Србија во последното коло од квалификациите ја победи Португалија во Лисабон со голот на Александар Митровиќ во 90. минута и така обезбеди пласман на Мундијалот во Катар.

Капитенот на домаќините Кристиано Роналдо беше бесен и тажен после поразот. Роналдо ја фрли капитенската лента и седна на тревата. Некои српски фудбалери на кратко го прекинаа големото славје обидувајќи се малку да го утешат. Меѓу нив беше Радоњиќ кој открива што му кажал на Роналдо во тие моменти.

„Роналдо е мој идол. Му кажав – главата горе! Во Бенфика сите ми честитаа, навистина убав гест, покажаа дека се големи играчи“, изјави Радоњиќ.

Капитенот на аргентинската фудбалска репрезентација, Лионел Меси, беше стартер на дерби натпреварот од квалификациите за СП 2022 против Бразил кој заврши со резултат 0:0 , но призна дека е далеку од својата најдобра играчка форма.

„Долго време немам редовни настапи. Натпреварот со Бразил беше мошне напорен и чувствувам недостаток на ритам во играта. Физички не сум во најдобра форма но се надевам дека ќе се подобрам и ќе ја завршам годината на најдобар можен начин“, изјави Меси после натпреварот со „кариоките“.

 Аргентинецот ги пропушти последните два натпревари на Париз Сен Жермен, но се врати да игра во дресот на репрезентацијата на дуелите со Уругвај и Бразил.

Мемфис Депај проговори за победата на неговата репрезентација во квалификацискиот натпревар за СП 2022 со селекцијата на Норвешка (2-0).

„Горд сум на нашата репрезентација. По натпреварот со Црна Гора имавме продуктивен разговор, сите играчи беа подготвени за оваа вечер. Бевме најдобриот тим. Го направивме тоа што требаше да го направиме. Можевме да постигнеме повеќе голови, бевме многу проактивни“, изјави Депај за официјалната страница на УЕФА.

Да потсетиме дека напаѓачот на холандската репрезентација Мемфис Депај и напаѓачот на Англија, Хари Кејн станаа најдобри стрелци во групната фаза од квалификациите за Светското првенство во ФИФА 2022 година. Двајцата играчи имаат постигнато по 12 гола.

Благодарение на победата во мечот со Норвешка, Холандија го зазеде првото место во квалификациската група и директно се пласираше на Светското првенство во Катар.

Гери Хофман потврди дека ја напушта функцијата прв човек на Премиер лигата на почетокот на следната година.

Хофман оваа функција ја извршуваше од април 2020 година, а сега си заминува. Според шпекулациите на Островот тој си заминува поради конфликтот со клубовите кои изразија незадоволство од продажбата на Њукасл.

Голем дел од англиските клубови покажаа разочараност од начинот на кој конзорциумот од Саудиска Арабија го презема Њукасл.

„Одлучив дека дојде време да се повлечам. Премиер лигата ќе добие нов лидер за новите возбудливи предизвици кои следуваат“, изјави Хофман.

Од фудбалскиот клуб Барселона пристигаат информации дека е можна продажба на Френки де Јонг во летниот преоден рок.

Каталонците се подготвени сериозно да ги разгледаат евентуалните понуди за холандскиот интернационалец во своите редови. Со продажбата на де Јонг, Барселона би добила прилично висок износ на парични средства кои би ги искористила за доведување на играчи кои недостигаат на одредени позиции во екипата. Тренерот Чави планира средниот ред во тимот да го гради околу младите играчи кои потекнуваат од академијата, како што се Гави, Педри, Нико Гонзалес и Рики Пуч. Нивни ментори остануваа искусните Серхио Бускетс и Серж Роберто.

Најголем интерес за евентуално купување на Френки де Јонг засега доаѓа од Пеп Гвардиола и неговиот Манчестер Сити. 

Од почетокот на сезоната македонскиот напаѓач Дориан Бабунски игра одлично во Ботев Враца, со добрите настапи тој го привлече вниманието на себе.

Медиумите во Бугарија пренесуваат дека Бабунски е на мета на Левски кој наводно ќе се обиде да го доведе во јануарскиот преоден рок. Сепак, во Ботев немаат намера лесно да се откажат од македонскиот напаѓач и ќе бараат оштета од 100.000 евра.

Ќе потсетиме, Бабунски доби повик и од селекторот Благоја Милевски за последните два натпревари во кои забележавме победи со Ерменија и Исланд. Бабунски беше дополнително повикан откако се повреди Адис Јаховиќ.

Екипите на Арсенал и Милан се натпреваруваат за потписот на португалскиот репрезентативец Ренато Санчез.

24-годишниот Санчез кој во моментот настапува за францускиот клуб Лил, веќе подолго време е следен од премиерлигашот Арсенал кој би можел да испрати официјална понуда за негово купување во јануари.

Милан исто така е подготвен да го доведе Санчез во своите редови како замена за Франк Кеси кој се очекува да го напушти клубот во наредниот трансфер период.

Тренерот на Ливерпул, Јирген Клоп, може да здивне бидејќи Садио Мане во текот на вчерашниот ден тренираше со екипата и се очекува да биде подготвен за саботното дерби со Арсенал.

Крилниот напаѓач на „црвените“ заработи повреда за време на квалификацискиот натпревар за Светското првенство помеѓу неговиот Сенегал и репрезентацијата на Того, па беше заменет во текот на првото полувреме. После средбата тој се врати во Ливерпул каде беа направени дополнителни тестови и се чини дека сепак не се работи за сериозна повреда.

Ливерпул во моментот е на 4-то место во Премиер лигата и има 2 бода повеќе од петто пласираниот Арсенал.

Синоќа се одиграа последните натпревари од циклусот на квалификации за учество на Светското фудбалско првенство во Катар 2022.

Репрезентациите на Португалија, Италија,Шкотска, Русија, Шведска и Велс се можните противници на македонската репрезентација во полуфиналето од баражот за Светското првенство. Овие селекции се сместени во групата на носители за ждребувањето за бараж натпреварите.

Во групата не неносители, освен Македонија се наоѓаат и репрезентациите на Полска, Турција, Украина, Австрија и Чешка.

Полуфиналето од баражот се игра во еден натпревар, а домаќини ќе бидат репрезентациите кои се носители. 

Ждрепката за двојките кои ќе се сретнат во баражот ќе се одржи на 26. ноември во 17 часот.

Поранешниот тренер на Челзи, Френк Лампард пројавил интерес за работа со екипата на Лестер, објавува Еуроспорт. 

Лампард неодамна се поврзуваше со преземање на тренерската позиција во Норвич, но по првичните разговори реши да се откаже од неа. 

43-годишниот поранешен англиски репрезентативец би сакал да ги тренира популарните „лисици“ доколку Брендон Роџерс кој е актуелен тренер го напушти клубот. Роџерс се споменува како еден од главните фаворити за наследник на Оле Гунар Солскјер во случај Норвежанецот да добие отказ од Манчестер Јунајтед.