Македонскиот напаѓач Влатко Стојановски кариерата ќе ја продолжи во Хрватска. Од хрватските медиуми пренесуваат дека Стојановски во понеделник ќе пристигне во Горица и официјално ќе стане играч на овој клуб.

За Стојановски ова нема да биде прв ангажман во Хрватска, претходно настапуваше за Сплит, Неретванац и Дугопоље. Во 2018 година се врати во македонскиот фудбал потпишувајќи за Ренова.

Во Франција без поголем учинок го носеше дресот на Шамбли и Ним.

Ќе потсетиме, Стојановски беше дел од македонската репрезентација на Европското првенство и одигра 12 минути во поразот од Холандија.

Челниците на Шкендија соочени со револтот на навивачката група „балисти“ и слабите резултати во Евро-куповите, се определија да ја прекинат соработката со тренерот, Ернест Ѓока, стои во објавата на официјалниот сајт на тетовскиот клуб.

„Шкендија ја раскина соработката со тренерот Ернест Ѓока. Постигната е взаемна согласност за раскин на договорот“, стои во соопштението на нашиот фудбалски клуб.

Македонскиот шампион со двата пораза од Мура беше елиминиран во првото квалификациско коло во Лигата на шампионите а синоќа го заврши и настапот во квалификациите за место во Конференциската лига на Европа. Тетовчани беа елиминирани од Рига.

Џорџо Киелини останува верен на екипата на Јувентус и ќе потпише нов двегодишен договор со „старата дама“.

Имено, дефанзивецот кој беше извонреден на Европското првенство и беше меѓу најзаслужните за триумфот на Италија обелодени дека се враќа во Торино гладен за да освои пехари.

„Сакам да подигнам уште трофеи, бидејќи тоа ве прави само погладен да го сторите тоа повторно – и носењето дрес на Јувентус без симболот на Скудето на градите претставува дополнителна мотивација. Ми требаат уште неколку дена да се одморам и да се опоравам од хаосот од минатиот месец, но во понеделник ќе бидам во Торино и сум среќен што повторно ќе започнам.“ -порача Киелини, кој во Јувентус е од 2005. година и досега покрај освоените титули, има постигнато 36 голови и запишано 24 асистенции.

Севиља може да конкурира за потписот на дефанзивецот на Шалке, Озан Кабак, кој во последната половина од претходната сезоната играше како позајмен во Ливерпул.

Иако главен фаворит за потпис на 21-годишниот играч беше Лестер, англичаните сепак се откажаа во последен миг бидејќи не сакаа да ги платат 17-те милиони евра што ги бараше германскиот тим.

Медиумите наведуваат дека целата ситуација може да ја искористи Севиља и да го ангажира турскиот интернационалец.

Легендарниот шкотски фудбалски стручњак Алекс Фергусон ќе добие споменик пред стадиониот „Питодрие“ на Абердин, како признание за неговиот успех во тој клуб.

Фергусон го водеше шкотскиот клуб од 1978. до 1986. пред да се пресели на клупата на Манчестер Јунајтед. Со Абердин освои три титули во шкотското првенство, четири Куп титули и Куп на победниците на куповите.

По преземањето на Јунајтед, тој освои дури 38 трофеи со англискиот клуб.

„Воодушевен сум и почестен со ова признание. Во Абердин поминав фантастичен и незаборавен дел од својата менаџерска кариера.“ – рече Фергусон.

Бронзената статуа ќе се темели на фотографија од Фергусон кој слави освојување на трофејот шкотски првак во 1980. година.

Голманот на ПСЖ, Алфонс Ареола, кариерата ќе ја продолжи во англиската Премиер лига. 

Французинот ќе оди во Вест Хем Јунајтед на позајмица. Договорот ќе вклучува опција за откуп на 28-годишниот голман. Договорот на Ареола со Парижаните важи до 30 јуни 2023 година. Трансфермаркт го проценува голманот на 17 милиони евра.

Алфонс Ареола потекнува од школата на ПСЖ, а од  2013 година, голманот настапуваше со позајмица во Ленс, Бастија, Виљареал и Реал Мадрид. Ареола играше за Фулам минатата сезона каде бранеше на 36 натпревари во Премиер лигата, на кои прими 48 гола.

Претседателот на Србија, Александар Вучиќ, кој е во официјална посета на нашава земја, вчера имаше средба со легендарниот македонски фудбалер, Дарко Панчев.

Првиот човек на нашиот северен сосед објави фотографија со вардаровата икона, која со белградска Црвена Ѕвезда стана европски и светски шампион и воедно ја освои престижната награда -„златна копачка“ на Европа.

„Со македонската и југословенската легенда Дарко Панчев. Чест ми е што можев да се сретнам со голем шампион“, објави Вучиќ на социјалните мрежи.