Екипата на Борусија Дортмунд го посочува напаѓачот на Челзи и германската репрезентација,Тимо Вернер, како можна замена за Ерлинг Халанд, кој се очекува да го напушти клубот ова лето. 

Сепак, според информациите од Скај Германија, челниците на Дортмунд сеуште не започнале конкретни преговори со клубот од Лондон.

Вернер пристигна на Стемфорд Бриџ од РБ Лајпциг за 53 милиони евра, и има договор до 2025 година при што заработува 16 милиони евра по сезона. Висината на неговата плата може да биде проблематична доколку црно-жолтите од Дортмунд тргнат во трансфер на Германецот.

Вернер се соочува со големи потешкотии во својата игра за Челзи, и се чини дека никако да се адаптира на стилот на игра во Премиер лигата. Тој досега има постигнато само 7 гола на 46 лигашки натпревари.

Екипата на Барселона, во последно време настапува во извонредна форма, и новиот напаѓач на тимот ги истакнува амбициите на клубот до крајот на сезоната.

Барселона веќе нанижа три победи по ред на кои постигна по четири голови. Торес на „Камп Ноу“ пристигна во зимскиот преоден рок од Манчестер Сити, и засега на девет натпревари постигна два гола.

„Ние сме голем клуб и мислам дека ситуацијата во Барселона е многу подобрена. Спремни сме да направиме чекор напред и да оствариме добри резултати. Мислам дека имаме реални шанси да стигнеме доста далеку во Лига Европа, па дури и да ја освоиме истата“, истакнува 22-годишниот Торес.

Компанијата за електронски игри „Electronic Arts“ преку својот Твитер профил објави дека ќе ја отстрани руската репрезентација и сите руски клубови од една од своите најпродавани видео игри „FIFA“ и нејзиното најново издание „FIFA 22“.

Истата компанија поседува и ексклузивна лиценца за хокеј игри, па Русија ќе биде отстранета и од играта „NHL 22“.

„Во солидарност со украинскиот народ како и многу луѓе ширум светот, EA Sports сака итен прекин на инвазијата врз Украина и повикува на мир“, соопштуваат од компанијата.

Шпанските медиуми пренесуваат дека играчот од средниот ред на Реал Мадрид, Иско се согласил да ја засили Севиља по крајот на сезоната. Договорот на Иско со тимот од Сантијаго Бернабеу истекува ова лето.

29-годишниот шпански фудбалер веќе има соработувано со тренерот на Севиља Лопетеги во репрезентацијата на Шпанија како и за време на краткиот престој на тренерот во Реал.

Иско е член на Реал Мадрид од 2013 година каде пристигна од екипата на Малага.

Франк Рибери синоќа доживеа сообраќајна несреќа, пишува италијански „Кориере дело спорт“. Искусниот 38-годишен Французин во три часот по полноќ бил сопатник во автомобил, кој удрил во столб за јавно осветлување. Со полесни повреди бил пренесен во болница во Батипаља, по што бил пуштен дома.

Полицијата била на лице место, а за несреќата пријави и клубот на Рибери, Салернитана.

„Франк Рибери, кој не го возел автомобилот, има полесни повреди на главата. Превентивно, ќе мирува во следните неколку дена“, соопштија од клубот во кој Рибери пристигна минатата година како слободен играч.

Поранешниот француски репрезентативец најдобрата година во кариерата ја мина во Баерн Минхен, каде во 2007 година пристигна од Марсеј и остана 12 години.

Пред да потпише за сегашниот клуб, тој две години го носеше дресот на Фиорентина.

Тој оваа сезона забележа 16 настапи за Салернитана, која е на последното место во Серија „А“ со 15 бодови.

Реал Мадрид е на добар пат оваа сезона да ја освои титулата во домашното првенство, а на лето се очекува реконструкција на екипата, како и заминување на неколку фудбалери, меѓу кои е и Марсело.

Бразилецот помина многу години во „кралскиот клуб“, па 33-годишниот играч има желба да ја заврши кариерата на „Сантијаго Бернабеу“.

„Мирен сум, ова е мој клуб. Сакам да ја завршам кариерата во екипата, но не е сè до мене. Има и други луѓе кои ќе влијаат на одлуката. Нема привилегии за никого. Чест ми е да сум еден од капитените на клубот“, вели Марсело. Дефанзивецот пристигна во Мадрид во 2007 година и сè уште го памети денот кога потпиша за „кралевите“.

„Пристигнав со мојот агент за да се запознаам со Мадрид. Моите работи сè уште беа во Флуминезе. Ѝ кажав на девојка ми дека го видов Бекам…“, открива Бразилецот.

Италијанскиот голгетер, Марио Балотели, кој сега е член на турскиот клуб Адана Демирспор, е убеден дека во однос на фудбалското знаење тој е на ист ранг со Лионел Меси и Кристијано Роналдо. 

„100 проценти сум убеден дека ги поседувам истите фудбалски квалитети како Меси и Роналдо. Меѓутоа пропуштив доста прилики во кариерата. Меси и Роналдо се повеќекратни освојувачи на Златната топка и е многу глупаво да се споредувам во тој сегмент,но ако гледаме од чисто фудбалски агол, јас сум на нивно ниво“, изјави Балотели.

Како најголема грешка во кариерата, Италијанецот го истакнува напуштањето на Манчестер Сити каде играше од 2010 до 2013 година.

Балотели има одлична сезона во дресот на Адана Демирспор. Тој на 24 натпревари има постигнато 11 гола.

Приоритет на Реал Мадрид во летниот преоден рок ќе биде доведување на врвен дефанзивец, пренесуваат шпанските медиуми.

Прва мета е дефанзивецот на Севиља и француски репрезентативец Жил Кунде. 23-годишниот стопер игра фантастично и го привлече вниманието на многу европски гиганти.

Минатото лето беше блиску до трансфер во Челзи, но сега Реал сериозно се вклучи во трката за Французинот.

Францускиот репрезентативец има договор со шпанскиот клуб до 2024 година во кој има откупна клаузула од 80 милиони евра.

Македонскиот фудбалски репрезентативец, Аријан Адеми, по се изгледа дека ќе биде фит за бараж мечот за пласман на СП во Катар против Италија, закажан за 24 март во Палермо.

Адеми, кој настапува за Динамо Загреб, заработи повреда на натпревар од хрватското првенство против екипата на Локомотива, поради што не играше на реваншот со Севиља во рамките на Лига Европа.

Според информациите од Хрватска, Адеми би требало да биде спремен за дербито со Хајдук кој се игра на 12 март, па така реално е да се очекува дека ќе биде на располагање и на селекторот Милевски за дуелот против Италија во Палермо.

Милан бара засилувања за средниот ред, што ќе биде приоритет во летниот преоден рок. Франк Кеси готово сигурно ќе замине како слободен агент, па „росонерите“ се во потрага по негова замена. Германски „Билд“ пренесува дека Милан е силно заинтересиран за играчот за врска на Бенфика, Јулијан Вајгл.

26-годишниот Германец игра одлично во Бенфика и го привлече вниманието на многу европски гиганти. Вајгл сака да направи чекор напред во кариерата, а Милан веќе стапил во контакт со неговиот агент.

„Росонерите“ се спремни да испратат понуда од 20 милиони евра, а се верува дека таа сума ќе ги задоволи апетитите на Бенфика.