Шпанија триумфално заврши уште еден квалификациски циклус за пласман на Светското првенство.

Актуелните европски шампиони, рутински ја поминаа групата каде што беа и Турција, Грузија и Бугарија, примија само два гола и постигнаа најмалку еден гол на секој натпревар, вкупно 21 постигнати.

Она што вреди да се напомене е дека тие продолжија да рушат рекорди во квалификациите за Светското првенство.

Еве ги рекордите:

Тие се во серија од 49 натпревари во кои постигнале барем еден гол во квалификациите, што е светски рекорд.

Тие го израмнија европскиот рекорд по бројот на натпревари во кои не се поразени (25 победи и 6 нерешени), сега се на котата 31 заедно со Италијанците (серија од 2018 до 2021 година). Светскиот рекорд го држи Бразил со 33 последователни натпревари.

Шпанија е единствената репрезентација која никогаш не изгубила натпревар дома во квалификациите за Светското првенство, тие имаат 54 победи и 10 нерешени.

Шеснаесет репрезентации меѓу кои и Македонија, денеска ќе се најдат во садовите од каде ќе се одредуваат двојките за плеј-оф натпреварите за пласман на Светското првенство во 2026 година. 12 второпласирани селекции од групната фаза на квалификациите плус четири репрезентации кои се квалификуваа преку Лигата на нации на УЕФА ќе ги добијат своите ривали во плеј-оф полуфиналето, но и можните ривали за финалниот бараж меч кој ќе води на Мундијалот.

Потврдени во плеј-офот како второпласирани од квалификациите во Европа се:

Албанија, Босна и Херцеговина, Чешка, Данска, Италија, Косово, Полска, Република Ирска, Словачка, Турција, Украина, Велс, додека четирите селекции кои преку Лигата на нации дојдоа до баражите се: Македонија, С. Ирска, Романија и Шведска.

Според рејтиногот познати се и четирите шешири од кои ќе се одредуваат двојките за полуфиналните дуели. Македонија е во четвртиот шешир и ќе очекува за противник една од селекциите во првиот шешир.

Шешир 1: Италија, Данска, Турција, Украина
Шешир 2: Полска, Велс, Чешка, Словачка
Шешир 3: Ирска, Албанија, БиХ, Косово
Шешир 4: Романија, Шведска, Македонија, Северна Ирска

Ждрепката за баражот за СП 2026 е закажана на 20 ноември, со почеток од 13:00 часот.

По убедливиот пораз од Велс во последното коло од квалификациите за СП 2026 со 7-1, шпекулациите околу селекторското место во националниот тим полека добиваат интензитет. Се погласно се зборува дека во Фудбалската федерација на Македонија размислуваат за ново селекторско име кое ќе го замени досегашниот предводник Благоја Милевски, чиј договор заврши со последниот меч во Кардиф.

За позицијата ќе се разговара на следната седница на управниот одбор на федерацијата која ќе се одржи најверојатно веќе следната недела.

Милевски денес ќе биде во Цирих на ждрепката за одредување на двојките за баражите, а таму ќе бидат и првиот човек на ФФМ, Масар Омерагиќ заедно со Горан Пандев и Николче Новески. Останува да мине ждрепката денеска, да ја чекаме дефинитивната одлука за позицијата на Милевски на кормилото на репрезентацијата.

На церемонијата за доделување на африканските награди за 2025 година, фудбалерот на Пари Сен-Жермен и репрезентативец на Мароко, Ашраф Хакими, ја освои најпрестижната африканска награда. Ова е првпат од 1998 година марокански фудбалер да го добие ова признание. Хакими имаше одлична сезона, освојувајќи ги сите главни трофеи на клупско ниво, вклучувајќи ја Лигата на шампионите, француската лига и двата доместични купови. Во текот на годината, постигна 9 голови и 12 асистенции во 48 натпревари, што е извонредна бројка за десен бек. Неговите перформанси го донесоа и до финалето за глобалната Златна топка, каде што заврши на шесто место.

Хакими, кој е и капитен на мароканската репрезентација, изрази голема гордост за освоената награда: „Многу сум горд што сум Африканец и што ја претставувам мароканската нација. Овој трофеј не е само за мене, туку и за секој млад африкански фудбалер што сонува да успее“, изјави Хакими. Тој ја нагласи важноста на оваа награда како благодарност за сите кои верувале во него од неговите почетоци, признавајќи ја поддршката од неговото семејство, клубот и нацијата, како и за напорите на африканските фудбалери во светски рамки.

Иако Мароканецот беше награден, многу фанови веруваат дека наградата требаше да ја освој Мо Салах. Напаѓачот на Ливерпул, кој ја водеше својата екипа до титула во Премиер лигата, имаше феноменална сезона, постигнувајќи 34 голови и додавајќи 23 асистенции, само во лигата. Беше сметан за фаворит за наградата, а неговото исклучување предизвика жестоки реакции меѓу некои фудбалските навивачи, кои сметаат дека заслужуваше да биде награден.

Во КОНКАКАФ зоната синоќа завршија квалификациите за Светското првенство во 2026 година. Така, одредени се сите тимови што учествуваат во меѓуконтиненталните плејоф натпревари.

Репрезентации носители ќе бидат: Ирак (Азија) и ДР Конго (Африка). Неносители ќе бидат Јамајка и Суринам (двете КОНКАКАФ), Боливија (Јужна Америка) и Нова Каледонија (ОФЦ).

Репрезентациите ќе се натпреваруваат за две места на Светското првенство на крајот на март следната година.

Ирак и ДР Конго ќе играат против победниците од двојките што ќе бидат одредени со ждрепка за репрезентациите неносители. Извлекувањето ќе се одржи утре.

Светското првенство во 2026 година ќе се одржи во Канада, САД и Мексико. За прв пат на еден фудбалски Мундијал ќе учествуваат 48 репрезентации.

Фудбалската репрезентација на Јамајка, пласман на Мундијалот ќе се обиде да избори преку интерконтинеталниот бараж. Во последното коло, Јамајка на домашен терен против Курасао не успеа да ја обезбеди победа и пласман на СП. Натпреварот во Кингстон заврши без голови и му овозможи на Курасао да се пласира на Мундијалот наредното лето.

И покрај тоа што Јамајка се уште има шанси да се квалификува за Светското првенство преку Интерконтиненталниот бараж, селекторот реши да поднесе оставка.

Веднаш по натпреварот против Курасао, Стив Мекларен поднесе оставка од функцијата.

„Подобро да си одам“, го започна своето обраќање Мекларен и продолжи:

„Во текот на изминатите 18 месеци се посветив на оваа работа. Водењето на овој тим беше една од најголемите почести во мојата кариера.“

Потоа зборуваше за оставката.

„По длабоко размислување и искрена проценка каде сме и каде треба да одиме, решив да се повлечам од функцијата главен тренер на репрезентација на Јамајка“, рече искусниот тренер и додаде:

„Понекогаш најдоброто нешто што еден лидер може да го направи е да препознае кога е потребен свеж глас, нова енергија и поинаква перспектива за да се движи овој тим напред“.

Што се однесува до Интерконтиненталниот бараж, познати се шесте репрезентации, кои ќе се борат за двете последни места на СП.

Од Азија е Ирак, од Африка ДР Конго, од Океанија Нова Каледонија, од Јужна Америка Боливија, а од Северна и Централна Америка Јамајка и Суринам.

Едер Милитао, 27-годишен бразилски фудбалер и одбранбен играч на Реал Мадрид, повторно се повреди, овој пат на пријателскиот натпревар против Тунис.

На натпреварот одигран во Франција, кој заврши без победник 1:1, Едер Милитао заработи повреда на аддукторскиот мускул и беше принуден да го напушти теренот по еден час игра.

Засега нема официјални информации од Реал за тоа колкава пауза го чека Бразилецот, а шпанските медиуми наведуваат дека, во најдобар случај, ќе биде надвор од теренот две, а во најлош случај, шест недели.

Самата повреда не треба премногу да ги загрижува челниците на Реал, туку фактот дека Милитао ја продолжи серијата повреди со кои се соочува во последните две години.

Едер Милитао пристигна во Реал од Порто во 2019 година, но во последните сезони почесто е на листата на повредени отколку на теренот.

Во последните две години, Едер Милитао двапати заработи сериозна повреда на коленото, а од август 2023 година, поради повреди пропушти повеќе од 200 дена. Милитао е многу важен во играта на Реал бидејќи уште еден искусен дефанзивец, Антонио Ридигер, е повреден и надвор од игра, а проблеми има и Дин Хаусен.