Патрик Виеира е главниот кандидат за нов тренер на фудбалскиот состав Лион, пренесуваат дел од медиумите во Франција. Други кандидати за таа позиција се: Кристоф Галтиер од Лил, Роберто Де Зерби од Сасуоло и Марсело Гаљардо од Ривер Плата. Договорот на сегашниот тренер на „лавовите“, Руди Гарсија, ќе истече во текот на летото и нема да му биде обновен. Лион е трет на табелата во Лига 1 и на две кола пред крајот заостанува 6 бодови во однос на лидерот Лил. Виеира кој е светскиот шампион со Франција од 1998 година, последен пат седеше на кормилото на Ница во Лига 1, но, беше ослободен од обврските во декември во изминатата година.

Атлетико Мадрид и Јувентус се силно заинтересиран за играчот за врска на Наполи, Фабиан Руиз. 25-годишниот Шпанец пристигна во Наполи од Бетис и веднаш се промовираше во клучен играч во тимот, па заработи и место во шпанската репрезентација. Поради финансиски проблеми Наполи на лето е спремен да ги разгледа понудите за Фабиан Руиз, а најсилен интерес покажуваат Јувентус и Атлетико Мадрид. Симеоне смета дека Шпанецот ќе биде идеално засилување за средниот ред и е спремен за неговиот потпис да понуди 50 милиони евра.

Џејдон Санчо е се поблиску до враќање во Премиерлигата, а репрезентативецот на Англија не ја крие желбата дека е можно враќање „дома“.
Според информациите, два клуба се во игра за неговиот потпис, цената на која инсистира Борусија Дортмунд полека се намалува, од 105 милиони фунти, веќе на двоцифрена бројка од околу 80 милиони, а на ова реагираа два клуба, Ливерпул и Манчестер Јунајтед.
Досега евентуалниот трансфер на Санчо во Англија стана вистинска „сапуница“, но сега работите стануваат сериозни.

Хари Кејн побарал од сопственикот на Тотенхем Даниел Леви да ги разгледа понудите кои доаѓаат за негов трансфер ова лето.
Напаѓачот на Тотенхем не е задоволен од резултатите на екипата. По поразот од Лидс, Лигата на шампионите е речиси невозможна мисија, а тој сака следната сезона да игра во елитата на УЕФА.
Кејн бара трансфер под нормални околности, Јунајтед има понуда на 90 милиони фунти, тој веќе нема трпение.
Англиските медиуми пишуваат дека 27-годишниот напаѓач бара да бидат разгледани сите опции, а сугерираат дека Кејн е најблиску до трансфер во Јунајтед.

Жозе Мурињо веќе го избра играчот што го посакува за нападот на тимот од новата сезона, кога и официјално ќе ја превземе работата на клупата на римската „волчица“. Според „Кориере дело Спорт“, Мурињо сака во својот состав да го има напаѓачот на Торино, Андреа Белоти. Во Белоти тој гледа совршен човек за нападот на Рома, а како менаџер на Тотенхем веќе се обиде да го привлече во Лондон. Договорот на Белоти со Торино истекува во јуни 2022 година и иако има клаузула за ослободување од 100 милиони евра, таа важи само за потенцијалните купувачи надвор од Италија, а неговата цена е далеку под таа вредност и трансфермаркт во моментов ја проценува на 40 милиони евра. Оваа сезона, 27-годишниот напаѓач има 12 голови и 7 асистенции на 31 натпревар во Серија А.

Фудбалската федерација на Македонија го објави официјалниот спот на навивачката химна „Одиме на Европско“ која е во изведба на групата ВИС Рисови.
Официјално, промовиран е видео запис за навивачката химна посветена на македонската фудбалска репрезентација за претстојното Европско првенство во фудбал што ќе се одржи во текот на летото.
Македонската фудбалска репрезентација годинава за прв пат ќе настапи на едно големо натпреварување.