Дуелот на златната и бронзената репрезентација од последното Светско првенство, Шпанија и Англија, одигран во Лондон заврши со триумф на светскиот првак 3-2. Шпанија ја продолжи неверојатната серија под селекторот Де ла Фуенте, нема пораз на последните 40 натпревари.

Мечот на „Вембли“ беше навистина спектакуларен, донесе два пресврти, промашен пенал и пет гола.

Натпреварот започна лошо за домаќините. Веќе во втората минута, Марк Гуехи направи голема грешка во одбраната, што Ламине Јамал ја искористи и погоди за водство на Шпанија.

Гостите можеа да ја зголемат предноста, но Феран Торес ја пропушти најголемата можност во 27-та минута, кога излезе пред голманот Џејмс Трафорд, но шутираше покрај голот.

Англија одговори на средина од полувремето. Во 36-та минута, Ентони Гордон заврши брз контранапад со прецизен удар од работ на шеснаесетникот за израмнување. Само четири минути подоцна, Англија поведе. Хари Кејн со глава шутираше по центаршут од левата страна, а топката се одби од Марк Кукуреља на патот кон мрежата.

На почетокот на второто полувреме, Англија доби шанса да го зголеми своето водство. Во 53-та минута, по прегледувањето на снимката, судијата досуди пенал за прекршокот на Родри врз Белингам. Хари Кејн се лизна за време на шутот и топката заврши во пречката.

Казната за промашувањето дојде брзо. Во 60-та минута, Нико О’Рајли му ја продаде топката на Дани Олмо, кој веднаш го пронајде Алекс Баена, а шпанскиот играч од средниот ред постигна гол од дваесет метри за резултат 2-2. Целосен пресврт се случи во 74-та минута. Акцијата ја иницираше Педри, а Алекс Баена потоа му асистираше на Микел Ојарзабал, кој елегантно го префрли голманот на Трафорд и ги постави конечните 2-3.

По повеќе од пет години, селекторот на Грузија, Вили Сањол се повелече од функцијата, промената доаѓа по вчерашниот пораз од Северна Ирска.

Сањол си поднесе оставка по вчерашниот натпревар кој Грузија го загуби со 0-1 на отворањето на новата сезона во Лигата на нации.

Французинот беше селектор на Грузија од февруари 2021 година. Под негово водство Грузијците одиграа 57 натпревари и се квалификуваа на Европското првенство за првпат во нивната историја.

За нов селектор е назначен Рамаз Сванадзе кој претходно беше тренер на Грузија У21.

Македонија денес одигра лош меч против Швајцарија, не создадовме ниту една прилика, противникот беше доминантен во целиот тек на мечот и на крајот победи со 3-0.

По натпреварот свое видување даде селекторот Гоце Седлоски кој беше разочаран од изданието на неговите фудбалери.

„Сакам да ѝ честитам на Швајцарија, тие се една светска сила. Ние треба многу да учиме и да работиме, Швајцарија е Швајцарија. Ние сакаме нешто да подмладиме со репрезентација и полека, полека тоа го правиме“, вели Седлоски.

„Игравме со репрезентација кој има квалтетен играч на секоја позиција, посилна репрезентација досега не гостувала во Скопје, не само сега, туку и во периодот кога јас бев фудбалер. Беа предоминантни на секој дел од теренот, но ние не смееме да примаме голови по наши грешки, тие се велесила, но ние мора да покажеме и карактер, тоа секогаш го барам од фудбалерите. Кај некои играчи денеска тоа не го видов и во иднина ќе играат фудбалери кои играат во клубовите. Разговарав со фудбалерите и тој што ќе заслужува во иднина ќе биде на теренот, денеска од одредени фудбалери не бев задоволен од тоа што го покажаа. Во ваков натпревар се гледа каков карактер си, никогаш не треба да се плашиш и тоа го барам од нив. На тренинзите сите беа одлични, но вечерва имаше и такви кои потфрлија“.

„Презадоволен сум од Гаштаров кој покажа како треб да се игра за Македонија со срце и борбено од почеток до крајот. Одличен беше и Мелиќи“.

Македонија одигра лош меч против Швајцарија и покрај тоа што Столе Димитриевски беше одличен на нашиот гол.

Во текот на натпреварот Димитриевски имаше неколку фантастични интервенции и спречи потежок пораз за нашата репрезентација.

Тој смета дека мора да ја подобриме играта во одбраната, бидејќи противниците создаваат многу шанси.

„Дефинитивно противниците имаат голем број на напади кон мојот гол. Треба да бидеме по концентрирани, пофокусирани во таа дефанзива, да се браниме подобро од тоа што се браниме бидејќи тоа беше наша карактеристика. Треба да ја подобриме дефанзивата, ако одбраната е добра, ќе биде добар и нападот“, вели Димитриевски.

Фудбалерот на Реал Мадрид, Килијан Мбапе, заработи повреда на вчерашниот меч во Турција. Напаѓачот на Франција откако го постигна голот за победа веднаш беше повлечен од игра.

Станува збор за обновување на старата повреда на левото колено која му создаваше сериозни потешкотии и во претходната сезона. ​

Тој веднаш го напушти кампот на „триколорите“ и се врати во Мадрид. Таму деновиве ќе биде подложен на детални лекарски прегледи.  

Македонската фудбалска репрезентација потфрли против Швајцарија и одигра уште еден натпревар во кој не постигнавме гол.

Првпат врзавме пет натпревари без да постигнеме гол. Против Швајцарија не само што не успеавме да ја затресеме противничката мрежа, туку немавме ниту еден шут во рамките од голот на противникот.

Шанса да го прекинеме постот имаме веќе во вторник кога ѝ гостуваме на Словенија.

Македонската фудбалска репрезентација со пораз го започна учеството во Б сегментот во групата -1 во Лигата на Нации.

На Арената во Скопје пред повеќе од 16.000 гледачи загубивме од селекцијата на Швајцарија со убедливи 0-3. Два гола за гостите постигна Амдуни а еден Фројлер. Во вториот меч во групата Словенија и Шкотска одиграа 0-0.

Македонија во второто коло на 29 септември ќе гостува кај Словенија додека Швајцарија ќе се појави на теренот на Шкотска.

Манчестер Јунајтед веќе подолго време не е конкурентен за најголемите трофеи, но клубот е машина за правење пари, нивната последна идеја може да им донесе огромни пари.

Во продажба излегоа парчиња трева од „Олд Трафорд“. Тревата е од минатото лето кога првпат по 14 години беше заменета тревната подлога на стадионот. Клубот тогаш се сети да им го продаде теренот на фановите.

Теренот е исецкан на мали парчиња со димензија 7х7 сантиметри кои се убаво спакувани во стаклени коцкички и се продаваат во фан шопот на Јунајтед за сума од 145 евра.

Математиката вели дека коцки со димензија од 7х7 сентиметри може да се исечат вкупно 1.456.500 од терен кој е со димензии 110×68 метри колку што е „Олд Трафорд“.

Хипотетички, ако Јунајтед ги продаде сите коцки, би заработил 211.285.590 евра. Колку за споредба, замената на теренот ги чинеше околу милион и пол евра.

Норвешкиот напаѓач Ерлинг Браут Халанд ја презеде круната од бесмртната легенда на Шведска, Златан Ибрахимовиќ, и се прогласи за нов крал на стрелците во Скандинавија.

Халанд го сруши рекордот што го држеше Ибрахимовиќ како најдобар стрелец во историјата на скандинавските репрезентации.

Халанд има 64 меѓународни гола на само 56 натпревари, надминувајќи го Ибрахимовиќ кој даде 62 гола во 122 настапи за Шведска.

Халанд постигна девет гола за Норвешка во последните шест настапи. Тој постигна седум на Светското првенство и два гола против Данска во Лигата на нации.

Шпанскиот репрезентативец и фудбалер на Барселона, Дани Олмо повторно е во центарот на вниманието.

Тој за Барселона сезонава ги одигра сите натпревари (седум), но стартер беше само на две. Тренерот Ханси Флик поради големата конкуренција често ротира со составот.

Олмо беше дел од шампионскиот состав на Шпанија на Светското првенство како и пред две години на Европското првенство.

Според информациите на Скај Спорт, Германскиот шампион Баерн има желба да го има 28-годишниот фудбалер во своите редови и трансферот би можел да се случи и во јануари.

Тимот од Минхен подолго време го „следи“ Олмо, а шпанскиот репрезентативец имаше одлични четири сезони и како член на германската екипа Лајпциг.