Тренерот на баварскиот гигант Баерн Минхен Венсан Компани, утрово се врати во клупската база на „Зебенер Штрасе“ по неколкунеделната пауза предизвикана од здравствени проблеми.

Белгискиот стратег пристигнал на своето работно место нешто по 10 часот.

На клупската база Компани бил пречекан од својот помошник Флорибер Нгалула, а потоа имал и подолг разговор со спортскиот директор Кристоф Фројнд. Од прозорецот на својата канцеларија го следел тренингот на повредените фудбалери, меѓу кои се Луис Дијаз и Џамал Мусијала.

Да потсетиме, на 23 октомври белгискиот стручњак колабираше покрај теренот за време на тренингот на вториот тим на Баерн и итно беше пренесен во болница.

При падот го изместил и рамото, а по деталните медицински прегледи му била дијагностицирана иритација на мозочните обвивки, по претходна инфекција и силни главоболки.

Во негово отсуство, тимот успешно го предводеа помошниците Арон Данкc и Рене Марич.

Младата репрезентација на Македонија до 21 година на 12 ноември во Нови Сад ќе одигра контролен натпревар против селекцијата на Србија. Дуелот ќе се одигра на стадионот „Караѓорѓе“ и ќе претставува сериозен предизвик и можност за проверка на потенцијалот на новата генерација македонски фудбалери.

Во пресрет на натпреварот, младинскиот репрезентативец Димитар Данев очекува тежок дуел против квалитетен противник, но верува дека Македонија има капацитет да одговори на предизвикот и да се наметне на теренот.

„Очекувам тежок натпревар против Србија. Станува збор за квалитетна селекција, но и ние имаме свои квалитети. Дојде до промена на генерацијата, но веќе имаме неколку заеднички собири и сметам дека од ден на ден напредуваме. Верувам дека ќе пружиме силен отпор и ќе стигнеме до позитивен резултат.

Се подготвуваме одлично. Србија е на исто квалитативно рамниште со репрезентациите против кои игравме во претходниот циклус. Имавме можност да се соочиме со неколку многу добри селекции, кои поседуваат исклучителен квалитет. Свесни сме со какви играчи располагаме и ова ќе биде вистински тест за да видиме до каде сме и што може да покаже оваа генерација“, истакнува Данев.

Тој смета дека фудбалерите се во добра натпреварувачка форма и дека подготвеноста нема да претставува проблем пред гостувањето во Нови Сад.

Хосам Хасан повеќе не е селектор на египетската фудбалска репрезентација. Фудбалскиот сојуз на Египет (ФСЕ), ја прекина соработката со легендарниот поранешен напаѓач, кој ја водеше репрезентацијата од 2024 година, не поради спортски резултати, туку поради скандали во неговиот приватен живот.

Откакзот е последица на инцидентот што се случи во август, кога во хотелски бар се случила жестока расправија меѓу двете од сопругите на Хасан. Расправијата ескалираше во физичка пресметка, а сведоци изјавија дека жените викале, фрлале предмети и се тепале, поради што интервенирал хотелскиот персонал. Делови од инцидентот биле снимени и раширени на социјалните мрежи.

Според извештаите на медиумите, ситуацијата толку многу го вознемирила Хасан што се онесвестил, по што бил однесен во болница.

Сопругите не поднеле официјални извештаи една против друга. Да ве потсетиме дека Хосам Хасан имал две сопруги истовремено со години, што е законски можно во Египет, каде што на муслиманите им е дозволено да имаат до четири сопруги.

Тој има три деца со својата прва сопруга Ховаида Ел-Гарбави, со која се ожени во 1994 година, додека со својата втора сопруга Дина Мустафа, позната како Дан Адам, се ожени во 2015 година и со неа има две деца.
Нивната врска заврши со голем скандал во август 2026 година, кога двете жени физички се пресметаа во хотелски комплекс во египетското одморалиште Порто Марина. По ова следеа разводи и правни спорови.

ФСЕ не го спомена директно инцидентот во своето официјално соопштение, но потврди дека причината за отпуштањето се неодамнешните настани што го нарушија угледот на националниот тим.

Италијанскиот тренер Симоне Инзаги одлучи да го напушти Ал-Хилал на крајот од тековната сезона.

Италијански извори тврдат дека Инзаги нема намера да остане во Саудиска Арабија, каде за две години ќе заработи над 50.000.000 евра.

Платата на Инзаги е дури 26.000.000 евра годишно, и иако Ал Хилал сакаше да го задржи, Инзаги одби да потпише нов договор.

Неговата следна дестинација не е позната, но сигурно е дека Инзаги ќе добие многу понуди за работа.

Тој бележеше извонредни резултати со Лацио и Интер, на „Олимпико“ го усоврши својот занает низ помладите категории, а потоа беше прв тренер од 2016 до летото 2021 година кога се пресели на „Џузепе Меаца“.

Со Интер, го освои Скудетото, играше во две финалиња на Лигата на шампионите, заедно со два трофеи во Купот на Италија и три во Суперкупот.

Тој го доби најсилниот тим во Ал-Хилал, но во првата сезона не успеа да го освои трофејот, бидејќи Ал-Наср со Кристијано Роналдо стана шампион со многу контроверзии.

Сепак, Ал-Хилал моментално е лидер на табелата и маршира кон титулата, но без оглед на резултатите, Инзаги ќе го напушти клубот.

Најдобрата репрезентација на Македонија го одржа денешниот тренинг пред последните два натпревари од групната фаза во Лигата на нациите. Избраниците на селекторот Гоце Седлоски ги очекуваат гостување против Шкотска во Глазгов и дуел со Словенија на домашен терен, а своите очекувања ги сподели повратникот во националниот тим, Дарко Чурлинов.

„Секогаш ми било чест да играм за овој дрес и секогаш ќе давам максимум. Се надеваме на најдоброто. Нормално дека ќе анализираме и ќе се обидеме сето она што тренерот ќе ни го каже да го пренесеме на теренот“, истакна Чурлинов.

Крилниот фудбалер смета дека добрата минутажа што репрезентативците ја имаат во своите клубови може да биде значаен фактор во претстојните предизвици.

„Минутажата во клубот е многу битна и таа енергија се пренесува и овде. Добро е што сите играме во своите клубови, што имаме минутажа, и верувам дека тоа ќе има позитивно влијание на овие два натпревари“, додаде македонскиот репрезентативец.

Чурлинов верува дека Македонија има квалитет да се надигрува со секој противник, без разлика на имињата и индивидуалниот потенцијал на спротивната страна.

„Шкотска ги има Мектоминеј, Гилмор, Робертсон, ние ги имаме Елиф Елмас, Барди и Столе Димитриевски. Денеска нема репрезентација што не може да се победи, така што тоа треба да го покажеме на теренот“, порача Чурлинов.

Македонија во петок ќе гостува кај Шкотска во Глазгов, додека три дена подоцна на домашен терен ќе ја пречека Словенија во последниот натпревар од групната фаза во Лигата на нациите.

Поранешниот селектор на Македонија и еден од најтрофејните тренери од нашата земја, Ѓоко Хаџиевски е најсериозен кандидат за нов тренер на Локомотив Софија, кој остана без шеф на стручниот штаб по разделбата со Љубослав Пенев.

Според бугарските медиуми, македонскиот стратег се очекува денеска да пристигне во Софија, каде треба да ги заврши преговорите со раководството на клубот и да потпише договор.

Како можна алтернатива се споменувал и Душан Косиќ, актуелниот тренер на Локомотив Пловдив, но преговорите за негов ангажман не успеале поради финансиските барања.

Хаџиевски последен пат го предводеше Спартак Варна, од каде си замина набргу по почетокот на сезоната. Во кариерата има искуство во бугарскиот фудбал, каде претходно работеше и во ЦСКА Софија.

Доколку договорот биде реализиран, Хаџиевски ќе добие нов предизвик во бугарската Прва лига.

ФИФПРО го објави тимот на годината, и тоа изгласан од членовите на светски познатиот синдикат.

ФИФПРО е фудбалско тело кое ги застапува интересите на 70 илјади фудбалери ширум светот, а како организација која функционира како глобален синдикат, редовно учествува во носењето на новите фудбалски правила, но и во избори кога се прашање најдобрите во светот.

Тимот на годината: Раја (Арсенал), Мендеш (ПСЖ), Хакими (ПСЖ), Кубарси (Барселона) Витиња (ПСЖ), Родри (Барселона), Белингам (Реал Мадрид), Јамал (Барселона), Мбапе (Реал Мадрид), Меси (Интер Мајами) и Халанд (Манчестер Сити).

Според ексклузивните информации на реномираниот новинар Дејвид Орнстин од „The Athletic“, раководството на клубот на Манчестер Јунајтед од „Олд Трафорд“ веќе ја подготвува смената на англискиот стратег по очајните резултати во тековната кампања.

Очекувањата се дека промената на менаџерската позиција ќе се реализира за време на тековната интернационална пауза, со цел новиот предводник да биде на клупата пред тешкото гостување кај Ливерпул на „Енфилд“ кое е закажано за 13 дена.

Меѓу главните кандидати за наследник на Керик високо котира актуелниот селектор на САД, Маурисио Покетино.

Клубот исто така има високо мислење за поранешниот менаџер на Њукасл, Еди Хау, како и за поранешниот германски селектор Јулијан Нагелсман.

Конечниот збор и официјалното одобрување на смената ќе треба да дојде од косопственикот Сер Џим Ретклиф (INEOS) и мнозинските сопственици, семејството Глејзер.

Селекторот на Франција, Зинедин Зидан, направи вистинско изненадување со дополнителното име кое го придодаде во својот список, откако реши да повика фудбалер кој се натпреварува во второлигашка конкуренција.

Сел Кумбеди е млад 21-годишен десен бек кој настапува за Волфсбург во втората германска Бундеслига, а иако беше повикан да биде дел од У-21 тимот на Франција, денеска доби дополнителен повик за да го замени повредениот дефанзивец на Јувентус, Пјер Калулу.

Кумбеди е првиот второлигашки фудбалер кој добива повик за најсилната француска репрезентација по пауза од речиси две децении, бидејќи последен пат такво нешто се случило во 2007-ма година со повиците кои ги добија Давид Трезеге и Жан-Ален Бумсонг.

Фудбалерот на Барселона, Пау Кубарси, ја доби наградата „Златно момче“ два месеци пред неговиот 20-ти роденден.

Кубарси беше еден од клучните играчи во триумфот на Шпанија на Светското првенство, освојувајќи ја наградата за најдобар млад играч на турнирот. Исто така, тој беше еден од предводниците на Барселона до титулата во Ла Лига.

Наградата „Златно момче“ ја доделуваат новинарите на најдобриот млад играч во една календарска година. Мора да имаат помалку од 21 година и да играат во една од најсилните лиги.

„Многу сум горд што ја добив наградата и им се заблагодарувам на сите што гласаа за мене“, рече Кубарси во видео емитувано од „Тутоспорт“.

Тој е првиот дефанзивец што ја освоил наградата по Матијс де Лихт во 2018 година и само втор откако наградата беше воведена во 2003 година.

„На дефанзивците им е потешко да добијат признание… Ние сме помалку во центарот на вниманието“, изјави Кубарси за Ројтерс.

На патот до светската титула, Шпанија прими само еден гол на турнирот, а Кубарси тргна по стапките на соиграчите Ламин Џамал, Гави и Педри.

Фудбалерката на Реал Мадрид и Шведска, Фелиција Шредер, ја освои наградата „Златна девојка“.