Koшаркарот на Сакраменто, Демар Дерозан, поради здравствени проблеми, не се појави на ноќешниот меч во НБА лигата против Минесота кој заврши во продолжение со победа на „волците“ со 130 -126.
Ѕвездата на „кралевите“ се повреди во средата на мечот со Феникс и засега не се знае кога ќе може да се врати на терените.
35-годишниот ветеранот во текот на сезонава за неговиот нов клуб реализираше во просек 24,8 поени.
Португалија го осигура првото место во Групата 1 од А сегментот од Лигата на нации на коло до крајот по убедливата победа од 5-1 против Полска.
Затоа селекторот Роберто Мартинез реши да ги одмори четворицата најдобри играчи и да не ги однесе на последниот меч против Хрватска.
Дозвола да се вратат во своите клубови добија Кристијано Роналдо (Ал Наср), Бернардо Силва (Манчестер Сити), Бруно Фернандеш (Манчестер Јунајтед) и Педро Нето (Челси).
Ова значително ќе и ја олесни работата на Хрватска на која и е потребен само еден бод за да обезбеди пласман во четвртфиналето. Натпреварот е закажан за понеделник, 18 ноември во 20.45 часот на стадионот Пољуд во Сплит.
Уругвај во трилер завршница успеа да ја победи Колумбија со 3-2 во 11.коло, во квалификациите за пласман на Светското првенство.
Колумбијците изедначија во 96. минута, а пет минути подцна Угарте погоди за победа на Уругвај.
По завршеното 11. коло, Аргентина е лидер со 22 бода, Уругвај и Колумбија имаат по 19, Бразил 17…
Мајк Тајсон по пауза од 19 години имаше професионален меч. „Челичниот Мајк“ загуби на поени, со едногласна одлука на судиите од јутјуберот Џејк Пол.
Шоуто се одржа на стадионот AT&T во Арлингтон, Тексас, пред 80.000 навивачи.
Во текот на целиот меч Пол беше подобар, имаше повеќе удари од Тајсон и јасно ја покажа разликата во годините меѓу двајцата боксери. Тајсон дури и добро се држеше во првите две рунди, но од третата рунда беше видливо дека е 30 години постар од противникот.
Иако конечната заработка од натпреварот ќе се знае дури откако Нетфликс ќе ја објав сумата (борбата се прикажуваше на таа платформа), и двајцата борци објавија колку пари треба да добијат.
Пол ќе добие околу 40 милиони долари или двојно повеќе од Тајсон кој би требало да заработи 20 милиони долари.
Според „Форбс“, Тајсон во кариерата заработил околу 430 милиони долари. Најдоходовната борба ја имаше против Ленокс Луис, кога заработи над 103 милиони долари, а според „Форбс“ уште четири пати во кариерата заработил повеќе од 20 милиони долари.
Пол во кариерата се борел 11 пати (сооднос 10-1), а се проценува дека досега има заработено околу 15 милиони долари.
Јутјуберот Џејк Пол го победи Мајк Тајсон (58) во професионална борба што се одржа во Далас.
Пол славеше со едногласна одлука на судиите на стадионот „Далас каубојс“ со 80:72, 79:73, 79:73.
Долгоочекуваниот спектакл пред околу 80.000 гледачи го пренесуваше „Нетфликс“, а борбата се одржа под покровителство на Атлетската комисија на Тексас.
Тајсон доста добро ја започна борбата, беше брз и агилен, но дека е човек во години се покажа на почетокот на втората рунда кога почна да го губи здивот.
Пол беше видно посвеж, поактивен во продолжението и по осум рунди од две минути славеше.
Ова беше прва професионална борба на Тајсон од јуни 2005 година, кога загуби од Кевин Мекбрајд.
Сега има биланс од 50 победи и седум порази, додека Пол има скор од 12 триумфи и еден пораз.
Францускиот национален комитет за контрола и управување (ДНЦГ) одлучи условно да го исфрли фудбалскиот клуб Лион од Лига 1 доколку не ја стабилизира финансиската состојба до крајот на сезоната.
Како што пишува „Монд“, ДНЦГ му забрани на Лион да реализира трансфери во зимскиот преоден рок и ќе има целосна контрола врз финансиската состојба на клубот.
По состанокот со претставниците на ова тело, сопственикот на Лион, Џон Текстор изјави дека е уверен дека се е во ред и дека не знае како регулаторот гледа на ситуацијата во клубот.
„Верувам дека ДНЦГ е независен од некои притисоци што ги гледате. Имаме многу непријатели во раководството на лигата, како и голем клуб од Катар“, рече Текстор, мислејќи на Пари Сен Жермен, кој е во сопственост на катарското кралско семејство.
Текстор е еден од косопствениците на Кристал Палас и најголем акционер на бразилски Ботафого.
Претходната сезона Бордо испадна од француската втора лига во четврта поради лоша финансиска состојба.
Лион е на петтото место на табелата во Лига 1 со 18 бодови, додека во Лига Европа е на деветтото место со седум освоени бодови.
Селекторот на македонската фудбалска репрезентација, Благоја Милевски посакува со победа да ја заврши групната фаза во Лигата на нации. „Црвено-жолтите“ утре се домаќини на Фарски Острови во 6. коло од четвртата група Ц-сегмент.
„Сакаме со победа да ги завршиме натпреварите во групата. Нема да биде лесно, бидејќи Фарски Острови покажаа дека се квалитетна репрезентација. Ние, иако го обезбедивме првото место, имаме цел да освоиме што повеќе бодови и со тоа да сме што подобропласирани во пресрет на баражот за пласман на Светското првенство 2026“, изјави Милевски на прес-конференцијата пред утрешниот натпревар.
Натпреварот ќе се игра на Национална арена „Тодор Проески“ со почеток во 15:00 часот.
Американката Микаела Шифрин е победничка на денешната трка во слалом возена во Леви, Финска.
Американката до триумфот стигна со вкупно време по двете трки 1:47.20 минута.
Втора заврши Катарина Линзбергер од Австрија, додека третото место и припадна на Лена Дир од Германија.
Трката во Леви е историска за македонското скијање. Осумнаесетгодишната Јана Атанасовска е првата Македонка со настап во Светскиот куп. За жал, таа не успеа да ја заврши првата трка и остана без пласман.
Грчкиот тренер Димитрис Итудис е новиот тренер на Хапоел Тел Авив.
Итудис ќе потпише рекорден тригодишен договор вреден 4,6 милиони долари.
Главна цел на тимот е преку Еврокупот да обезбеди пласман во Евролигата.
Досегашниот тренер Стефанос Дедас ќе остане во клубот како помошник на Итудис, односно ќе ја има истата работа како во ЦСКА и Фенербахче.
Итудис, кој ја започна својата тренерска кариера како асистент во Загреб во 1992 година, се прослави како помошник на Жељко Обрадовиќ во Панатинаикос во периодот 1999-2012 година.
Првиот голем ангажман во ЦСКА Москва го имаше од 2014 до 2022 година, а со рускиот тим двапати ја освои Евролигата.
Трендот на враќање на скијачките ѕвезди продолжува. По Марсел Хиршер, на патеката се враќа и 40-годишната олимписка шампионка Линдзи Вон. Американката реши да ја прекине својата пензија шест години по пензионирањето и учеството на Олимпијадата во 2018 година.
Вон е трикратна освојувачка на олимписки медали, вклучувајќи злато во спуст и бронза во супер-Џи на Игрите во Ванкувер во 2010 година и бронза во спуст на Игрите во Пјонгчанг 2018 година. Таа го освоила Големиот кристален глобус четири пати и има освоено осум медали на светските првенства.
Нејзините 82 победи на трките од Светскиот куп беа женски рекорд додека тој вкупен износ не беше соборен во јануари 2023 година од сонародничката Микаела Шифрин, која сè уште е активна со 97 победи.
