Сега е сè познато, Лионел Меси одлучи да ги следи стапките на Кристијано Роналдо и го продолжи договорот со својот клуб, исто како што направи Португалецот малку порано.

Аргентинецот ќе остане играч на Интер Мајами во следните три години и веројатно таму ќе ги закачи копачките.

Договорот беше објавен денеска, еден ден пред плејофот на МЛС и дуелот на Интер Мајами против Нешвил. Тимот на Меси, трет во Источната конференција, ќе биде домаќин на првиот натпревар од таа серија од три победи во петок навечер.

Тимот го објави потегот на социјалните мрежи за време на презентацијата на Меси, на која се гледа како Лео потпишува договор во рамките на новиот стадион кој сè уште е во изградба. „Тој е дома“, се вели во соопштението на тимот.

Интер Мајами објави дека станува збор за тригодишен договор до 2028 година. Помислата дека Меси ќе игра уште две или три сезони сигурно би послужила како поттик за продажбата на билети на стадионот што тимот го гради во близина на меѓународниот аеродром во Мајами. Тимот продава пакет билети и зема депозити за места во новиот парк повеќе од една година, сè под претпоставка дека Меси ќе остане дел од франшизата. Еден од најдобрите, ако не и најдобриот, играчи во историјата на фудбалот ќе биде дел од МЛС на 41-годишна возраст, што веројатно значи и дека ќе ја заврши кариерата во Интер Мајами.

Владата на Западна Австралија останува непоколеблива во ставот дека Перт ќе биде домаќин на натпревар од Серија А меѓу Милан и Комо следната година, и покрај откажувањето на планираниот натпревар меѓу Барселона и Виљареал во САД.

Со оглед на тоа што „Сан Сиро“ е на работ на недостапност поради Зимските олимписки игри, италијанската фудбалска федерација (FIGC) даде зелено светло за „росонерите“ да го играат натпреварот со Комо на 6 февруари во Перт, опишувајќи ја можноста да се одржи натпревар од Серија А во Австралија како „историска“.

УЕФА „неволно“ даде согласност за натпреварот, како и за натпреварот од Ла Лига меѓу Барселона и Виљареал во Мајами, претходно овој месец. Сепак, по широките реакции во Шпанија, Ла Лига во вторникот објави дека го откажала планираниот натпревар. Останува да се види дали слична судбина ќе доживее и овој планиран меч од Серија А во Австралија.

Фудбалерите на Шкендија денес на Арената „Тодор Проески“ ќе го одиграат вториот дуел од главната фаза во Конференциската лига, а прв на домашен терен во историскиот настап во третото по ранг европско клупско натпреварување.

Противник на Тетовци е тимот од Република Ирска, Шелбурн кој во минатата сезона го освои третото место во националниот шампионат.

“Имавме доволно време да се подготвиме. Во Скопје игравме добро и на тие квалификациски мечеви во Европа. Иако сме различни по стил со противникот, посакувам со една добра и паметна игра да дојдеме до победа. Направивме добра анализа на противникот, не можеш на ова ниво да најдеш слабости кај ниту еден ривал. Мора да одиграме квалитетно. Се надеваме на добра игра на поддршка од публиката и да дојдеме до тие три бода”, изјави тренерот на Шкендија, Јетон Беќири.

Дефанзивецот на Ливерпул, Жереми Фримпонг ќе отсуствува неколку недели од терените поради повреда. Десниот бек на Ливерпул го започна натпреварот со Ајнтрахт Франкфурт во Лигата на шампионите, но беше заменет по 19 минути игра.

Фудбалерот ќе отсуствува неколку недели поради повреда на тетивата. Напаѓачот на „црвените“, Александар Исак, исто така, заработи повреда на препоните на овој натпревар и тој најверојатно ќе има пауза од неколку недели.

Раководството на Манчестер Јунајтед продолжува да ја следи одблизу ситуацијата со играчот од средината на теренот на Штутгарт, Анџело Штилер, тврди германскиот новинар Флориан Плетенберг.

Германскиот репрезентативец беше поврзуван со „црвените ѓаволи“ уште минатото лето, а неговата добра игра во новата сезона дополнително го привлекла вниманието на луѓето од „Олд Трафорд“.

Во моментот тој дури се искачи повисоко на листата со посакувани имиња за засилување во средината на теренот, бидејќи најспоменуваното име во текот на летото, Карлос Балеба, има слаба сезона досега и интересот кон него е намален.

24-годишниот играч од средината на теренот е отворен да го смени тимот следното лето, а преселбата на Островот ќе биде еден од главните избори за играчот. Ситуацијата околу играчот е комплицирана бидејќи тој има ослободителна клаузула во договорот во износ од 36 милиони евра, но од Штутгарт во моментов се обидуваат да го убедат фудбалистот да потпише нов долгорочен договор, за да можат да постават повисока цена следното лето. Според локалните медиуми од „швабите“, тие планираат да постават цена од најмалку 50 милиони евра за Штилер.

Арсенал убедливо го совлада Атлетико Мадрид со резултат 4-0 и Хулијан Алварез овој пораз го виде како јасен знак дека со својот тим не може да се бори за трофеи.

Шпанските медиуми пишуваат за незадоволството на Алварез и истакнуваат дека Аргентинецот и самиот признал дека играл против Арсенал и порано, но никогаш не бил во толку потчинета позиција на теренот. Некои го протолкуваа тоа како пофалба за Микел Артета, некои како критика за Диего Симеоне, но сè на сè, повторно се пишува дека Алварез би можел да побара трансфер.

Не е тајна дека Жоан Лапорта го сака во Барселона, но Каталонците сигурно нема да имаат пари да го доведат. Атлетико плати за Алварез 75 милиони евра и лесно остварливи бонуси до 90 милиони, а „јорганџиите“ сега го проценуваат својот играч на повеќе од 150 милиони евра.

Алварез повеќепати истакнал дека сака да се бори за трофеи и да биде главен играч, но Атлетико очигледно може да му понуди само ова второто.

Сè на сè, ако Атлетико не биде конкурентен во Ла Лига, не е невозможно Алварез летово да посака да си замине и да го принуди клубот на преговори.