Роман Абрамович додека ја чека продажбата на Челзи е во потрага по нов клуб. Абрамович мораше да го напушти Челзи поради случувањата во Украина и инвазијата на Русија, но сака да остане во фудбалот.

Шпанските медиуми пренесуваат дека Абрамович сериозно размислува да испрати понуда за купување на Валенсија.

Абрамович планира од продажбата на Челзи да добие скоро 5 милијарди евра, а дел од тие средства сака да ги насочи за купување на клубот од „Местаља“.

Валенсија е во лоша финансиска ситуација и нема големи спортски успеси во последно време, па со доаѓањето на Абрамович тоа може да се промени.

„Сопственикот Петер Лим неколку пати се обиде да го продаде клубот. Се чини дека сега има понуда од Абрамович“, изјави еминентен шпански новинар.

Калчомеркато пишува дека Интер ќе го продолжи договорот со тренерот Симоне Инзаги.

Новиот договор на 45-годишниот Италијанец ќе трае до крајот на 2024 со опција за продолжување на уште една година, а неговата плата ќе изнесува 5 милиони евра годишно, без бонуси.

Актуелниот договор на Инзаги е до крајот на следната сезона, според кој добива 4,5 милиони евра. Интер продолжува со борбата за титулата во Серија А, и во моментот е на втората позиција од табелата, два бода зад лидерот Милан, но и еден натпревар помалку.

Белгискиот репрезентативец од екипата на Лестер, Јури Тилеманс е една од можните трансфер цели на Реал Мадрид за следната сезона. Како што објави „Марка“, фудбалерот има еден куп понуди за продолжување на кариерата, па останува неизвесно кој ќе го убеди ова лето да се пресели во нивните редови.

Освен Реал, за услугите на Белгиецот е заинтересиран и Манчестер Ј, а претходно се појавија информации за интерес и од уште еден куп други тимови. Мрежата CBS објави дека белгискиот играч за врска има понуди и од Ливерпул, Вест Хем Јунајтед, Арсенал, па дури и од Јувентус.

Екипите на Манчестер Јунајтед, Челзи и Париз Сен Жермен се главните фаворити за потписот на Дарвин Нуњес од Бенфика. 22-годишниот напаѓач со своите одлични игри оваа сезона го привлече вниманието на европските гиганти.

Според медиумите во Англија, Уругваецот ќе биде еден од најголемите трансфери ова лето. Големите европски тимови ја скаутираат ѕвездата на Бенфика, а како најзаинтересирани се споменуваат Манчестер Јунајтед, Челзи и ПСЖ. Вредноста на играчот се очекува да биде околу 58 милиони фунти. Неговиот договор со клубот од Лисабон  е до летото 2025 година.

Нуњес оваа сезона има скор од 31 гол во сите натпреварувања за Бенфика.

Најдобриот фудбалер на Баерн Минхен, Роберт Левандовски, ќе ги напушти Баварците на крајот на сезоната. Полскиот репрезентативец планира да си замине од „Алијанц Арена“ и да потпише за Барселона.

Според дел од медиумите во неговата татковина, трансферот ќе биде околу 60 милиони евра а неговиот договор ќе биде за три сезони со плата од 8 милиони евра плус бонуси.

Левандовски кој го облече дресот на Баерн во 2014 година, досега има одиграно 369 мечеви и постигнато 340 гола.

Челзи планира ова лето да се раздели со тројца играчи. Тимо Вернер, Кепа Аризабалага и Рос Баркли не се повеќе во плановите за следната сезона и клубот од „Стемфорд Бриџ“ е подготвен да слушне понуди за нив. Поради неизвесноста околу сопственоста на клубот, клубот бара начини како да соберат средства за нови засилувања.

 Германецот Тимо Вернер е најголемото разочарување за Челзи. Тој постигна само три гола на 16 натпревари во Премиер лигата. Кепа, кој е еден од најскапите голмани на светот, е само резерва на Менди, а зема огромна плата. Баркли исто така не успеа да се докаже во Челзи и неговата евентуална продажба може само да донесе финансиска добивка за клубот.

Тренерот на Милан, Стефано Пиоли по синоќешниот меч со Торино синоќа, даде свое видување на трката за скудетото.

„Во последните две-три недели се сопнуваат сите оние кои важат за фаворити. Имаме многу конкурентна лига, сите натпревари се тешки, никогаш не можете да размислувате однапред и не можете никого да го сметате за сигурно добиен. Сите знаеме колку се важни овие натпревари. Колку е поблиску крајот на сезоната, толку е поважен секој бод. Не заборавајте дека пред три недели бевме супер фаворити, по нас Наполи, па Интер. Крајот е близу, ништо не се знае“, рече Пиоли.