feature

Џејкоб Вајли повторно во „црвено-жолтиот“ дрес на Македонија

Џејкоб Вајли е повторно дел од сениорската репрезентација на Македонија.

Американецот со македонски пасош, без размислување го прифати повикот на селекторот Марјан Илиевски, за повторно да заигра за Македонија.

И тоа во вистинско време, кога и тоа како ни е потребен играч од таков калибар, да го затвори рекетот, и со својата физичка доминација да ја засили онаа внатрешна линија во селекцијата која ова лето ќе игра претквалификациски мечеви за пласман на Светскиот Куп 2027 година.

„Искрено сум пресреќен што дојдов овде по неколку години пауза. Мотивацијата е на највисоко ниво, штом стапив во контакт со луѓето од федерацијата без многу размислување прифатив. Среќен сум што со мене дојде и моето семејство, кое ‘во живо’ ќе ги следи моите настапи за македонската репрезентација. Едвај чекам повторно да го облечам дресот на Македонија“ – изјави Вајли по пристигнувањето во хотелот „Аполонија“ во Гевгелија.

Силното крило ќе биде и највозрасен кошаркар во нашата селекција, од кого дефинитивно ќе се очекува заедно со Магдевски и Мекиќ како најискусни да ја предводат Македонија во новиот предизвик – претквалификациите за Мундобаскетот во 2027 година.

„Знам дека репрезентацијата е подмладена и сметам дека тоа е природна работа. Да, добро е што младите кошаркари ќе добијат можност да блеснат на сениорско ниво. Допрва ќе тренираме и ќе се воигруваме, свесен сум дека во овој процес на подмладување мојата улога како лидер ќе биде уште позначајна, но подготвен сум за тоа. Ќе дадам се за да помогнам, да внесам позитивна енергија на тренинзите и на натпреварите, да помогнам со своето искуство и да дадам придонес да стигнеме до што подобри резултати“ – истакна „повратникот“ во нашата најдобра селекција.

Македонските тенисери отпатуваа на Европскиот шампионат во Мост

Четири македонски тенисери и тенисерки (две девојчиња и две момчиња) се учесници на Европското првенство до 14 години што се одржува во Мост, Чешка. Во машка конкуренција настапуваат Марко Алексовски и Алексеј Стојановски, додека кај девочињата настап имаат: Деа Крстевска и Ивана Божиновска.

На стартот од шампионатот Марко Алексовски оствари победа против Ник Вирц од Лукесмбург со убедливи 2-0 (6-1, 6-2), додека во следната рунда во третото коло во неизвесен меч е елиминиран од петтиот носител Лоренс Драјвер од Холандија со 2-0 во сетови (6-2, 7-6). Алексеј Стојановски во првиот меч дожеа пораз од 2-0 во сетови од Алексндар Бисеров од Швајцарија.

Кај девојчињата Божиновска и Крстевска беа слободи на стартот, а во следната рунда претрпеа порази. Крстевска загуби со 2-0 во сетови од Марија Магро, додека Божиновска беше поразена од Викторија Хомутова од Летонија со истиот резултат.

Стојановски како и двете тенисерки Крстевски и Божиновска продолжуваат со мечевите на утешниот турнир. Од нив во првата рунда ќе настапи само Крстевска која за протвничка ја има тенисерката од Италија, Викторија Лантерни Монако, додека Стојановски и и Божиновска се слободни. Алексовски поради победата во второто коло нема право на настап на утешниот турнир.

Во конкуренција на двојки Алексовски и Стојановски ќе играат против тенисери од Грузија, додека Божиновска и Крстевска за противнички имаат тенисерки од Словачка. Двата меча во конкуренција на двојки се закажани за денеска, но подоцна на програмата, слично како и мечот на Крстевска на утешниот турнир.

Настапот на Европскиот шампионат е корисно за секој од младите македонски тенисери особено што имаат можност покрај мечевите на терен да добијат и меѓународно искуство со присуството на настанот, но и да почувствуваат настап во репрезентативниот дрес на Македонија. Но не е само тоаимаат и заеднчки дружби надвор од тениските терени и секако можност за нови пријателства.

Во улога на селектор со оваа генерација тенисери и тенисерки е Владимир Чубриновски.

ЕМОФ се пофали со одлична гледаност и перфектна организација

ЕМОФ Скопје 2025 е еден од најуспешно организираните во историјата на Европскиот младински олимписки фестивал – со рекорден број од 15 спортски дисциплини во кои учествуваат преку 4000 спортисти, врвна организација и еуфорична спортска атмосфера, за која придоенсуваат и околу 700 волонтери.

Фестивалот започна на спектакуларен начин, со соборување на еден светски рекорд во скок со стап и два европски рекорди (женската трка на 100 м и во стрелаштво). Дополнително, ЕМОФ Скопје 2025 бележи и рекордна медиумска покриеност и онлајн внимание.

Над 500.000 гледачи за само три дена ги следеле натпреварите преку веб-страницата „еoctf.org“, воедно се остварени повеќе од 11 милиони импресии на социјалните мрежи а официјалната химна – „Together we Shine“ достигна 100.000 прегледи на „YouTube“ – најмногу досега од сите официјалните химни на ЕМОФ изданијата.

Иднината на Стерлинг е во Бундеслигата

Новиот тренер на фудбалерите на Баер Леверкузен, Ерик тен Хаг, сака да го ангажира напаѓачот Рахим Стерлинг кој не влегува во плановите на Челзи за наредната сезона.

Тој претходно беше позајмен во Арсенал но, оствари минимални бројки (1 гол, 5 асистенции) и тоа главно влегувајќи од клупата за резерви.

Бидејќи „фармацевтите“ останаа без неколку значајни играчи во текот на летово, нема да биде изненадување доколку брзоногото крило добие покана да се пресели во Бундес-лигата.

Даниеле Џиларди пред потпис со Рома

Весникот „Газета дело Спорт“, објави, дека челниците на Рома водат интензивни преговори за купување на фудбалерот на Верона, Даниеле Џиларди.

Целиот трансфер треба да се реализира за максимални 12 милиони евра (10 плус 2 бонуси). Иако засега нема потврда од двата клуба, медиумите се убедени дека 22-годишниот Италијанец ќе ја засили „римската волчица“ за наредната сезона.

Дефанзивниот фудбалер го облече дресот на Верона во јуни во 2022 година.

Нкунку побара заминување од Челзи

Францускиот напаѓач Кристофер Нкунку очекува да го напушти Челзи ова лето, објави инсајдерот Фабрицио Романо на социјалната мрежа X.

Според Романо, неколку врвни европски клубови се заинтересирани за 27-годишниот Французин.

„Сините“ се подготвени да се разделат со играчот од јануари.

Претходно беше објавено дека Интер и Тотенхем се заинтересирани за Нкунку.

Тековниот договор на фудбалерот важи до 2029 година. Порталот „Transfermarkt“ ја проценува неговата вредност на 35 милиони евра.

Во сезоната 2024/25, Нкунку одигра 47 натпревари во сите натпреварувања, постигна 15 гола и имаше пет асистенции.

Мурињо: Денес секој може да биде менаџер во Англија

Познатиот португалски тренер Жозе Мурињо е во врвниот фудбал две и пол децении и сè уште ја чувствува истата страст, не размислува за пензионирање.

Сè уште е гладен за фудбал.

„Што ме храни како тренер? Сè уште е желбата за победа. Сакам да победувам на секој следен натпревар, навистина си ја сакам работата. Не можам да најдам никаква причина да не продолжам, да не се чувствувам доволно млад. Не гледам никаква разлика помеѓу Мурињо кој започна пред 20 години и денес. Нема никаква разлика“, рече познатиот тренер во големо интервју за португалскиот „А Бола“.

Сепак, забележа дека во меѓувреме се случиле големи промени во светот на фудбалот, особено кај тренерите.

Тој, исто така, коментираше за денешните менаџери во најсилната лига во светот, Премиер лигата.

„Дојдов во Премиер лигата како победник на Лигата на шампионите во 2004 година. Таа година, во Премиер лигата имаше само двајца странски тренери: Бенитез и јас. Тој дојде во Ливерпул откако го освои Купот на УЕФА со Валенсија. (Во Премиер лигата тогаш беше и Арсен Венгер и уште двајца странски тренери). Сега во Премиер лигата доаѓаат тренери чии имиња дури и не ги знам. Не сакам никого да навредам, тоа е реалноста. Има тренери кои се избираат врз основа на некои податоци, бројки, а не поради победи. Се чини дека денес идеите се поважни од победите“, се чуди Жозе Мурињо.

Португалецот е на клупата на турски Фенербахче од минатото лето. Претходно работеше во Бенфика, Леирија, Порто, Челзи, Интер, Реал Мадрид, Манчестер јунајтед, Тотенхем и Рома.

Освои близу 30 титули и купови како главен тренер и уште десетина како асистент додека му помагаше на Боби Робсон во Порто и Барселона.

Барса му ја довери четиринаесетката на Маркус Рашфорд

Англискиот напаѓач е ново засилување за Барселона. Тој беше претставен како најново име во тимот на Жоан Лапорта.

Рашфорд ја задолжи опремата со број 14 и стана најголемото летно засилување на шпанскиот првак. Тој е третото засилување на „Камп Ноу“ ова лето, по Џоан Гарсија од Еспањол и Руни Бардџи од Копенхаген.

Дебито на Англичанецот се очекува на азиската турнеја на Барселона, а тој е ангажиран како алтернатива откако клубот не успеа да го доведе Нико Вилијамс, како и Луис Диаз.

Ливерпул го претстави Уго Екитике

Уго Екитике и официјално е нов фудбалер на Ливерпул. На „Енфилд“ тој доаѓа од Ајнтрахт Франкфурт, чиј член беше во минатата година и половина. Францускиот напаѓач блесна играјќи за германскиот тим и го привлече вниманието на премиерлигашите.

За услугите на Екитике Ливерпул ќе исплати вкупно 95 милиони евра, од кои 80 се фиксна сума, 10 се лесно достижни, а уште пет потешко достижни бонуси.

Со „црвените“ Екитике парафира договор на шест години, а клубот најави дека неговиот број на дресот ќе биде објавен во наредниот период.

Јакимовски го откажа настапот во претквалификациите

Македонската кошаркарска репрезентација продолжува со интензивните подготовки во Гевгелија, каде што тренира во спортскиот центар „Ноел“, а е сместена во хотелот „Аполонија“, лоциран во срцето на градот во јужниот дел на државата.

Но, стручниот штаб се соочи со нова главоболка – отсуството на Андреј Јакимовски. Иако се очекуваше да им се приклучи на соиграчите, по неговиот потпишан договор со италијанскиот клуб Тренто, медицинските тестови откриле помала повреда што ќе го оддалечи од теренот најмалку петнаесет дена.

Поради тоа, Јакимовски нема да биде во можност да настапи во натпреварите од претквалификацискиот циклус, што претставува дополнителна компликација за селекторот Илиевски во креирањето на ростерот за мечевите против Романија и Унгарија.

Во меѓувреме, репрезентацијата го очекува пристигнувањето на натурализираниот играч Вајли, кој треба да пристигне утре во Гевгелија. Со неговото доаѓање, стручниот тим конечно ќе го има целиот состав подготвен за првиот натпревар на 2 август во Куманово против Романија.

«< 525 526 527 528 529 >»