Еден од најдобрите поранешни напаѓачи, Хернан Креспо, откри дека на два пати бил пред трансфер во шпанскиот гигант Реал Мадрид. Поранешниот член на Ривер Плата, Парма, Лацио, Интер, Челзи, Милан и Џенова, можел да игра во Ла Лига за белиот дрес на Реал Мадрид, но објасни зошто тоа не се случи.

„Во 2002 година играв за Лацио и имав разговори со Реал Мадрид и Интер. Евентуалниот трансфер зависеше од Бразилецот Роналдо. Да останеше во Интер, јас ќе се преселев во Реал Мадрид. На крајот, тој одлучи да се приклучи на „кралскиот клуб“, па јас потпишав со Интер, изјави 46-годишниот Креспо.

Неколку години подоцна, од Реал Мадрид имале уште еден обид за ангажман на Аргентинецот.

„Имав уште 6 месеци до истекот на договорот со Интер кога ме повикаа од Реал Мадрид во јануари. Можев да потпишам со нив, но решив да останам за да го освојам Скудетото“, објасни прославениот напаѓач.

Креспо освои 3 титули во Серија А со Интер , а беше и освојувач на Купот на УЕФА со Парма .

Тренерот на Барселона, Чави Ернандез не го криеше разочарувањето од пропуштените шанси на неговиот тим против екипата на Наполи во првиот натпревар од осминафиналето во Лигата на Европа. Натпреварот на стадионот „Ноу Камп“ заврши со резултат 1:1.

„Разочаран сум затоа што пропуштивме премногу прилики за гол. Мислам дека одигравме добро и единственото нешто што ни недостигаше беше да ги реализираме нашите шанси. Бевме добри во правењето притисок врз противникот. Создадовме 20 можности за гол, од кои шест или седум беа зицери. Да бидам искрен, моравме да победиме со најмалку два гола разлика. Одигравме одлично, и одиме на победа во реваншот“, изјави тренерот Чави.

Англискиот „Дејли Мирор“ пишува дека постои криза во соблекувалната на Манчестер Јунајтед, која е поттикната од Кристијано Роналдо.

Имено, португалскиот напаѓач е незадоволен од влијанието врз тимот од дефанзивецот и капитен на „црвените ѓаволи“, Хари Мегваер. Поради тоа, Роналдо ја посакува капитенската лента за себе и е со мислење дека тој ќе има поголем успех во мотивација на соиграчите бидејќи е повеќе респектиран, посебно од помладите членови на екипата.

Во целата ситуација се вмешал и тренерот Рангник кој почнал преговори со двајцата играчи и по се изгледа ќе побара од Мегваер да му ја предаде капитенската лента на Роналдо.

Барселона започнала преговори со дефанзивецот на Борусија Мехенгладбах, Матијас Гинтер, пренесуваат каталонските медиуми.

28-годишниот германски репрезентативец има договор со Мехенгладбах до крајот на сезоната и веќе му соопштил на клубот дека нема намера да ја продолжува соработката. Гинтер сигуно на лето заминува како слободен агент, а Барселона сака да ја искористи таквата ситуација и веќе започнал преговори со неговиот агент.

Чави бара засилувања во одбраната, а Гинтер е одлична можност за клубот да се засили без пари, со оглед на лошата финансиска ситуација.

Прв избор на Каталонците е Андреас Кристенсен од Челзи, но конкуренцијата за неговиот потпис е голема, па ќе се насочат кон Матијас Гинтер.

Голманот на Атлетико Мадрид, Јан Облак, по поразот од Леванте во ла Лига изјави дека ситуацијата во тимот оваа сезона е благо речено, алармантна.

„Ова е тежок момент, сите ние треба да се подобриме. Алармантна е ситуацијата во која се најде Атлетико. Ова не е позицијата што ја очекувате од овој клуб. Малку е да се каже. Мораме да го подобриме нашето ниво ако сакаме да влеземе во Лигата на шампионите следната сезона“, изјави Облак.

По 24 натпревари во шпанската лига, Атлетико е петти со 39 бодови.

Милан е силно заинтересиран за офанзивниот фудбалер на Јувентус и италијански репрезентативец, Федерико Бернардески.

Бернардески беше доведен како еден од играчите на кои може да се темели иднината на Јувентус и „старата дама“ за него пред четири години плати 40 милиони евра. Меѓутоа, Италијанецот не ги оправда во целост очекувањата, особено оваа сезона кога не добива голема минутажа кај Алегри.

Неговиот договор истекува на крајот на сезоната и нема најави дека двете страни ќе ја продолжат соработката, па Бернардески на лето ќе биде слободен агент.

Таквата ситуација сака да ја искористи Милан, бидејќи Пиоли во него гледа одлично засилување за десната крилна позиција.

Малдини веќе почнал преговори со неговиот агент и „росонерите“ се во пол-позиција за неговиот потпис.

Играчот од средниот ред на Манчестер Јунајтед, Пол Погба е подготвен да слушне понуди и од другите премиерлигаши по истекот на неговиот договор со „црвените ѓаволи“.

Остануваат уште пет месеци до крајот на договорот на Французинот со клубот, а во моментов нема назнаки дека ќе го продолжи неговиот престој на Олд Трафорд. Досега се зборуваше дека Реал Мадрид, Париз Сен Жермен, Барселона и Јувентус се најверојатните дестинации на Погба доколку навистина реши да го напушти Јунајтед. 

Сепак, Французинот е отворен за можноста дури и да остане во Премиер лигата, но да игра за друг клуб. Погба сака да ги разгледа апсолутно сите понуди пред да донесе конечна одлука за својата иднина.

Екипата на Париз Сен Жермен сака по секоја цена да го задржи Килијан Мбапе во своите редови. Како што пренесуваат француските медиуми, одржана е нова рунда на преговори помеѓу клубот и застапниците на фудбалерот.

Сопствениците од Катар се задоволни и со нов двегодишен договор на Мбапе со тимот од Париз, за што се спремни да му понудат годишна плата од 50 милиони евра.

Францускиот репрезентативец досега одби неколку понуди за потпишување нов договор со ПСЖ, но исто така изјави дека е фокусиран на своите игри и дека сеуште не донел одлука за својата иднина.