Новата сезона во Првата македонска фудбалска лига (ПМФЛ) стартува на 8 август, а уште во првото коло нè очекува фудбалски класик, Вардар и Пелистер ќе ги одмерат силите во дербито на вечните ривали.

Натпреварот е закажан за петок, со почеток од 20:00 часот на Националната арена „Тодор Проески“ во Скопје, а црвено-црните веќе ги пуштија билетите во продажба. Љубителите на фудбалот можат да ги набават преку платформата „МкТикетс“ по цена од 300 денари.

Скопје ќе биде центарот на вниманието кога двата најголеми македонски ривали ќе излезат на теренот, во пресрет на новата фудбалска возбудувачка сезона.

Крилниот фудбалер на Реал Мадрид, Родриго, може да се пресели во Тотенхем, објави АС.

Според шпанскиот спортски портал тимот од Лондон е блиску до потпишување на 24-годишниот Бразилец откако Сон Хјунг-мин го напушти клубот.

Порано беше објавено дека Ливерпул, Арсенал, Челзи и Баерн се заинтересирани за Родриго. Мадридскиот клуб бара најмалку 100 милиони евра.

Во сезоната 2024/25, Родриго играше на 54 натпревари во сите натпреварувања, постигна 14 гола и направи 11 асистенции.

Бундеслигашот Баер Леверкузен и напаѓачот на оваа екипа Патрик Шик ја продолжија нивната соработка.

Чешкиот репрезентативен напаѓач потпиша нов договор со клубот до 2030 година. Претходниот договор на Патрик Шик со Баер Леверкузен беше важечки до 2027 година.

Минатата сезона, Шик постигна 21 гол на 31 натпревар во Бундеслигата, станувајќи втор најдобар стрелец во првенството.

Новиот напаѓач на Барселона, Маркус Рашфорд, постигна еден од головите во победата на Каталонците од 5-0 над Даегу во Даегу.

Тоа беше и крајот на азиската турнеја за Барселона, која ќе игра во Купот Жоан Гампер на 10 август против италијанскиот тим Комо, а на 16-ти овој месец ја отвораат сезоната во Ла Лига со гостување против Мајорка.

Екипата на Ханзи Флик го отвори резултатот во 21-та минута преку Гави, кој доби асистенција од Ламин Јамал и ја упати топката во десниот агол од голот од работ на шеснаесетникот.

Само шест минути подоцна, Роберт Левандовски го зголеми водството на Шпанците.

Во продолжението од првото полувреме, Гави го постигна својот втор гол на натпреварот, по додавање од Жил Кунде.

На полувремето, Ханзи Флик го смени целиот тим, а во 55-тата минута, 17-годишниот Тони Фернандес го зголеми резултатот на 4:0 по убава комбинација помеѓу Дени Олми и Маркус Рашфорд.

Во 65-тата минута, англискиот интернационалец Рашфорд го постигна својот прв гол за новиот тим, примајќи ја топката од Ерик Гарсија.

Манчестер Сити постигна принципиелен договор со Рубен Диаш за продолжување на неговиот тековен договор.

28-годишниот португалски репрезентативец има договор до 2027 година, но клубот и играчот се согласија за нов договор што ќе го задржи на „Етихад“ уште подолго.

Диаш му се придружи на Манчестер Сити во 2020 година од Бенфика за 62 милиони фунти и се етаблираше како клучна фигура во одбраната на тимот. Во овој период, тој освои четири титули во Премиер лигата, Лигата на шампионите, ФА Купот, Лига Купот, Светското клупско првенство и Суперкупот на УЕФА.

Диаш одигра 44 натпревари во сите натпреварувања минатата сезона, а сега има 222 настапи за „Граѓаните“, постигнувајќи четири гола.

По осум години, Адријано Галијани повторно ќе работи во Милан. Емотивното враќање на легендарниот фудбалски директор е во завршна фаза, а „росонерите“ повторно го добиваат човекот кој остави длабока трага во клупската историја.

Галијани ја напушта функцијата во Монца и се враќа во клубот каде што испиша незаборавни страници работејќи во ерата на Силвио Берлускони, овојпат во улога на советник. Кам-бекот стана реалност благодарение на иницијативата на Џери Кардинале и Златан Ибрахимовиќ, кои посакувале токму тој да биде дел од новата ера на Милан.

По заминувањето на Паоло Малдини од редовите на Милан навивачите беа бесни, а овој потег на управата може да ги направи позадоволни по катастрофалната сезона.

Михаило Мудрик дојде како огромно засилување за Челси, но не само што не го оправда тоа туку беше позитивен и на допинг за кој доби суспензија која може да трае и четири години.

Мудрик уште е во Челси, но сега има поинаква улога. Според англиските медиуми тој станал личен тренер на неколку фудбалери.

Украинецот бил задолжен за работа со Ромео Лавиа, Марк Кукурења и новиот фудбалер Џејми Гитенс.

Сите тие работат со Мудрик на дневна основа, а кон тренинзите на оваа група треба да им се приклучи и Естевао.

27-годишниот играч од средниот ред на Милан, Исмаел Бенасер, кој не е во плановите на Алегри за следната сезона, најави заминување.

Тој ја помина втората половина од минатата сезона во дресот на Олимпик Марсеј, а најверојатно и во првата половина од новата сезона ќе оди на позајмица. Сега неименувани руски и турски клубови се распрашуваат за играчот да го добијат на позајмица со можност за откуп на договорот. Исто така Милан се обидува да го вклучи Бенасер и во некоја можна зделка за купување или размена на фудбалери.

Интер Мајами потврди дека Лионел Меси избегнал сериозна повреда.

Напаѓачот на составот од Флорида беше заменет на почетокот од натпреварот од 2. коло од Лига купот со Некакса (2:2, 5:4 на пенали) поради повреда на тетивата.

„Резултатите од прегледот потврдија лесна повреда на мускулите на десната нога. Враќањето во акција ќе зависи од клиничката состојба и ефикасноста на третманот“, се вели во соопштението на клубот.