Спортскиот директор на Барселона, Деко, ја негира идејата дека клубот сериозно се обидел да го донесе крилниот напаѓач на Атлетик Билбао, Нико Вилијамс, нагласувајќи дека Каталонците никогаш не биле активни во таа трка. 

Како што објасни Деко, токму агентот на Вилијамс бил тој што постојано нудел зделки на Барселона, а не обратно. Иако клубот го признава квалитетот и талентот на играчот, тој наводно не се вклопувал во профилот што Барса го барала. 

Преговорите пропаднале поради, како што рече Деко, нереални барања од страна на играчот. Тој потенцираше дека Барселона нема да дозволи играчи или нивни агенти да поставуваат услови,  клубот самиот ги диктира своите термини. 

Деко не го поштеди ни Атлетик Билбао, обвинувајќи ги за неконзистентен и несериозен пристап кон преговорите, особено поради промената на условите откако веќе биле започнати разговорите. 

Зделката пропаднала уште пред да се постави прашањето за регистрација, а Вилијамс во меѓувреме потпиша долгорочен договор со Атлетик Билбао до 2035 година. 

Барселона веќе ја затвори страницата, нагласувајќи дека никогаш не била целосно заинтересирана за трансферот на Вилијамс. 

Челси цврсто застанува зад тренерот Ензо Мареска и покрај падот во формата, со јасна порака дека каква било проценка за неговата работа ќе се прави дури на крајот од сезоната. 

Сините се соочија со 5 порази во изминатите шест месеци, 4 од нив во натпревари каде што црвени картони го нарушија текот на играта. Управата на клубот внимателно ги разгледува овие околности како дел од пошироката стратегија за долгорочна проценка на Мареска. 

Мареска останува позитивен и се обидува да внесе оптимизам меѓу играчите, со цел да се зачува тимскиот дух и нивото на настапите. Од клубот порачуваат дека фокусот е ставен на развојот и потенцијалот, а не на моменталните резултати. 

Јавното изразување поддршка за Мареска е дел од стратегијата за стабилност и верба во неговата визија, дури и во време кога тимот минува низ „тежок“ период. 

Барселона ја обезбеди иднината на еден од најголемите таленти од Ла Масиа, Марк Бернал, потпишувајќи нов договор до јуни 2029 година. Впечатливата откупна клаузула од 500 милиони евра е јасен сигнал за вербата што клубот ја има во младиот играч од средниот ред. 

Договорот доаѓа во важен момент за Бернал, кој претрпе сериозна повреда на лигаментите во август 2024 година. По повеќе од една година рехабилитација, тој се врати на теренот овај месец и веќе има позитивно влијание во тимот, иако тренерите внимателно го враќаат во ритам. 

Во клубот го гледаат како природен наследник на Серхио Бускетс, со верување дека неговиот врвен потенцијал допрва ќе се покаже. Очекувањата се високи, а со враќањето на самодовербата и кондицијата, Бернал е подготвен за поголема улога во тимот. 

Новиот договор е исполнување на сон за Бернал, кој изрази големо задоволство и желба да продолжи да освојува трофеи со Барселона. Со поглед кон иднина полна со успеси, неговата амбиција е јасна, да остави длабока трага во дресот на Барса. 

Членот на Надзорниот одбор на Баерн Минхен, Карл-Хајнц Румениге, ги нарече шефовите на Њукасл идиоти откако се согласија да платат 85 милиони евра за да го доведат Ник Валтемаде од Штутгарт.

Баерн се обиде да го доведе Волтемаде неколку пати ова лето и испрати неколку понуди, последната од околу 60.000.000 евра, но Штутгарт одби да го продаде својот играч за помалку од 75.000.000 евра.

Кога се чинеше дека 23-годишниот фудбалер ќе остане во Германија, Њукасл се согласи да плати 85.000.000 евра и бонуси.

„Можам само да му честитам на Штутгарт што најде, така да се каже, идиот кој би платил толку многу пари, бидејќи ние сигурно немаше да го сториме тоа. Реков: „Дојдовме до точка каде што тоа повеќе не е прифатливо. Не треба да ги исполнуваме сите нивни барања“, изјави Румениге за германските медиуми, како што објави фудбалскиот портал „Гол“.

Тој додаде дека трансферот покажал колку далеку стигнала Премиер лигата финансиски, оставајќи ги клубовите од Бундеслигата немоќни да се справат со нивната потрошувачка моќ.

Легендата на германскиот фудбал ги обвини играчите и нивните менаџери за воведување промена во динамиката на трансфери.

„Играчите и нивните агенти мора да бидат внимателни да не паднат во сопствената стапица. Парите мора да дојдат од некаде, а тоа доаѓа од проширување на натпреварувањата или започнување нови“, рече Румениге.

Баерн понуди 100.000.000 евра за напаѓачот на Баер, Флоријан Вирц ова лето, но клубот од Леверкузен ја отфрли понудата и прифати 125.000.000 евра од Ливерпул, рекорден трансфер во британскиот фудбал.

Румениге рече дека овие трансфери покажуваат дека клубовите во сопственост на милијардери или држави го нарушуваат пазарот и изјави дека фудбалот не смее да биде единствената индустрија во светот што губи пари.

Тој рече дека е загрижен за Бундеслигата и дека клубовите и играчите треба да разговараат пред да биде предоцна.

Шведскиот клуб Мјалби обезбеди учество во европските натпреварувања во сезоната 2026/27. Прв пат во историјата клубот ќе игра во натпреварувањата во организацијата на УЕФА.

Ова е огромен успех за клубот што доаѓа од Халевик, село на југот на Шведска каде што, според последниот попис, живеат 1.485 луѓе.

Како што сега стојат работите, Мјалби ќе игра во Лигата на шампионите. Мјалби е на чекор до освојување на титулата во шведското првенство. На пет кола до крајот, тие имаат предност од 11 бода во однос на второпласираниот Хамарби, а вистинско чудо би требало да се случи Мјалби да не ја освои титула шведски шампион, по прв пат во историјата.

Во блиското минато, од 2015 до 2018 година, беше во третата лига. Потоа, во две последователни сезони, скокна за два ранга и сега игра во највисокиот ранг на шведскиот фудбал шеста година по ред. Во тој период, се пласираше од петтото до десеттото место.

Според „Трансфермаркт“, Мјалби е деветтиот највреден тим во шведското првенство. Вкупната вредност на играчите е 15,7 милиони евра.

Екипата на Калјари потврди дека напаѓачот, Андреа Белоти, кој имаше одличен старт на сезоната и постигна два гола, ќе мора да паузира подолг период поради повреда.

Вчерашните лекарски прегледи потврдиле дека Белоти има проблем со предниот вкрстен лигамент на коленото и дека ќе мора да оди на дополнителни консултации кај специјалисти.

Медиумите наведуваат дека таков тип на повреда се лекува околу 9 до максимум 12 месеци.

Луѓето од Наполи се обиделе да ги дознаат условите за евентуален ангажман на фудбалерот, Матеус Нуњеш, од Манчестер Сити, велат последните најави од Италија.

Португалецот пред две години беше купен од Вулверхемптон за повеќе од 60 милиони евра но, главно ја грееше клупата за резерви.

Според одредени наводи, „граѓаните“ се расположени да го продадат Нуњеш доколку добијат добра понуда.

Пелистер беше на чекор до реми и да се врати со еден бод од гостувањето кај водечкиот тим на табелата, но една деконцентрација во 85. минута донесе водечки гол на Струга Трим Лум, кој подоцна беше потврден и со втор погодок. Финалните 2-0 (0-0) се преголема казна за младиот тим од Битола, кој почна со Мрмачовски и Крстевски во стартниот тим и со формација 3-5-2 целосно ја неутрализира играта на домаќинот.

Струга Трим Лум се обиде да направи ран притисок, но Јовчевски со неколку сигурни интервенции успеа да го сочува својот гол. Подмладениот тим на битолчани успеа да парира на стартот од мечот трудејќи се да има поголем посед, па офанзивците на домаќинот предвидени од Компаоре, кои статистички се меѓу водечките во првенството, не добија шанса да се истакнат.

Во 21. минута домашните ја создадоа првата посериозна шанса, Компаоре беше проигран од Бојку, но биеше со глава над голот. Некои десет минути подоцна, капитенот Бунјамин Шабани се обиде самостојно да ја заврши работата, но откако продре до шеснаесетникот на Пелистер, шутираше покрај левиот дирек. Битолчани се обидуваа да организираат контра напади, но најчесто не стигаа да упатат шут, па дури на крајот од првиот дел ја забележаа првата изгледна шанса преку Стефан Спировски кој биеше покрај голот.

Иако судијата Стојанче Стојанов почитуваше предност во повеќе наврати, до крајот на првиот дел покажа два жолти за Крстевски и Ивановски, а во вториот дел уште четири пати се фати за џебот, но само еден картон од тие беше наменет за домаќините, поточно за Хамза во 55. минута.

И двата тренера направија измени во средината на вториот дел, при што Бленди Шкемби ги воведе во игра Воша, Зенку и Малески, додека во отсуство на Димитар Капинковски (селектор на репрезентацијата до 18 години) неговите помошници во истиот период им дадоа шанса на Ангелевски, Ристиќ и Петковски. Во финишот, очекувано овие фудбалери оставија најголем печат во случувањата на теренот, па токму Христијан Малески беше оној им се приклучи на Компаоре и Радески, а во 85. минута беше оној што успеа да ја затресе мрежата на Андреј Јовчевски.

Тоа „им ги скрати крилјата“ на битолчани кои се помирија со петтиот пораз во низа ова првенство, а воедно единаесетти по ред во меѓусените првенствени мечеви со Струга. Темпото на игра опадна, но сепак, на крајот, во судиското надополнување, односно 94. минута, Христијан Малески повторно се запиша во листата на стрелците и го постави конечниот резултат од 2:0.

Пелистер во следното коло ја пречекува Шкендија во Битола.