи на третата позиција, додека тимот на Лазаров е на четвртото место со 18. Лидер е Вардар со 22 бода, пред Еурофарм Пелистер со 19.
Вилсон од Борнмут во јануари се сели во Лидс
BOURNEMOUTH, ENGLAND – NOVEMBER 02: Harry Wilson of AFC Bournemouth during the Premier League match between AFC Bournemouth and Manchester United at Vitality Stadium on November 02, 2019 in Bournemouth, United Kingdom. (Photo by Harry Trump/Getty Images)
Лидс Јунајтед веќе сериозно размислува за јануарскиот прозорец бидејќи се обидува да ги зголеми шансите за опстанок во Премиер лигата.
На месец и пол до пристигнувањето на јануарскиот преоден рок, Лидс веќе има планови за можни трансфери. Најочигледна слабост на Лидс е позицијата на десното крило. Обидите за Факундо Буонаноте, а потоа и за Хари Вилсон беа неуспешни кон крајот на летниот преоден рок, но првите луѓе на клубот имаат намера повторно да се активираат на можен трансфер на Вилсон од Фулам.
Велшкиот репрезентативец изгледаше дека уште на лето ќе се приклучи во Лидс, но трансферот пропадна, а сега 28-годишниот Вилсон сам посакува промена на средината. Неговиот договор моментално истекува во летото 2026 година, што го прави подложен на понуди со намалени цени. Останува да се види со каква понуда за него ќе излезе Лидс.
Канаѓанецот Дејвид од Јуве се сели во Милан?
Џонатан Дејвид може многу бргу да го заврши својот престој во Јувентус. Наводно тој веќе се поврзува со заминување од Јувентус само неколку месеци откако се приклучи на клубот, а шпекулациите сугерираат дека би можел да замине кога ќе се отвори преодниот рок во јануари.
Канадскиот напаѓач пристигна на стадионот „Алијанц“ на почетокот на тековната сезона по истекот на неговиот договор со Лил, што се смета за голем успех за „бјанконерите“. Клубот го гледаше како идеална замена за Душан Влаховиќ и очекуваше дека веднаш ќе има влијание пред голот. Сепак, времето на Дејвид во Торино не помина како што се очекуваше, бидејќи не се етаблира како сигурен стрелец.
Според „Тутојуве“, неколку клубови внимателно ја следат ситуацијата на Дејвид, а Милан се појавува како една од најзаинтересираните страни. „Росонерите“ активно бараат да го зајакнат својот напад и се вели дека го гледаат Давид како играч со соодветни атрибути за да го зајакнат својот состав.
Гарабаја: Многу важна победа, секој си ја сфати улогата во тимот
Македонскиот шампион Еурофарм Пелистер во „мечот на неделата“ на ЕХФ, предводен од „делиричната“ публика во Битола, го сруши унгарскиот гигант ПИК Сегед во епска драма со 25-24.
Ова е втора победа за „зелените“ во Лигата на шампионите оваа сезона, а сигурно големи заслуги има и тренерот од Шпанија, Рубен Гарабаја.
„Го започнавме натпреварот со неверојатна одбрана, мислам дека ПИК Сегед го сфати тоа и почна да игра „седум на шест“. Имавме неверојатен голман во првиот дел, но со таа игра „седум на шест“ противникот дојде до лесни шутеви и ни направи проблем. Во вториот дел се боревме и ние и тие, плус еден за нас, плус еден за нив, но на крајот победивме како тим.
Секој играч си ја сфати својата улога и сите разбраа дека се важни во овој меч. Кога сите работи функционираат и ние сме како тим, може да го победиме секого. Мора да бидеме перфектни, да ни биде јасно дека со план како во првиот дел, кога сите сме внатре, тимот „работи“. ПИК Сегед можеби имаше проблеми со повреди пред овој меч, ама ова беше многу важна победа за нас“, рече Гарабаја.
Пелистерци в сабота го пречекуваат Бутел Скопје, а следната недела пак се среќаваат со ПИК Сегед, но сега на унгарско тло.
Олимписките игри во Лос Анџелес ќе ги отвори женската „стотка“
Олимписките игри во Лос Анџелес 2028 ќе започнат со финалето на 100 метри за жени на првиот ден и финалето на 100 метри за мажи на вториот ден, вели претседателот на Светската атлетика, Себастијан Коу.
Церемонијата на отворањето на Игрите ќе биде на 14 јули, а церемонијата на затворање на 30 јули, при што атлетиката – која ќе се одржува во текот на сите денови на Игрите – ќе започне во првата недела, а пливањето во втората.
Додека го изложуваа распоредот, организаторите на Игрите рекоа дека тоа ќе бидат најголемите Олимписки игри „со 36 спортови и 51 дисциплина на 49 натпреварувачки објекти во 18 зони низ регионот на Лос Анџелес и Оклахома Сити“.
Исто така, ќе има и „Супер сабота“ на 29 јули (ден 15), во која ќе бидат вклучени 26 финалиња во 23 спортови.
Приевидза го возврати ударот, Пелистер елиминиран од ФИБА Европа Купот
Кошаркарите на Пелистер претрпeа двоцифрен пораз и на третото гостување во ФИБА Европа купот откако „зелено-белите“ вечерва загубија на гостувањето против Приевидза со резултат 97-82. Словачкиот тим одигра квалитетно во текот на сите 40 минути, ја казни слабата игра во одбраната на „пелистерци “ и заслужено стигна до победата, покажувајќи им на тренерот Даскаловски и неговите избраници дека ги очекува многу работа во наредниот период.
Пелистер имаше само едно единствено водство на мечот, кога преку Ленгстон Вилсон поведе со 4-5. Резултатот беше неизвесен до 8-7 и 10-9, по што Словаците се одлепија и поведоа со 17-9. Нападот на Приевидза функционираше одлично, па домашниот состав ги заврши првите десет минути со двоцифрена предност од 27-17.
„Пелистерци“ подобро ја почнаа втората четвртина, преку Лука Стојановски намалија на 27-22, но следеше одговор на Приевидза и брзо водство на домаќинот од 39-25. Словаците пред крајот на полувремето имаа и водство од 20 поени (49-29), но Пелистер преку Стајиќ и Крстевски намали на 49-33.
Преостанатите 20 минути од овој натпревар минаа во лесна контрола над играта и резултатот од страна на домашните кошаркари, кои на крајот на третата четвртина имаа предност од 74-55, за на крајот да триумфираат со конечните 97-82, и тоа по четирите поени што во завршните секунди од мечот ги постигна Дамјан Крстевски.
Кевин Брејси Дејвис ги предводеше стрелците на Пелистер со 19 поени, пред Крстевски со 16, Малешевиќ со 15 поени, додека Си-Џеј Вилсон го заврши мечот со 13 поени, осум скока и четири асистенции.
Лавовски победен унгарскиот џин: Еурофарм Пелистер го сруши ПИК Сегед
Македонскиот шампион Еурофарм Пелистер извојува огромна победа во Лигата на шампионите. Во дуелот кој ЕХФ го окарактеризира како меч на неделата, го победи ПИК Сегед во Битола со 25-24 (11-8). Во драматичната завршница на дуелот во преполната сала „Боро Чурлевски“ тимот на Рубен Гарабаја стигна до втората победа сезонава.
Еурофарм Пелистер со одлична поддршка на своите фанови во Битола имаше предност од 11-8 на полувреме, но унгарскиот ривал не дозволи поголема негатива, туку ја врати неизвесноста, па дури на моменти имаше и предност.
ПИК Сегед два пати поведе со +2, последен пат имаше предност на 19-20, потоа се играше гол за гол. Еурофарм Пелистер направи мини серија со два гола по ред во завршните моменти за конечна победа. Македонскиот тим избори пенал кој беше реализиран од Радивојевиќ, а иако гостите имаа напад во последните неколку секунди, не успеаја да го совладаат Митревски и започна битолското славје,.
Пешевски со 7 и Кузмановски со 4 голови беа најефикасни во редовите на Еурофарм Пелистер, додека Гарсијандиа со 6 погодоци ги предводеше гостите.
Ракомет
Лига на шампионите 2025/26
Б група – седмо коло
Еурофарм Пелистер – ПИК Сегед 25-24 (11-8)
Спортска сала „Боро Чурлевски“ – Битола
Гледачи: 3.500
Судии:
Истите екипи играат во осмото коло, но сега на теренот на унгарскиот претставник во Сегедин.
Туансебе го тужи Јунајтед за небрежност при лекување на повреда
Поранешниот играч на Манчестер Јунајтед, Аксел Туанзебе, го тужи клубот за 1 милион фунти (1.300.000 евра) поради наводна „клиничка небрежност“ во третманот на повреда на грбот, тврдејќи дека таа му предизвикала „сериозни“ и долгорочни проблеми.
Туанзебе, кој поминал низ познатата фудбалска академија на клубот, ја поднесе тужбата во Високиот суд уште во јули, а сега се откриени клучни детали од случајот.
Главната поента на тужбата се однесува на стрес фрактура на долниот дел од ‘рбетот (фрактура на pars interarticularis) што ја претрпел во јануари 2020 година. Судските документи наведуваат дека повредата му предизвикала на играчот „значителна болка и непријатност од нејзиниот развој и влошување“.
Проблемот, се тврди, станал хроничен во јули 2022 година, кога Туанзебе ја претрпел истата повреда, но на десната страна од долниот дел од ‘рбетот. Во тужбата се наведува дека соодветен третман веројатно би спречил подоцнежни компликации.
„Соодветните планови за лекување веројатно би резултирале со тоа што тужителот би ја избегнал болката и непријатноста наведени подолу и би му овозможиле да игра професионален фудбал на елитно ниво без ограничувања или пречки“, се наведува во документите.
Лапорта одби секаква можност за враќање на Меси
Претседателот на фудбалскиот клуб Барселона, Жоан Лапорта истакна дека шпекулациите за враќање на аргентинската ѕвезда Лионел Меси на „Ноу Камп“ се нереални.
Запрашан за изненадувачката посета на Меси на реновираниот „Камп Ноу“, Лапорта рече дека сака да организира настан во чест на легендарниот фудбалер, но и навивачите на Барселона да не се надеваат на враќање на својот идол.
„Работите не завршија онака како што сакавме. Ако на некој начин оваа почит можеше да го надомести она што не беше направено, верувам дека тоа би било добро. Но, со огромното почитување што го имам кон Меси, кон сите професионалци во клубот и неговите членови, верувам дека шпекулациите за неговото можно враќање како играч се нереални“, рече Лапорта.
