Фудбачерот на Челси, Весли Фофана заработи уште една повреда. Стоперот на лондонските „сини“ беше надвор од терените речиси една година поради тешка повреда на коленото, а сега повторно се повреди.
Од Челси потврдија дека поради повредата на Фофана тој ќе мора да оди на операција и да паузира неколку недели. За него оваа сезона заврши, на теренот мина нешто повеќе од илјада минути.
Шкендија ја задржа предноста над Силекс од четири бода и по 26. коло во Првата македонска фудбалска лига. Двата тима победија како гости, Шкендија во Кавадарци, а Силекс во Охрид. Вардар во најава за Куп дуелот ја победи АП Брера во Струмица, Беса го совлада Гостивар и избега од опасната зона, а Шкупи и Работнички одиграа натпревар без голови.
Резултати, 26.коло:
АП Брера-Вардар 0-2
Тиквеш-Шкендија 0-1
Шкупи-Работнички 0-0
Воска спорт-Силекс 1-2
Беса-Гостивар 2-1
сабота:
Струга-Пелистер 4-1
Елиф Елмас го постигна третиот гол за Торино откако се пресели во овој тим од Лајпциг. Торино сепак не успеа да ја победи Верона во 31. коло, во Серија А.
Вистински ролеркостер се случи на стадионот во Торино во интервал од 62. до 67.минута.
Че Адамс промаши пенал во 62.минута и пропушти шанса да му донсе предност на торино. Две минути по промашениот пенал, Сар погоди за верона.
Радоста на гостите траеше само три минути кога Елмас го изедначи резултатот.
До крајот Торино остана со играч помалку на теренот. Во 86.минута црвен картон доби капитенот Самуеле Ричи.
Атлетико Мадрид излезе од мини кризата со триумфот на „Рамон Санчез Писхуан“ во Севилја. Во 30.коло, Атлетико ја победи Севилја со 1-2, со голот на Пабло Бариос во 93.минута.
Севилја поведе по само седум минути игра. Лусиен Агуме налета на една одбиена топка по корнерот на Лукебакио и од работ на шеснаесетникот ја испрати топката во десниот агол.
Во 23. минута Лоик Баде, капитенот на Севилај со несмасен старт над Конор Галагер, му подари пенал на Атлетико.
Хулијан Алварез беше прецизен од белата точка за 1-1. Аргентинецот го постигна 12 гол во Ла Лига, 24 во сите натпреварувања оваа сезона.
Севилја потоа пропушти неколку опасни ситуации, но Јан Облак не дозволи повотрно да биде совладан. Словенецот мечот го заврши со пет интервенции, една повеќе од колегата Ниланд.
Од 60.минута Атлетико целосно ја презеде контролата врз натшреварот. Криераа „хорганџиите“ неколку опасни ситуации, но резултатото остана 1-1, се до третата минута од судиското надополнување кога Пабло Бариос, одлично повлече во полу контра, си создаде чиста ситуација и од 18 метри со прецизен удар погоди за триумф.
Фудбалерите на Манчестер Јунајтед и Манчестер Сити одиграа 0-0 во 31. коло од Премиер лигата. По осум години натпревар на градските ривали заврши без голови.
Сити сега заостанува еден бод зад Челзи, кој е четврти, додека Јунајтед успеа да го престигне Тотенхем на 13. место со 38 бодови.
Јунајтед и Сити практично ништо не им понудија на гледачите во првото полувреме.
Двата тима вкупно во првото полувреме упатија осум удари кон голот. Само два пати имало помалку обиди во градските пресметки откако се води ваква статистика (сезона 2003/04), тоа се случи на натпреварите на 6 јануари 2023 година и на 4 октомври 2015 година.
„Нема квалитет, нема атмосфера, ова е дерби, а нема енергија на трибините… Ова е пријателски дерби“, рече поранешниот капитенна Јунајтед, Рој Кин, кој сега работи како стручен коментатор.
Можеби најголемото возбудување на теренот се случи во 48. минута кога Фил Фоден по еден дуел падна во шеснаесетникот, но судијата Џон Брукс само одмавна со раката на приговорите на гостите.
Слична ситуација видовме само на другата страна, во 81. минута кога Касемиро падна во шеснаесетникот по дуелот со Ковачиќ. Брукс не се огласи и во оваа ситуација. Ова градско дерби беше последно за Кевин Де Брујне. Капитенот на Манчестер Сити ќе го напушти клубот по завршувањето на сезоната.
Интересно, Рубен Аморим сезонава има два победи и едно реми против Пеп Гвардиола. Победи како тренер на Спортинг во Лигата на шампионите и во првото дерби како менаџер на Јунајтед.
Рускиот хокеар Алекс Овечкин стана најдобар стрелец во историјата на НХЛ.
Овечкин го постигна својот 895 гол, на вечната листа го престигна легендарниот Вејн Грецки за еден гол, во исто толку одиграни натпревари (1.487).
Овечкин го постигна својот 895-ти гол во кариерата на натпреварот меѓу Вашингтон Капиталси Њујорк Ајландерс.
Грецки го држеше рекордот од 1999 година, а во моментот кога Русинот го собори својот рекорд беше на трибините и тој момент го следеше во живо.
Откако Овечкин го собори рекордот, играта беше прекината поради кратка церемонија, а Грецки му честиташе и одржа мал говор.
Овечкин ја започна сезоната со 853 гола, постигна 15 на првите 18 натпревари, но во ноември заработи повреда поради која мораше да пропушти дури пет недели.
Тој веќе достигна 30 гола сезоната (33), по 19. пат во неговите 20 сезони во НХЛ, постигнува најмалку 30 гола. Тој е четвртиот играч на возраст од 39 или повеќе години кој постигнал 30+ голови во една сезона.
Александре Лаказет запиша уште една златна страница во кариерата, откако го постигна својот 157 гол во Лига 1 и влезе меѓу дваесетте најдобри стрелци на сите времиња во француската елита.
Напаѓачот на Олимпик Лион беше дел од победата од 2:1 над Лил за да ја престигне легендата Жан-Пјер Папен (156 гола) и да се израмни со Дезире Корани на 18-то место на вечната листа на стрелци.
Важната победа на Олимпик Лион дојде во клучен момент од сезоната – тимот се искачи на 4-та позиција во поредокот, на само два бода од второто место. Лион дојде до израмнување во 38. Минута, а Лаказет застана зад топката кога беше досуден пенал и со ладнокрвно изведен пенал не му остави шанса на голманот – гол што уште длабоко го впишува во историјата на францускиот фудбал.
Тренерот на Реал Мадрид, Карло Анчелоти е оптимист за преземање на репрезентацијата на Бразил доколку шпанскиот гигант го отпушти на крајот од актуелната сезона, објави „Релево“.
Според изворот, претседателот на Бразилската фудбалска федерација (ЦБФ) Едналдо Родригез сака да го види италијанскиот стручњак како селектор на националниот тим. Исто така реномирани играчи како што се Алисон, Маркињос, Данило позитивно го оценуваат потенцијалното назначување на Анчелоти.
Доаѓањето на 65-годишниот специјалист во репрезентацијата ќе го поздрават и бразилските фудбалери на Реал Мадрид: Винисиус Жуниор, Родриго, Едер Милитао и Ендрик.
Сепак, Анчелоти не сака да го напушти шпанскиот гигант додека не му истече договорот во 2026. Дали италијанскиот стручњак ќе продолжи да работи како главен тренер на Реал Мадрид ќе зависи од резултатите на тимот оваа сезона.
Родриг Бобоа, еден од најискусните играчи на тимот, мораше да го напушти теренот поради повреда во текот на третата четвртина, и тоа во моменти кога играше одлично.
Тој беше изнесен од теренот во инвалидска количка, а првичните прогнози велат дека сезоната за него е веројатно завршена.
Процесот на рехабилитација веќе започна, а повреден е листот на левата нога.
Иако има 37 години, Родриг Бобоа оваа сезона настапуваше одлично во Евролигата со просек од 8.9 поени, 1.4 скока и 1.6 асистенции по натпревар.
Светската агенција за тениски интегритет (ITIA) соопшти дека пет француски тенисери се казнети за прекршување на Антикорупциската програма на тенисот. Претходно, шефот на синдикатот, Григор Саркисјан доби пет години затвор за наместени натпревари, а голем број тенисери добија долгорочни дисквалификации.
Јаник Тивант (38) доби доживотна забрана. Тој призна дека наместил 22 натпревари помеѓу 2017 и 2018 година, вклучително и 16 негови. Тивант исто така е казнет со 75.000 долари.
Томас Брехемиер (28) е суспендиран на 7 години и 6 месеци откако призна дека наместил 11 натпревари помеѓу 2017 и 2018 година. Неговата суспензија ќе заврши на 11 август 2032 година.
Габриел Петит (29) е суспендиран на 6 години и 6 месеци и казнет со 35.000 долари. Ја призна одговорноста за седум местени натпревари помеѓу 2017 и 2018 година. Дисквалификацијата на спортистот ќе заврши на 20 септември 2031 година.
Томас Сетоји (29) беше дисквалификуван на 10 години и казнет со 20.000 долари и мора да плати отштета од 5.500 евра. Тој беше прогласен за виновен за наместени три натпревари во 2017 година и непријавување на корупциски заговор во 2018 година. Дисквалификацијата на играчот ќе заврши на 31 март 2035 година.
Хуго Даубиас (28) е суспендиран на две години и казнет со 15.000 долари. Тој призна дека наместил два натпревара во 2017. Суспензијата на Даубијас ќе заврши на 20 март 2027 година.
Додека се суспендирани, на играчите им е забрането да играат, да тренираат или да присуствуваат на кој било тениски натпревар организиран од ITIA или од која било национална асоцијација.
