Тејлор Фриц денес го победи Џенсон Бруксби во полуфиналето во Токио. Мечот заврши во два сета, 6:4 и 6:3.
Фриц се пласираше во своето 19-то финале во кариерата и трето во тековната сезона.Воедно Фриц ќе го игра своето второ финале на АТП 500 во Токио.
Во 2022 година, Тејлор го освои турнирот, победувајќи го Франсес Тиафо со 7-6(3) и 7-6(2).
Петтиот тенисер во светот во финалето во јапонската престолнина ќе се соочи со Карлос Алкараз или Каспер Руд.
Бразилскиот фудбалер Нејмар и натаму е на списокот на повредени на неговиот тим Сантос. Честите повреди го оддалечуваат од теренот и тој никако не успева да фати ритам на натпревари годинава.
На почетокот на месецов (септември) го повреди бутниот мускул и се очекува да се врати на теренот на почетокот на ноември, односно пред крајот на шампионатот во Бразил.
Во текот на следниот месец Нејмар ќе биде на рехабилитација.
Инаку Нејмар во Сантос дојде во јануари годинава и досега има одиграно само 21 натпревар и постигнато шест голови. 33-годишниот фудбалер планира да се врати во репрезентацијата на Бразил и да настапи на Светското првенсто 2026 година. Но, повредите може да му ги нарушат плановите.
Претседателот на Палестинската фудбалска асоцијација, Џибрил Раџуб, ги повика денеска УЕФА и ФИФА да го исклучат Израел од меѓународните натпреварувања, предупредувајќи дека израелската армија убила 416 фудбалери и официјални фудбалски лица во последните две години, од кои една четвртина се деца.
„Фудбалот не може да остане неутрален пред геноцидот, етничкото чистење, дискриминацијата и континуираната окупација“, се вели во писмото испратено до европската и светската фудбалска федерација.
Шпанската новинска агенција ЕФЕ објави дека писмата се испратени и до сите членки на УЕФА, вклучително и до Фудбалската федерација на Македонија.
„Молчењето или одложувањето повеќе не се прифатливи“, напиша Раџуб. Светските медиуми пренесуваат дека Извршниот комитет на УЕФА ќе се состане следната недела за да разгледа евентуално исклучување на Израел од европските натпреварувања, откако Обединетите нации објавија дека Израел врши геноцид врз Палестинците.
Макаби Тел Авив в четврток треба да се сретне со загрепски Динамо во рамки на Лига на Европа, а натпреварот е предвидено да се игра во српскиот град Бачка Топола, каде израелскиот тим е регистриран за домаќин. Израелската страна, пак, наведе дека нема сознанија дека се соочува со исклучување.
„Немаме индикации дека се соочуваме со суспензија од УЕФА“, изјави за Ројтерс портпаролот на Израелската фудбалска федерација. Тој рече дека израелската репрезентација се подготвува нормално за претстојните натпревари со Норвешка и Италија во квалификациите за Светското првенство 2026.
Фудбалерот на Јувентус, Душан Влаховиќ, би можел да ја продолжи кариерата во Манчестер јунајтед.
Според „Газета“, англискиот клуб е заинтересиран да го потпише 25-годишниот Србин. Премиерлигашот сака да го донесе Влаховиќ во своите редови во јануарскиот преоден рок
Влаховиќ одигра шест натпревари оваа сезона, постигна четири гола и имаше една асистенција.
„Трансфермаркт“ ја проценува неговата вредност на 35 милиони евра.
Заврши дводневниот спортски настан – градски триатлон, информираа денес од општина Куманово.
Градот беше домаќин на дводневен спортски настан кој го реализираше со техничка поддршка на Триатлон федерацијата од Македонија. На спортската манифестација, која се одржува по петти пат во земјава, покрај македонските, учествуваа и спортисти од Србија, Косово, Бугарија, Хрватска и САД.
„Учествуваа натпреварувачи од сите категории, почнувајќи од деца, сениори, јуниори, мастерс и штафети, во женска и машка конкуренција. Градоначалникот на Општина Куманово, Максим Димитриевски, во присуство на претседателката и членови на Советот и претставници од општинската администрација, на најуспешните спортисти им додели награди и признанија за постигнатиот успех, истакнувајќи ја важноста на ширењето на спортскиот дух и начин на живот, за сите граѓани без оглед на нивната возраст“, информираа од општината.
Натпреварите во дисциплините пливање, велосипедизам и трчање се одржаа на градскиот базен, по булеварите „Октомвриска Револуција“, „Трета МУБ“ и на патеките околу спортско – рекреативниот комплекс.
МЗТ Скопје Аеродром има нов играч во својот состав за претстојната сезона. Станува збор за Американецот Мек Смит (27 години, 190 сантиметри), кој игра на бековската позиција и дресот на македонскиот шампион ќе треба да го носи една сезона.
Смит е добро познат и на македонската кошаркарска јавност бидејќи веќе има настапувано за екипите на ФМП Академија и Тиквеш. Кошаркарот ќе треба на екипата која вчера го одбрани Супер купот (совладан Кожув со 71:65) да ѝ се приклучи во текот на оваа недела да се стави на располагање на стручниот штаб за првиот дуел од домашното првенство против Маџари, како и за дуелот од АБА-2 лигата со Вршац.
Новиот играч ќе биде четвртиот американски кошаркар во составот на првакот, а меѓу другото познат е и по што е рекордер во рамки на НЦАА лигата. На 91 натпревар во серија има постигнато барем една „тројка“.
Натпреварот од седмото коло од шпанската Примера е одложен. Причината се лошите временски услови, а дуелот меѓу Валенсија и Овиедо е преместен за утре.
Дуелот требаше да се игра вечерва со почеток во 21 часот на стадионот „Местаља“, а новиот термин е утре во 20 часот. Информацијата ја објави клубот домаќин на своите социјални мрежи.
Инаку, минатата година во овој период регионот на Валенсија беше погоден од големо невреме со големи материјални штети, а бројката на загинати беше околу 200.
Барселона постигна гол во својот 44-ти натпревар по ред во сите натпреварувања, израмнувајќи го рекордот на тимот од 40-тите години на минатиот век. Претходниот рекорд ѝ припаѓаше на Барса под водство на Хуан Хозе Ногез, која од ноември 1942 до февруари 1944 година, исто така, постигна гол на 44 последователни натпревари.
Тековната серија на Каталонците започна на 21 декември 2024 година, со пораз од 2-1 на домашен терен од Атлетико Мадрид во 18-то коло од сезоната 2024/25 во Ла Лига.
Барселона моментално е лидер на табелата на шпанското првенство со 19 бода.
Реал Мадрид потврди дека сериозно не размислувале за продажба на Родриго во летото, и покрај интересот од врвните европски клубови. Бразилскиот репрезентативец помина низ тежок период на крајот од минатата сезона и призна дека се бори со формата и самодовербата пред да се раздели со Карло Анчелоти.
По поразот од 4:0 од ПСЖ во полуфиналето на Светското клупско првенство, иднината на Родриго беше предмет на многу шпекулации.
Според Фабрицио Романо, ПСЖ бил заинтересиран, а Баерн Минхен дури и дал понуда, која Реал Мадрид брзо ја отфрлил. Претставници од баварскиот клуб и агентот на Родриго биле испратени да разговараат за договорот, но одговорот од Реал Мадрид бил категоричен – никакви понуди нема да бидат разгледани.
Самиот Родриго бил отворен за понуди на почетокот на летото, но неговата позиција се променила на почетокот на септември. Досега, тој започнал само еден натпревар во Ла Лига и има четири настапи како замена, без да постигне гол.
Менаџерот на Манчестер Сити, Пеп Гвардиола вели дека самиот Родри му рекол дека има големи болки во истото колено каде што ги скина вкрстените лигаменти. Затоа тој и не играше овој викенд.
„Тој не играше на натпреварот против Барнли, и тоа беше по негова сопствена иницијатива“, вели менаџерот на Сити, Пеп Гвардиола.
„Родри рече уште на тренингот дека не може да игра, дека има многу болки во коленото“, дополни менаџерот на „граѓаните“.
Гвардиола не знае по натпреварот со Барнли какви се изгледите за повредата и дали Родри ќе може да настапи на мечот со Монако во ЛШ.
