Македонскиот првак Шкендија не успеа да ја задржи минималната предност од првиот дуел со Лудогорец и со пораз од 4-1 во Разград го заврши својот настап во плејофот за Лигата на Европа.

Бугарскиот шампион започна фуриозно, па веќе во 9. минута преку Куртулус поведе со 1-0. До крајот на полувремето, Чочев ја зголеми предноста на 2-0, со што домашните ја презедоа контролата над двомечот.

Шкендија кратко ја врати надежта во второто полувреме. Тамба во 64. минута погоди за 2-1, што значеше израмнување во вкупниот резултат и обезбеди продолженија. Сепак, во екстра времето Текпетеј (98’) и Биле (122’) беа прецизни и ја потврдија убедливата победа на Лудогорец.

Со овој пораз, Шкендија не успеа да го повтори подвигот на Вардар од 2017 година, кој останува единствениот македонски клуб што играл во групната фаза од второто по ранг европско клупско натпреварување. Европската сезона, Шкендија ја продолжува во лигашкиот дел од Конференциската лига.

Итлијанскиот инсајдер Фабрицио Романо објави ексклузива дека Штутгарт ја прифатил понудата на Њукасл од 80 милиони евра, која со бонусите може да достигне 90 милиони, за германскиот напаѓач Ник Волтемаде.

Германскиот репрезентаивец е на пат кон Њукасл, кога ќе ги заврши медицинските тестови ќе потпише договор со „страчките“.

Напаѓачот висок 198 сантиметри, кој се покажа како вистински кошмар за стоперите минатата сезона, има закажан лекарски преглед за утре, а британските медиуми истакнуваат дека ова е шокантен развој на настаните со оглед на тоа што напаѓачот беше поврзуван со Баерн поголемиот дел од летото.

Оваа сезона, тој одигра два натпревари за Штутгарт, по еден во Купот и првенството, и постигна еден гол.

Волтемаде беше цел на Баерн во текот на целото лето, но Штутгарт одби повеќе понуди вклучувајќи ја последната од 60 милиони евра, инсистирајќи на поголема сума.

Поради ова веста за понудата на Њукасл претставува пресврт во однос на претходната позиција на Штутгарт дека продажбата нема да се случи во овој преоден рок.

Доведувањето на Волтемаде многу веројатно ја отвора и вратата за трансфер на Александар Исак, кој штрајкува веќе неколку недели и тренира одделно со цел да го напушти клубот и да се приклучи на Ливерпул, актуелниот шампион на Англија.

Фудбалерите на Работнички по само три кола во ПМФЛ ќе добијат нов стратег откако клубот од Дебар Маало денеска потврди дека отказ добива тренерот Бојан Марковски.

Работнички во Првата лига од стартот на сезоната ремизираше со Тиквеш (0-0) и загуби од Башкими (2-0) и Струга (2-0). Посебно загрижувачки е што тие се единствената екипа која сезонава по три натпревари е без гол.

Но, она што е интересно, отказот доаѓа по победата 16:0 против третолигашот Карбинци во Купот на Македонија. Работата во Работнички беше прва за Марковски како главен тренер претходно беше дел од АЕЛ Лимасол и Етникос каде што имаше улога на помошник.

Засега нема најави кој би можел да го наследи Марковски на клупата на дебармаалци.

На денот кога ќе се одржи ждрепката за новата сезона во Лигата на шампионите, УЕФА потврди една голема промена за новата сезона.

Имено, финалето во Лигата на шампионите кое досега секогаш започнуваше од 21:00 часот од оваа сезона ќе се игра три часа порано во 18:00 часот.

„Одлуката е донесена со цел да се подобри севкупното искуство од натпреварот за навивачите, тимовите и градовите-домаќини, преку оптимизација на логистиката и операциите на денот на натпреварот, додека истовремено се обезбедуваат неколку конкретни придобивки. Нашата цел е денот на натпреварот да го направиме навистина пријатно искуство за сите што сакаат да бидат дел од возбудата, создавајќи гостопримлива атмосфера која им овозможува на семејствата и децата полесно да присуствуваат на најголемиот и најважниот клупски фудбалски натпревар во сезоната,“ објаснија од Европската куќа на фудбалот.

Претходно, УЕФА од сезоната 2018/2019 го помести стандардниот термин за натпреварите од 20:45 во 21:00 часот.

Манчестер сити го извести Тотенхем дека нема да го промени својот став во врска со трансферот на крилниот напаѓач Савињо.

Сити нема намера да го пушти Бразилецот во Лондон, дури ни за сума поголема од 70.000.000 евра, бидејќи го смета за клучен играч за оваа сезона и во иднина.

Тотенхем за кратко време претрпе уште еден тежок удар на „летниот пазар“, откако минатата недела нивниот најголем ривал Арсенал буквално го грабна Еберечи Езе од Кристал Палас.

Победникот на Лигата на Европа потоа се сврте кон Савињо, но клупските челници добија негативен одговор. Тотенхем сега има многу малку опсции да донесе засилување до крајот на преодниот рок, кој во Премиер лигата завршува на 1 септември во 18 часот.

Овој потег на „граѓаните“ исто така ја блокира секоја можност Родриго од Реал Мадрид да се пресели во Манчестер сити.

Челзи и Милан експресно го договрија трансферот на напаѓачот Кристофер Нкунку.

Клубовите го договорија трансферот за помалку од 24 часа. Двете страни се согласија за обештетување од околу 35 милиони евра.

Што се однесува до Нкунку, тој ќе потпише петгодишен договор со „росонерите“. Потенцијалниот француски репрезентативец е седмото засилување на Милан, но преодниот рок сè уште не е завршен. Тие би сакале да доведат уште еден напаѓа и стопер на „Сан Сиро“. Главни кандидати во моментов се Душан Влаховиќ и Артим Довбик, односно Мануел Аканџи.

Нкунку дојде во Челзи како големо засилување во 2023 година од РБ Лајпциг за 60 милиони евра. За две сезони, тој одигра 62 натпревари и постигна 18 голови.

Стадионот „Петар Милошевски“ во Битола е подготвен за големиот натпревар Македонија-Италија за репрезентации до 21 година, истакна Масар Омерагиќ, претседател на ФФМ.

-Успехот во Битола е пример за сите. За кратко време го доведовме стадионот „Петар Милошевски“ до нови стандарди, што УЕФА и самата го потврди. Ова е најдобар доказ дека кога заеднички се работи, резултатите се гледаат. Благодарност до општина Битола и градоначалникот Коњановски за посветеноста во исполнувањето на обврските, посочи тој.