Ѕвездата на Вулверхемптон, Матеус Куња, најави дека ќе го напушти клубот на лето. Бразилецот призна дека имал можност за тоа уште во јануари, но не го направил овој чекор за да му помогне на својот тим во борбата за опстанок во Премиер лигата.

Моментално „волците“ се веднаш над зоната за испаѓање со освоени 26 бода.

„Имав многу понуди во јануари, но немаше да се чувствувам добро да си заминам. Некои работи се надвор од твоја контрола, но немаше шанси да го напуштам клубот на средината на сезоната, во тешка ситуација во зоната за испаѓање. Сега кога сме блиску до остварување на нашата цел, јасно ми е дека треба да го направам следниот чекор во кариерата“ изјави Куња.

Интерес за услугите на Бразилецот имаше и од лидерите во Премиер лигата, Ливерпул и Арсенал.

Антони игра како препороден откако од Манчестер јунајтед се пресели во Бетис, вчера имаше уште една одлична партија.

Бразилецот го одигра целиот меч од градското дерби меѓу Бетис и Севиља кој го доби неговиот тим со 2-1.

По мечот стигнаа пофалби за Антони од Иско кој вели дека треба да се обидат да најдат начин како да го откупат.

„Сега ќе ни биде потребно да отвориме сметка за донации за да го откупиме Антони“, рече Иско.

Иако Антони беше разочарување во Манчестер јунајтед, не се очекува дека англискиот клуб лесно ќе го продаде, особено по неговите одлични перформанси во Бетис.

Премиерлигашки екипи покажуваат интерес за голманот на Милан, Мајк Мењан, објави порталот „Todofichajes“. Два премиерлигашки клуба заинтересирани за голманот Мењан. Според изворот, Челзи и Астон вила сакаат да го донесат во своите редови 29-годишниот голман.

Мењан игра за Милан од 2021 година. Сезонава голманот одигра 41 натпревар на сите турнири, прими 47 гола и 11 пати ја зачува мрежата чиста.

Неговиот договор со италијанскиот тим е до летото 2026.

По 29 кола во Премиер лигата, Челзи е на четвртото место во поредокот со 49 бодови, додека Астон вила е на деветтото место со 45 бода.

Објавени се полуфиналните двојки од англискиот фудбалски ФА Купот 2024/25. Полуфинални парови во ФА Купот:

Нотингем Форест – Манчестер Сити
Кристал Палас – Астон Вила.

Полуфиналните натпревари ќе се одиграат на стадионот „Вембли“ во Лондон на 26 и 27 април.

Англискиот премерлигаш Челзи покажува сериозен интерес за крилниот напаѓач на Милан, Рафаел Леао.

Португалскиот репрезентативец е означен како главна цел на лондонскиот клуб за летниот преоден рок и речиси сигурно ќе испрати понуда за него, пренесува „Калчомеркато“.

Во договорот на 25-годишниот играч со Росонерите има откупна клаузула од 175 милиони евра. Сепак, се тврди дека раководството на Милан би било подготвено да го пушти и за околу 100 милиони евра ова лето.

Фудбалерите на Бетис на домашен терен ја совладаа Севилја со 2-1 во 29. коло. Бетис по пауза од шест и пол години успеа да го победи градскиот ривал и да остане во трката за место во Лигата на шампионите.

Дербито „Севилјано“ или „Гранд дерби“ како што го нарекуваат Шпанците ги оправда очекувањата на фудбалските фанови, не само поради резултатот, туку и поради интензитетот на играта во текот на целиот натпревар и многуте тешки и бескомпромисни дуели.

Овој пат како победник излезе домашната екипа која славеше по пресвртот што се случи во првите 45 минути.

„Зелените“ имаа значително поголем посед на топка од самиот почеток на мечот, но прва погоди Севилја.

Се играше 17. минута кога Рубен Варгас налета на додавање на Лукебакио и со силен удар ја погоди мрежата на Адријан.

Радоста на гостинските навивачи траеше само осум минути, колку што му требаше на Џони Кардосо да ја заврши убавата тимска акција по левата страна со ефектен гол.