Фулам официјално ги потврди трансферите на Гонзало Гарсија и Сезар Паласиос од Реал Мадрид, продолжувајќи со засилувањата пред новата сезона во Премиер лигата.

Лондонскиот клуб за 22-годишниот напаѓач Гонзало Гарсија издвои околу 34 милиони фунти, додека за 21-годишниот играч од средниот ред Сезар Паласиос плати приближно 8,5 милиони фунти. Двајцата фудбалери потпишаа договори на пет години, со можност за продолжување на соработката за уште една сезона.

Гарсија и Паласиос добро му се познати на менаџерот на Фулам, Алваро Арбелоа, кој во минатото работеше во младинскиот погон на Реал Мадрид и одигра значајна улога во нивниот развој.

По официјалната промоција, Гарсија не ја криеше својата радост.

„Многу сум благодарен и среќен што сум тука. Сакам да им се заблагодарам на раководството на клубот и на Арбелоа за довербата. Со нетрпение очекувам да започнам и да му помогнам на тимот“, изјави новиот напаѓач на Фулам.

Челзи официјално го потврди ангажманот на искусниот англиски репрезентативец Џордан Хендерсон, кој потпиша двегодишен договор со лондонскиот клуб.

Поранешниот капитен на Ливерпул, кој во својата богата кариера освои осум трофеи, меѓу кои и Премиер лигата и Лигата на шампионите, ќе му се приклучи на тимот од „Стемфорд Бриџ“.

По потпишувањето на договорот, Хендерсон не го криеше задоволството што ќе го носи дресот на „сините“.

„Со оглед на големината на клубот, менаџерот, кого многу го почитувам, и квалитетот на играчите, ова беше огромна можност што не можев да ја одбијам. Бев импресиониран и од амбицијата на сопствениците да го вратат Челси на врвот и да го движат клубот во вистинската насока“, изјави Хендерсон.

Тој додаде дека ќе се обиде со своето искуство да придонесе за успехот на екипата.

„За мене е важно секој ден да давам максимум, и на теренот и надвор од него, за да им помогнам на соиграчите и на тимот. Со нетрпение очекувам да започнам со работа“, порача искусниот играч од средниот ред.

Крилниот напаѓач на Пари Сен Жермен, Хвича Кварацкелија, го искористи летото за интензивни подготовки со цел да влезе во новата сезона со јасна цел, освојување на Златната топка. „Лекип“ изненадувачки го прогласи грузискиот напаѓач за прв фаворит за освојување на Златната топка оваа година.

Иако го пропушти Светското првенство во 2026 година, бидејќи Грузија не успеа да се квалификува за турнирот што се одржа во САД, Мексико и Канада, Кварацкелија не се откажа од својата амбиција да ја освои Златната топка.

Според „Лекип“, крилниот напаѓач на ПСЖ го помина летото на индивидуални тренинзи наместо на одмор за да го дочека почетокот на сезоната во врвна форма. Неговиот план е да има одличен почеток пред да започне гласањето за престижната награда на почетокот на септември.

Во тој период, неговите соиграчи кои играа на Светското првенство, како Усман Дембеле, веројатно сè уште ќе го фаќаат натпреварувачкиот ритам. Кварацкелија се надева дека одличниот почеток на сезоната ќе го одржи меѓу главните кандидати.

Њукасл Јунајтед го официјализираше своето петто засилување во летниот преоден рок. Голот на „страчките“ ќе го брани чешкиот репрезентативец Лукаш Хорничек (24), кој пристигнува од Брага. Англискиот клуб ја активираше откупната клаузула од 30 милиони евра.

Хорничек потпиша петгодишен договор со клубот од „Сент Џејмс Парк“ и веднаш им се придружи на своите нови соиграчи на тренинзите во Шпанија.

Високиот чешки голман (197 см) ја започна својата кариера во својата татковина во јуниорските категории на Пардубице, од каде што замина во Брага во 2019 година.

По години поминати во вториот тим и постепено докажување, Хорничек буквално експлодираше минатата сезона и го привлече вниманието на богатите англиски клубови.

Чехот беше еден од најзаслужните за пласманот на Брага во полуфиналето на УЕФА Лигата на Европа, каде што запиша дури седум натпревари без да прими гол.

Одличните игри му донесоа покана за чешката репрезентација на неодамнешното Светско првенство во 2026 година.

Македонскиот репрезентативец Дарко Чурлинов на одличен начин ја започна својата авантура во дресот на Погон Шчечин. Новото засилување на полскиот прволигаш веднаш доби доверба од тренерот и беше стартер на гостувањето кај Краковија, каде неговиот тим славеше со убедливи 2-0.

Чурлинов помина 60 минути на теренот и остави солиден впечаток на своето официјално деби, пред да биде заменет во второто полувреме. Имаше и добра шанса во првиот дел за своето деби да го круниса со погодок, меѓутоа не реализираше.

Погон до предност стигна уште на стартот од вториот дел, а победата ја потврди со втор погодок во самиот финиш од натпреварот.

Со овој триумф, тимот од Шчечин ја продолжи успешната серија на стартот од новата сезона, а Чурлинов веднаш покажа дека ќе има важна улога во составот.

Актуелниот европски првак ПСЖ му се приклучи на Јувентус во трката за потписот на голманот на Парма, Зион Сузуки, испраќајќи официјална понуда за јапонскиот репрезентативец.

Италијанските медиуми јавија денеска дека францускиот тим е подготвен да плати 33 милиони евра обесштетување. Сузуки, кој е роден во Њујорк, се етаблираше во еден од најдобрите голмани во Серија А откако ѝ се приклучи на Парма, одигрувајќи 57. натпревари во италијанската прва лига.

Голманот на јапонската репрезентација има договор со Парма до 2029 година.

Искусниот кошаркар на Хјустон рокетс изјави дека сака да игра на Олимписките игри во 2028 година во Лос Анџелес, но нагласува дека мора да заработи место во тимот.

Дурант на настан организиран од USA Basketball нагласи дека конечната одлука нема да биде во негови раце, туку во рацете на директорот на репрезентацијата Грент Хил и стручниот штаб.

– Сè зависи од Грент Хил и од тоа што сака репрезентацијата на САД. Ќе продолжам да работам и да го одржувам моето ниво на игра, па се надевам дека ќе добијам повик. Има многу одлични играчи кои заслужуваат место во тимот – рече Дурант.

Дурант е првиот машки кошаркар кој освоил четири златни медали. Тој ја освои и најпрестижната награда во Лондон 2012, Рио де Жанеиро 2016 и Токио 2021.

Парма постигна усмен договор со Аталанта за позајмица на напаѓачот Ел Билал Туре.

Според изворот, договорот вклучува опција за откуп на играчот за 11 милиони евра. Сега Парма мора да преговара со самиот играч за условите на соработка во случај неговата позајмица да заврши со целосен трансфер.

Ел Билал Туре игра за Аталанта од 2023 година, но во овој период играше и како позајмен играч во Штутгарт и Бешикташ. Минатата сезона одигра 26 натпревари за тимот од Истанбул во сите натпреварувања, постигнувајќи седум гола и запишувајќи пет асистенции.

Динамо Загреб и ПСЖ си подадоа рака за 18-годишниот Ноа Нсоки, фудбалерот патува кон Хрватска да го комплетира трансферот.

Станува збор за млад фудбалер чија примарна позиција е лево крило, но може да настапува и како офанзивен играч од средниот ред.

Во Загреб ќе пристигне среда или четврток, а откако ќе ги мине лекарските прегледи ќе стави потпис на петгодишен договор со хрватскиот гигант.

Интересен е договорот меѓу двата клуба. Динамо Загреб нема да плати ништо за Ноа Нсоки, но половина од сумата за која ќе биде продаден во иднина ќе оди на сметка на францускиот клуб.

Нсоки минатата сезона неколкупати тренираше со првиот тим на ПСЖ, а запиша и два настапа како резерва, вкупно минувајќи 36 минути на теренот во сениорскиот состав.

Во младинскиот тим на парискиот гигант одигра 39 натпревари, на кои постигна 10 голови и запиша шест асистенции, со што го привлече вниманието на Динамо, кој повторно се насочува кон развој на млади и перспективни фудбалери.

Шкендија која остана единствен претставник на Македонија во Европа, денеска го дозна можниот противник за плеј-офот од Конференциската лига.

Ако го помине Хибернијан во третото квалификациско коло, Шкендија ќе игра со победникот од дуелот меѓу Гетеборг и Гент.

Иако станува збор за сериозни клубови, Шкендија може да биде задоволна од ждрепакта со оглед на тоа што можеше да добие некој од Брајтон, Монако, Салцбург, Пафос…

Првиот меч од плеј-офот се игра на 20 август, реваншот е седум дена подоцна. Но, за да се дојде до тие натпревари најпрво треба да се мине Хибернијан, дуелот со шкотскиот тим почнува веќе во четврток.