Украинскиот фудбалски голман во редовите на  Реал Мадрид, Андриј Лунин, нема да прифати продолжување на соработката и набрзо ќе ги напушти „кралевите“, потенцираат речиси сите медиуми во Шпанија.

25-годишниот чувар на мрежата кој има тековен договор до крајот на сезоната, јасно стави до знаење дека не сака да му биде „златна “ резерва, Тибо Куртоа.

Лунин во новата фудбалска сезона нема ниту еден меч додека во претходната одигра 31 натпревар.

Голманот на фудбалскиот состав Ливерпул, Кевин Калехер,  навести дека сака да го напушти клубот  бидејќи ја нема посакуваната  минутажа, објавија денеска медиумите во Англија.

„Во последниве неколку години јасно кажав дека сакам да заминам во друг состав за да бидам стартер. Гледано од страна, одлуката не зависи од мене“, рече Келехер.

Неговото место дополнително ќе биде загрозено откако „црвените“ најавија дека од наредната сезона ќе го ангажираат Грузиецот, Мамардашвили.

Челниците на фудбалскиот состав, Милан, набрзо ќе му понудат нов договор на Давиде Калабрија, кој има тековна соработка до летото во 2025 година, наведува денес весникот „Газета дело спорт“. 

Дефанзивецот имаше имресивни нaстапи во претходната сезона и според проценките, беше еден од најдобрите во редовите на „росонерите“.

Милан веднаш по паузата за репрезентативните активности, в сабота ќе и биде домаќин на Вениција во новото коло во Серија A.

Поранешниот младински репрезентативец на Македонија, Агрон Руфати продолжува во редовите на Динамо Сити од Албанија.

Руфати се раздели со Брера каде што играше минатата сезона, а сега се одлучи да продолжи во Албанија.

Во Албанското првенство Динамо стартуваше со два порази, па сега сака да ја зацврсти одбраната со 25-годишниот дефанзивец.

Брера беше и единствен клуб за кој играше во Македонија.

Португалскиот фудбалски тренер Жозе Мурињо и раководството на Фенербахче и официјално тргнуваат по некогашниот англиски репрезентативец Киран Трипие.

Според медиумите во Турција, турците веќе стапиле во контакт со офанзивниот бек, а и тој побарал од раководството на Њукасл трансфер на Босфорот.

Преодниот рок во Суперлигата на Турција трае до 12 овој месец, па има и тоа како шанси и овој трансфер да се реализира.

Фудбалерот од средниот ред на Реал Мадрид, Џуд Белингем, ќе биде подготвен за натпреварот против Реал Сосиедад во рамки на 5. коло од Ла Лига, објави денеска весникот АС.

Белингем се повреди за време на тренинг минатиот месец кога го истегна мускулот на десната нога.

Според информациите, англискиот репрезентативец успешно закрепнува и не е исклучено да се најде во составот на Реал Мадрид за пресметката против Сосиедад.

Натпреварот на програмата е на 14 септември.

Германскиот стратег на кормилот на Барселона Ханси Флик беше избран за најдобар тренер во месец август и сосема заслужено го доби ова признание од Ла Лига, кое сигурно ќе биде дополнителна мотивација да се продолжи во ист ритам и во месец септември.

Тренерот на Барселона ја добил битката со Марселино Гарсија Торал од Вилјареал и Луис Гарсија од Алавес.

Ханси Флик со неговиот тим запиша четири победи на првите четири првенствени дуели во Ла Лига.

Капитенот на норвешката репрезентацијата и еден од најдобрите играчи на Арсенал, Мартин Одегард заработи тешка повреда на натпреварот со Австрија (2-1) во Лигата на нации.

Во 64. минута на натпреварот во Осло при резултат 1-1, по дуелот со гостинскиот играч Криштоф Баумгарнер, Одегард падна на земја и се фати за глава.

По натпреварот лекарот на репрезентацијата изјави дека фудбалерот го исчашил зглобот на левата нога, но дека се ќе се знае по деталните прегледи и ултразвук. Ако не се скинати лигаментите, би требало да се врати на терените за околу еден месец.

Еден од најдобрите француски фудбалери во историјата, Зинедин Зидан, како тренер го водеше само Реал Мадрид и тоа со многу успех.

По второто заминување од клупата на „кралевите“ во 2021 година Французинот се поврзуваше со многу клубови. Еден од најзагреаните за негов потпис беше Манчестер Јунајтед, а сега тој доби прашање дали би го водел клубот и даде интересен одговор.

„Дали би сакал да го водам Манчестер Јунајтед? Разбирам англиски, но не го говорам течно. Знам дека има тренери кои одат во клубови без да го зборуваат нивниот јазик перфектно, но јас работам на поинаков начин. Многу елементи треба да се поклопат за да победувате, тоа е глобален контекст“, изјави Зидан.

Како тренер со Реал Мадрид, Зинедин Зидан двапати беше шпански првак, трипати ја освои Лигата на шампионите, освои по два Суперкупа на Европа и Шпанија, а исто толку пати го крена и трофејот на Светското клупско првенство.

Убедливиот пораз од 3-0 од Романија ја наруши атмосферата во репрезентацијата на Косово, а ситуацијата кулминираше со денешната одлука на селекторот Франко Фода да отстрани од националниот тим тројца стандардни првотимци.

Станува збор за Аријанет Муриќ, Едон Женгрова и Флорент Муслија, кои нема да биде дел од репрезентацијата на Косово поради прекршување на правилата одредени од селекторот и од федерацијата.

„Со заедничка одлука на селекторот Франко Фода и на репрезентацијата, тројцата фудбалери Муриќ, Женгрова и Муслија се отстранети од репрезентативниот собир поради прекршување на дисциплинските правила“, се вели во соопштението на Косовската Фудбалска Федерација.

Засега не се откриваат детали како тројцата играчи ги прекршиле правилата, а објавено е дека дополнително е повикан голманот Фатон Малоку од Дрита, на местото на Муриќ кој настапува за премиерлигашот Ипсвич.