Одличните игри на Вест Хем оваа сезона ги воодушевија фудбалските фанови ширум планетата. Тимот на Дејвид Мојс игра многу добро и се бори за место кое води во Европа следната сезона.

Најголемата ѕвезда на тимот и стандарден репрезентативец на Англија Деклан Рајс е клучен играч на „чеканите“. Клубот од Лондон одбива да го продаде, но јасно е дека Рајс порано или подоцна ќе го напушти „Аптон Парк“ и ќе заигра во еден од најголемите англиски клубови.

Менаџерот на Вест Хем, Дејвид Мојс изјави дека Рајс во моментов чини 100 милиони фунти и дека не планираат да преговараат со клубови кои не се подготвени да одвојат толку пари за него.

За Челзи и Манчестер Јунајтед цифрата од 100 милиони не е недостижна, па двата клуба покажуваат голем интерес да го доведат одличниот играч за врска во своите редови.

Според извори блиски до Реал Мадрид, играчот од средниот ред на екипата, Еден Азар е разочаран од односот на тренерот Карло Анчелоти.

Сепак, Азар јавно не го искажува незадоволството и се обидува да одржува пријателска атмосфера во соблекувалната, се вели во информацијата.

Азар речиси и да нема минутажа во тимот, со 17 натпревари, 1 гол и 2 асистенции во сите натпреварувања оваа сезона.

Играчот од средниот ред има договор со Реал до 2024 година, но веројатно ќе го напушти клубот ова лето. 

Пјер-Емерик Обамејанг едвај чека да заигра за Барселона. Тој пристигна од Арсенал како слободен играч откако Британците го раскинаа неговиот договор на последниот ден од пазарот. „Барса е шансата на мојот живот. Едвај чекам да се разбудам наутро. Како дете сонував да играм во Шпанија. Не размислував 2 минути откако дојде понудата“, рече тој.

Сепак, 32-годишниот фудбалер не е на теренот од 6 декември.

„Не сум играл некое време, но се ми е јасно во главата. Наскоро ќе бидам подготвен да помогнам и полека да се вратам на врвот. За мене сега е шанса да ја освојам Лигата на шампионите бидејќи никогаш не сум го направил тоа. Барса мора да го освои турнирот бидејќи е голем клуб и затоа сум тука. Мораме да направиме се за да се вратиме на турнирот и да триумфираме“, инспириран е репрезентативецот на Габон.

Договорот на Африканецот со Каталонците е до летото 2025 година, но може да биде раскинат во летото 2023-та на барање на двете страни. Неговата ослободителна клаузула изнесува 100 милиони евра.

Селекторот на репрезентацијата на Сенегал, Алиу Сисе се надева дека ќе го освои Африканскиот куп на нации во неговиот трет обид.

45-годишниот Сисе досега има две неуспешни финалиња со Сенегал на турнирот, едното како фудбалер во 2002 година и второто како селектор во 2019 година, кога Сенегал загуби од Алжир со 0:1.

Во обидот да дојде до трофејот, Сисе денес во финалето ќе се сретне со селекцијата на Египет.

„Имам исклучителен тим. Со овие момци работам шест години и за прв пат имам комплетна екипа со менталитет и карактер“, изјави Сисе.

Влијателниот шпански весник Марка, пренесува дека градксите ривали од Манчестер, Сити и Јунајтед, ќе се борат за потписот на дефанзивецот од Барселона Роналд Араухо.

Договорот на 22-годишниот уругвајски репрезентативец истекува следното лето и двата гиганти од Манчестер се подготвени да го доведат во своите редови, бидејќи го сметаат за еден од најперспективните млади играчи.

Менаџерот на Сити, Пеп Гвардиола неодамна беше забележан на вечера со менаџерот на играчот што дополнително ги подгреа гласините за трансферот на Араухо.

Четири од најголемите клубови во Европа ја следат ситуацијата околу една од ѕвездите на Баерн, Серж Гнабри.

Вчера се појави информација дека крилниот напаѓач и Баварците не се многу блиску до договор за продолжување на договорот на играчот со германскиот гигант. Договорот на Гнабри со Баерн истекува во летото 2023 година.

Според информациите кои доаѓаат од Германија, Реал Мадрид, Барселона, Ливерпул и Манчестер Јунајтед ја следат ситуацијата, но се очекува Гнабри да остане на „Алијанц Арената“. Фудбалерот сака иста плата како Кингсли Коман и Лерој Сане, кои можат да се пофалат со бруто плата од 15 милиони евра, без бонуси. Тренерот на Баерн Минхен, Јулијан Нагелсман сака Гнабри да остане во тимот.

Како и што беше најавен во претходните денови Мевљан Мурати вториот дел од сезоната ќе го помине во Ренова.

Поранешниот младински репрезентативец на Македонија ќе го носи дресот на „гипсарите“ како позајмен фудбалер од Шкендија. Денес покрај Мурати Ренова го промовираше и Кахирмановиќ и се очекува и двајцата да бидат одлични засилувања во продолжение од сезоната.

Мурати во клубот пристигнува како засилување на десната бековска позиција.

Швајцарскиот репрезентативец, Џердан Шаќири,размислува за повторна промена на клубот.

30-годишниот футбалер, пред помалку од шест месеци направи трансфер од Ливерпул во Лион,  каде очекуваше борба за титулата во француското првенство.

Меѓутоа Лион се наоѓа на седмата позиција од табелата и Шаќири веќе веќе размислува за заминување од Франција. Како негова следна дестинација се споменува американската МЛС лига и клубот Чикаго Фајр.

Џердан Шаќири во својата кариера настапуваше за екипите на Базел, Баерн Минхен, Интер, Стоук, Ливерпул, и сега за Лион. За репрезентацијата на Швајцарија одигра 100 натпревари и постигна 26 гола.