Според медиумите од Франција, селекторот на фудбалската репрезентација на Франција, Дидие Дешамп, одлучил да остане на функцијата до завршетокот на Европското првенство 2024 година.

Во информациите на медиумите се вели дека претходно, Дешамп најави дека ќе се повлече од селекторското место после завршувањето на Мундијалот во Катар, а на негово место требаше да пристигне Зинедин Зидан. Челниците на Фудбалскиот сојуз на Франција уште имаат целосна доверба во Дешамп, и му оставија можност тој сам да одлучи за неговата иднина.

Претходниот договор помеѓу сојузот и Дешамп беше да се исполни целта околу пласманот на Франција во полуфиналето на СП, и после тоа да се разговара за неговата иднина.

Франција во среда ја очекува полуфиналниот дуел од СП со Мароко.

Поранешната звезда на англиската фудбалска репрезентација, Дејвид Бекам, им порача на навивачите да бидат горди на фудбалерите кои беа елиминирани во четвртфиналето на СП во Катар.

Англија беше поразена од Франција со 2:1, во четвртфиналето на Мундијалот во Катар, со што е елиминирана од понатамошното учество на турнирот.

Бекам кој ја бодреше репрезентацијата од трибините, преку социјалните мрежи испрати порака со поддрршка за селекцијата на Англија.

„Нашите момци продолжуваат да растат. Секогаш е лошо чувството да се разбудиш после елиминација од турнирот, но нашите фудбалери и селекторот Саутгејт, а посебно нашите навивачи можат да бидат горди на овој тим. Следниот пат ќе има поинаков крај“, порачува Бекам.

Пепе веројатно го одигра своето последно Светско првенство, а не успеа со Португалија да ја мине четвртфиналната фаза. Португалската одбрана и голманот Коста денеска направија една клучна грешка и тоа беше доволно за елиминација, а Пепе очигледно имал и друг сериозен проблем за време на средбата. Португалската федерација потврди дека дефанзивецот за време на средбата заработил скршеница на коска на левата рака, па и покрај ризикот, стиснал заби да му помогне на својот национален тим. Фрактурата била потврдена со снимките направени во болница во Доха, веднаш по завршувањето на натпреварот.

Хари Кејн е трагичар на Англија откако промаши пенал за израмнување, Англичаните го загубија мечот од Франција и испаднаа од Светското првенство.
Кејн шутираше два пенали на вчерашниот меч против Франција, првиот го даде, а вториот го промаши.

„Јас секогаш се подготвувам за шутирање пенали, дали еден, два, небитно, но секогаш имам идеа што сакам да направам. Не можам да се обвинувам за лоша подготовка или за некој детал, ова беше само една погубна ноќ која многу боли. Првиот пенал беше сјаен, а вториот – не шутнав како што сакав. И јас ја преземам одговорноста, ова ќе боли уште многу долго време. Цел меч е болен за нас, зашто знаевме што сакаме да постигнеме.
Светско првенство се игра еднаш на четири години и не е ова нешто за кое ќе имате шанса следната година. Една ситница реши и затоа јас ја преземам одговорноста. Ова е болка многу голема, не само за мене, туку и за секого во националниот тим. Но, таков е фудбалот, таков е спортот“, рече Кејн.

Доминик Ливаковиќ беше фантастичен и против Бразил. Натпреварот го заврши со 11 интервенции, а одбрани и уште еден пенал во серијата во која повторно Хрватите беа поуспешни. Голманот на Динамо го сврте вниманието кон себе со одличнитe настапи, а сите светски медиуми од ден на ден го селат во друг клуб. Наводно, пред почетокот на сезоната бил во игра трансфер во Лацио, но се пропаднало, па Ливаковиќ останал во Динамо. Пред тоа се зборуваше дека ќе замине во Милан, но никогаш не се реализираше ниту еден трансфер, но сега Динамо многу тешко ќе го задржи. Веќе постои интерес за него, но имињата на клубовите не се откриваат, иако наводно Баерн е клубот кој најмногу го посакува. Досега Динамo бараше околу десет милиони евра за него, но сега сумата сигурно ќе биде поголема. Според хрватските медиуми, Динамо сега бара 15 милиони евра за Ливаковиќ, но тие се во добра позиција бидејќи немаат потреба да го продадат Ливаковиќ.