Баерн со убедливата победа од 5-1 против Келн ја прослави новата титула во Бундеслигата, а пред последниот домашен натпревар сезонава клубот се прости од тројца фудбалери кои заминуваат на крајот од сезоната, Леон Горецка, Рафаел Гереиро и Николас Џексон.

Најемотивно беше збогувањето со Горецка, кој со години беше еден од клучните играчи во една од најуспешните генерации на Баерн. Навивачите на „Алијанц арената“ го испратија со громогласен аплауз и транспаренти во негова чест.

Германскиот репрезентативец во изминатите осум години се изгради во вистински лидер во соблекувалната, а кај навивачите стекна голема почит поради борбеноста и посветеноста кон клубот.

Иако во последните сезони не беше секогаш во прв план, Горецка остана важен дел од тимот и играч на кој тренерите имаа доверба во најважните натпревари. За Баерн одигра 311 натпревари, постигна 51 гол и запиша 53 асистенции, а според најавите кариерата најверојатно ќе ја продолжи во Милан.

Од навивачите се прости и Португалецот Рафаел Гереиро, кој беше исклучително корисен играч во ротацијата и покриваше повеќе позиции според потребите на тимот.

Откако пристигна од Борусија Дортмунд во летото 2023 година, Гереиро одигра 94 натпревари за Баерн, со учинок од 14 голови и осум асистенции. Германските медиуми пишуваат дека Бенфика покажува сериозен интерес за 32-годишниот Португалец.

Минхенскиот гигант го напушта и напаѓачот Николас Џексон, кој по истекот на позајмицата се враќа во Челзи. Сенегалецот сезонава беше резерва за Хари Кејн и постигна 11 голови со четири асистенции на 34 натпревари.

Репрезентацијата на Шпанија ќе важи за еден од главните фаворити на претстојниот Мундијал, но според најавите од шпанските медиуми, „црвената фурија“ би можела да настапи без ниту еден фудбалер на Реал Мадрид.

Во пресрет на објавувањето на конечниот список на селекторот Луис де ла Фуенте, се појавија информации дека стоперот Дин Хујсен нема да добие повик за Светското првенство. Наводно, селекторот смета дека дефанзивецот на Реал не одиграл сезона на посакуваното ниво и дека има играчи кои повеќе заслужуваат место во националниот тим.

Ваквите најави претставуваат изненадување ако се знае дека Хујсен минатата година беше стандарден член на шпанската репрезентација, а во меѓувреме направи и голем трансфер во Реал Мадрид. Тој беше и стартер на завршниот турнир во Лигата на нации, каде што Шпанија стигна до финалето и ја совлада Франција во полуфиналето, а потоа загубија од Португалија по изведувањето пенали.

Доколку ваквото сценарио се оствари, Реал Мадрид најверојатно ќе остане без свој претставник во шпанската репрезентација на Светското првенство. Хујсен беше единствениот фудбалер на мадридскиот клуб кој доби повик за последните натпревари против Србија и Египет, откако претходно од комбинација отпадна и Карвахал.

Иако во последните две децении фудбалерите на Реал немаа доминантна улога во националниот тим, досега не се случило Шпанија на големо натпреварување да настапи без ниту еден играч од „кралскиот клуб“.

Шпанскиот тренер Чаби Алонсо ја прифати понудата на Челзи и во наредната сезона ќе ги предводи „сините“ од Лондон. Премиерлигашот сезонава смени двајца тренери Енцо Марсека и Лиам Росениор, а сезоната на клупата ја завршува Калум Мекфарлан.

Челзи ја објави одлуката за новиот менаџер истиот ден кога доживеа пораз во финалето на ФА Купот од Манчестер Сити и на тој начин остана без учество во европските купови следната сезона.

Веста за постигнатиот договор ја пренесоа повеќе британски медиуми.

Чаби Алонсо оваа сезона ја почна како тренер на Реал Мадрид, но под притисок од фудбалерите доби отказ откако претходно успешно го водеше Баер Леверкузен со кој освои титула во Бундес лигата без пораз.

Инаку, Чаби Алонсо во Премиер лигата настапуваше за екипата на Ливерпул и се очекуваше тој да седне на местото на Арне Слот.

Јувентус започна прелиминарни преговори за потпишување на Џорџо Скалвини од Аталанта за да го привлечат во летото, објавува „Тутоспорт“.

За да учествува на европските клупски турнири, Јувентус мора да има минимум осум домашни играчи на листа од 25 фудбалери.

Од нив најмалку четворица од нив мора да бидат млади. „Бјанконерите“ моментално го заземаат третото место на табелата во Серија А.

Дани Карвахал ќе го напушти Реал Мадрид на крајот на оваа сезона.

Капитенот веќе нема договор со клубот, а иако имаше најави за можни преговори за продолжување на соработката, тоа нема да се оствари.

Десниот бек на Реал Мадрид често се соочуваше со повреди, а со оглед на тоа дека има 34 години, јасно е дека не може да го даде истиот придонес како претходно, па решил да ја напушти екипата како слободен агент.

За Реал Мадрид ова не претставува проблем, а Карвахал нема да се пензионира, туку ќе бара нов клуб.

Поголемиот дел од својата кариера го минал како фудбалер на Реал Мадрид, освен во сезоната 2012-13 кога играше за Леверкузен, продаден за пет милиони евра, но брзо бил вратен во Мадрид со посебна клаузула.

Во шпанската репрезентација настапил 52 пати, при што постигнал еден гол.

Италијанскиот фудбалер Самуеле Инасио го продолжи денеска договорот со Борусија Дортмунд до јуни 2029 година.
Инасио дојде во Борусија во 2024 година од редовите на Аталанта.

Оваа сезона, 18-годишниот Инасио одигра шест натпревари во Бундеслигата, а го постигна својот прв гол за Дортмунд во победата од 3-2 против Ајнтрахт Франкфурт.

„Многу сум среќен во Дортмунд и горд што дебитирав во Бундеслигата во овој голем клуб. Чувството да го постигнам првиот гол пред „жолтиот ѕид“ беше неверојатно и сакам да прославам уште многу успешни моменти со мојот тим и навивачите во иднина“, рече Инасио.

Египетскиот фудбалер Мохамед Салах потврди дека по девет години ќе стави крај на својата ера на „Енфилд“. Иако неговиот договор истекува во јуни 2026 година, а веќе искусниот напаѓач веќе се поврзува со неколку атрактивни дестинации, а најновата понуда доаѓа од Турција.

Според турските медиуми, Фенербахче е подготвен да тргне по потписот на 33-годишниот офанзивец и веќе започнал контакти со неговиот менаџер.

Клубот од Истанбул наводно му подготвил тригодишен договор вреден дури 60 милиони евра, односно 20 милиони евра по сезона.

Иако зад себе има сезона која статистички е послаба од претходните, со 12 голови и девет асистенции во 38 натпревари, интересот за Салах не стивнува.

Дел од причините за неговото заминување од Ливерпул се поврзуваат и со нарушениот однос со тренерот Арне Слот, кој во неколку наврати го остави надвор од тимот.

Екипата на Брегалница од Штип е на една победа од Првата лига, затоа што на гостински терен славеше над ГФК Осогово со 3-0 и пред својата публика ќе игра за првата позиција и шампионскиот пехар.

Штипските „сини“ останаа на врвот, а зад нив е Скопје. Во последното коло, Брегалница игра дома со веќе испадната Победа.

Скопје е на позицијата која води во бараж исто така со 65 бода, откако убедливо со 7-1 го победи Големо Коњари како гостин. Шкендија Арачиново е на третата позиција која исто така води во баражот, откако го доби Новаци пред својата публика со 5-1.

Временските услови наметнаа претпазлив почеток, бидејќи играчите ги дочека дожд кој придонесе теренот да стане на моменти премногу лизгав, а на одредени делови да има застоена вода која го спречуваше нормалното транзитирање на топката.

Пелистер прв се осоколи по стартното испитување на силите, па уследија две шанси: првата во 8. минута по асистенција на Бошковски до Ивановски, а втората во 20. минута кога шутираше Спировски. Сепак, Тиквеш дојде прв во водство и тоа по еден соло пробив на Ацковски во шеснаесетникот на битолчани, кога во неколку потези ја матираше комплетната одбрана во „зелено бели“ дресови.

Тоа се случи во 29 минута, а неполни десет минути подоцна, Тиквеш го зголеми водството откако Сила го реализираше досудениот пенал, што е негов шест погодок оваа сезона. Оваа казна дојде по дуелот на Ристовски со Лавал, каде што влечењето на дресот на противникот беше санкционирано од главниот судија.

До крајот на првиот дел Пелистер создаде уште две полушанси, прво во 42 минута Булатовиќ центрираше, а одбиената топка од Рамадани дојде до Ристовски кој биеше непрецизно, додека второто генијално додавање на Бошковски до Ивановски беше стопирано поради офсајд на напаѓачот.

Вториот дел донесе почетна иницијатива за Тиквеш и неколку удари од аголот, но пласираните удари од недоизработените позиции не беа никаква опасност за голот на Пелистер. Лусијањино во два наврати предводеше контра напади, при што во првиот го проигра Куел, а во вториот самиот биеше во Јовчевски.

По одиграни 60 минути, силите на теренот драстично се сменија и Тиквеш му ја препушти иницијативата на гостинскиот тим. Во 63. минута Керим го проигра Ивановски, овој ја затресе мрежата, но судијата по проверка од ВАР собата досуди офсајд. Во 72. минута Милојевиќ асистираше по средината, за Ивановски да реализира и да донесе надеж за Пелистер. Само три минути подоцна, битолчани израмнија – повторно преку Ивановски кој се наметна како човек на мечот – при што овој пат Керим дриблаше по левата страна, а уфрли топка на втората статива покрај лошо поставената одбрана на кавадарчани.

За комплетен пресврт фалеше малку: Пелистер ја затресе мрежата на Стевковски откако нафрлената топка од Србијанац всушност заврши во мрежата, но со асистенција од ВАР собата беше досуден уште еден офсајд на Мирко Ивановски кој се обиде да ја закачи топката со глава.

Единствена шанса во финишот Тиквеш имаше во 83. минута кога повторно имаа неколку удари од аголот, а во еден од нив Сила со глава го принуди Јовчевски на нова интервенција со боксување во уште еден корнер.

Со овој бод Пелистер дојде на 37 поени и ја премина Брера на 8. место при што двата тима имаат по 37 бода, но битолчани имаат подобра гол разлика. Во последното 33. коло Пелистер е домаќин на Башкими кој е на 7. место со 42 бода, па нивниот дуел само ќе биде одлучувачки за 8 и 9 место, односно за тоа кој клуб од ПМФЛ ќе се сретне со второпласираниот односно третопласираниот тим од ВМФЛ, во баражот за обезбедување место во елитното друштво.

Спортскиот директор на Милано, Игли Таре, ќе ја напушти таа позиција на крајот од сезоната.

Како што беше најавено во претходните денови, во Милано владее хаос, на една страна е Златан Ибрахимовиќ, а на другата спортскиот сектор со Таре и Макс Алегри.

Италијанските медиуми потврдија дека Игли Таре ќе го напушти клубот откако не ги исполнил очекувањата. Пропаднат трансфер на Матета од Кристал Палас, како и многу засилувања кои потфрлија како Јашари и Естуњан, доведоа до одлука да биде отпуштен Игли Таре.

Исто така, се додава дека Таре би можел да го замени Тони Д’Амико, досегашниот спортски директор на Аталанта, кого на крајот од сезоната ќе го замени Кристијано Ѓунтоли.

Милано сè уште се бори за пласман во Лига на шампиони, но на крајот не се исполнети очекувањата, бидејќи Интер одамна избегал во трката за скудетото.