Фудбалерите на Шкендија ако ја елиминираат летонската Рига во второто коло во конференциската Лига, тогаш ќе играат со подобриот од пресметката меѓу Фолгоре од Сан Марино и Хибернианс од Малта.

Споредено со квалитетите на тие два тима, македонскиот шампион би требало да има полесен пат да стигне и до групната фаза во новото европско натпреварување.

Нашиот втор учесник Шкупи доколку ја „скокне“ Санта Клара од Португалија, тогаш во третото ќе игра со победникот од пресметките меѓу Олимпија Љубљана (Словенија) и Биркиркара од Малта.

Капитенот на Астон Вила, Џек Грилиш размислува дали да го напушти клубот. Интерес за него има од Манчестер Сити, но англискиот репрезентативец се сомнева во трансфер кај „граѓаните“.

Според информациите, Грилиш размислува дури и да потпише нов договор со Астон Вила, иако со постоечкиот е обврзан со клубот до 2025 година.

Тој има предлог од клубот да го продолжи договорот за една година и да ја зголеми платата на 150 000 фунти неделно.

Младиот белгиски фудбалски репрезентативец Алберт Самби Локонга (21) ги напушти редовите на Андерлехт и кариерата ќе ја продолжи во лондонски Арсенал.

Клубовите не го објавија износот на трансферот, но медиумите шпекулираат дека Арсенал ќе плати околу 17 милиони евра за 21-годишниот фудбалер.

Локонга за сениорскиот состав на Андерлехт дебитираше во 2017. година, откако помина низ клупската академија. Минатата сезона беше стандарден првотимец запишувајќи 37 настапи, три гола и асистенции.

„Алберт е многу интелигентен играч кој покажа голема зрелост во своите настапи во текот на неговиот развој.“ – вели тренерот на Арсенал, Микел Артета.

Младиот Белгијанец е второ засилување за Арсенал сезонава, откако го доведоа дефанзивецот Нуно Таварес од Бенфика.

Неименуван фудбалер на англискиот премиерлигаш Евертон е уапсен поради сомнежи за педофилија. Клубот потврди дека овој играч е суспендиран. Се додава дека во прашање е првотимец и дека полициската истрага е во тек.

Името на фудбалерот не е наведено, но се тврди дека се работи за репрезентативец, 31-годишен фудбалер чиј дом беше под истрага во петокот, кога и е уапсен. Се надведува дека во прашање е играч кој заработил богатство во кариерата во која низ повеќемилионски трансфери ги менувал клубовите.

Евертон ветува дека ќе даде целосна поддршка на властите во оваа истрага и порача дека по тоа прашање веќе нема да се огласува.

Дефанзивецот на Челзи, Марк Гуехи се пресели во Кристал Палас и за неговите услуги Челзи плати 23 милиони евра.

Фудбалерот кој е по потекло од Брегот на Слоновата Коска минатата сезона ја помина на позајмица во Свонси, а со Кристал Палас потпиша договор на пет години.

Гуехи дел од Челзи е уште од јуниорските денови, а за сениорите дебитираше во 2019 години, но не се наигра, па поголема минутажа ќе побара во другиот дел на Лондон.

Како што јавува англиски „Сан“, Челзи е во предност во однос на конкуренцијата за потпис на Хари Кејн кој сака да го напушти Тотенхем.

Кејн бара нов предизвик во кариерата, има 27 години и смета дека по успешната ланска сезона му е потребен нов предизвик во кариерата.

Проблем за напаѓачот на Тотенхем и член на репрезентацијата на Англија е сумата која ја бара неговиот актуелен клуб, 150 милиони фунти очекува Тотенхем од заинтересираните клубови.

Според информациите, Челзи е најблиску до договор за трансфер, Абрамович е решен да донесе врвен напаѓач, истиот го гледа во Кејн кој минатата сезона запиша 23 гола на 35 средби.

Милан и Франк Кеси се блиску до договор за продолжување на соработиката до 2026 година.

Кеси во првите две сезони играше просечно, но откако дојде тренерот Пиоли на клупата тој е незаменлив во тимот на Милан. Минатата сезона се промовираше во еден од најдобрите играчи за врска во Серија А и постигна 13 гола.

Неговиот договор истекува во 2022 година, па Милан сака што е можно побрзо да ја продолжи соработката бидејќи Кеси веќе влезе во последната година од договорот.

Италијанските медиуми пренесуваат дека двете страни се блиску до договор и дека Кеси ќе стави потпис до 2026 година, а годишно ќе добива 6 милиони евра со вклучени бонуси.

Аргентинецот, Габриел Хајнце, е отпуштен од тренерското место во Атланта Јунајтед, објави клубот од фудбалската лига во САД.

43-годишниот поранеше играч на Манчестер Јунајтед и Реал Мадрид, беше на кормилото на само 13 натпревари во кои оствари две победи.

Сега тренерските должности ќе ги преземе 35-годишниот, Роб Валентино, кој во последните три сезони беше помошник-тренер во клубот.

Еден од најскапите фудбалери во историјата би можел да ја пропушти целата или скоро целата претстојна сезона, доколку Барселона не пронајде начин да се ослободи од него.

Филипе Кутињо во 2018. година од Ливерпул пристигна во Барселона за дури 135 милиони евра, а во трансферот беа вклучени и бонуси кои би можеле да ја зголемат таа цифра.

Шпански „Ас“ пресмета дека, доколку Кутињо одигра уште 10 натпревари, Барселона ќе мора да плати уште 20 милиони евра на Ливерпул.

Кутињо во првата сезона и пол одигра 76 натпревари за Барселона во сите натпреварувања, втората ја помина на позајмица во Баерн, а во третата настапи само 14 пати, пред да го повреди коленото. Тој има 90 настапи за каталонскиот клуб, а по 100 се активира клаузулата за бонус.

Барселона е во процес на кратење на трошоците поради насобраните долгови и последно што и е потребно е да исплати уште 20 милиони за играч на кого не смета. Затоа, многу е веројатно доколку не го продаде, да го „замрзне“ во новата сезона, односно да го искористи на максимално девет натпревари.

Бројот 4 кој во Реал Мадрид му припаѓаше на дефанзивецот Серхио Рамос, останува празен еден месец по заминувањето на играчот.

Според весникот „Марка“, никој од играчите не изразил желба да ја земе „четворката“ по напуштањето на клубот на екс-капитенот. Слична ситуација се случи во репрезентацијата на Шпанија, каде никој не го зеде бројот 15, со кој настапуваше Серхио Рамос.

Претходно стана познато дека Серхио, кој се пресели во ПСЖ, го зеде дресот со број 4 и ќе настапува со него.

Рамос го напушти Реал Мадрид на крајот на јуни поради истекот на неговиот договор. Тој играше за Кралскиот клуб од 2005 година. Со оваа екипа, 35-годишниот фудбалер стана шампион на Шпанија пет пати, освои два Купа и четири Суперкупа на земјата, четири пати ја освои Лигата на шампионите, стана трикратен освојувач на Суперкупот на УЕФА и четирикратен победник на Светскиот клупски куп.