Челниците на Лидс се во преговори со РБ Салцбург за американскиот интернационалец, Брендон Аронсон.
Англичаните во јануарскиот трансфер период понудија 18 милиони евра за 21-годишниот талент, но, австрискиот состав не прифати бидејќи инсистира да добие сума од 25-30 милиони.
Двете страни деновиве се во постојан контакт за да најдат начин како да се реализира трансферот во текот на летото.
Крилниот фудбалер на Лацио, Педро Родригез, призна дека планира да ја заврши кариерата во родната Шпанија. Поранешниот фудбалер на Барселона, Челзи и Рома, планира да се врати во Ла Лига.
„Имам договор за уште една година со Лацио и ќе одлучам што да правам откако ќе истече. Мислам дека можам да играм на високо ниво уште една или две години. Мојата желба е да се вратам во Шпанија и да бидам со моите синови во Барселона. Фудбалот го ограничува вашиот личен живот“, вели играчот на лацијалите.
Според најавите во англиските медиуми, клубовите од Премиер лигата би можеле да изгласаат промена на правилото за бројот на измени.
Доколку предлогот добие потребен број гласови, тогаш од сезоната 2022/23, премиерлигашите ќе имаат право на пет измени на играчи во еден натпревар.
Претходно, Премиер лигата на почетокот од оваа сезона изгласа правило со кое тимовите добиваат дополнителна измена доколку во текот на натпреварот еден од играчите добие повреда на главата поради која е приморан да го напушти истиот.
Магазинот „Кикер“ објавува дека германскиот стручњак Роџер Шмит ќе ја преземе тренерската функција во Бенфика.
55-годишниот Шмит веќе одржал неколку разговори со раководството на клубот од Лисабон и преговорите се пред завршна фаза.
Шмит ќе застане на чело на Бенфика по завршувањето на оваа сезона, кога му истекува договорот со ПСВ Ајндховен. Уште во февруари тој изјави дека нема намера да остане во Холандија по завршувањето на неговиот договор на 30-ти јуни.
Германските медиуми известуваат дека напаѓачот Тимо Вернер сака да го напушти Челзи во летниот преоден рок.
Вернер, во Лондон пристигна како големо засилување од Лајпциг, и од него се многу се очекуваше, но и покрај својот голем потенцијал, тој не успеа да го прикаже својот квалитет.
Неговата форма во Челзи не е најдобра. На 14 натпревари во Премиер лигата, тој постигна само еден гол и оствари една асистенција. Со оглед на фактот дека оваа година се одржува Светското фудбалско првенство, неопходно е Вернер да има стандардни настапи и да постигнува голови.
Најреална опција за фудбалерот во моментот е тој да ја промени средината и да го напушти Челзи. Најголем интерес за негово доведување искажува Борусија Дортмунд, меѓутоа како проблем за таков трансфер би бил износот на неговата плата која изнесува 16 милиони евра годишно.
Англискиот „Мирор“ пишува дека звездата на Лидс Јунајтед, Рафиња ќе биде главна трансфер цел на Барселона во текот на летото.
Каталонците го посочуваат Бразилецот како приоритет, особено ако не се реализира нов договор со Усман Дембеле.
Голем адут во обидот за доведување на Рафиња, Барселона има во менаџерот на играчот, Деко, кој е поранешен играч на Барса и е многу почитуван од структурите на клубот од „Камп Ноу“.
Барселона е подготвена да испрати понуда во висина од 40 милиони евра, но таа понуда не е ни блиску до сумата која ја бара Лидс Јунајтед, а изнесува 80 милиони евра. Голем фактор за цената на Рафиња ќе биде конечниот пласман на Лидс на крајот од сезоната во Премиер лигата, односно дали клубот ќе обезбеди опстанок или не.
Селекторот на португалската фудбалска селекција, Фернандо Сантош се надева на титула на претстојното Светско првенство, откако неговата репрезентација обезбеди учество на турнирот во Катар, после победата во финалниот бараж над Македонија со 2:0.
„Единствен сон кој го имам во моментот е да освојам и трето големо натпреварување со Португалија. Досега освоив две, а сега сонувам триумф на Светското првенство“, изјави Сантош, кој досега го има освоено Европското првенство и Лигата на нации.
Реал Мадрид е заинтересиран за доведување на играчот од средниот ред на Борусија Дортмунд, Џуд Белингам.
18-годишниот Англичанец игра во неверојатна форма за бундеслигашот Дортмунд, поради што се најде во списокот на потенцијални засилувања на гигантот од Мадрид.
Реал е во потрага по играч кој во иднина би го заменил Лука Модриќ кој полека се ближи кон крајот на својата фудбалска кариера, па на Џуд Белингам се гледа како на долгорочна алтернатива за Хрватот.
Јувентус го обнови интересот за напаѓачот на Манчестер Сити, Габриел Жесус. Клубот ќе мора да го засили нападот на лето и вниманието го насочи кон 24-годишниот Бразилец, за кој се шпекулира дека ќе биде замена на Пауло Дибала, пишува „Газета дело спорт“.
Жесус долго време е во бележникот на Јувентус и не е првпат тој да се поврзува со нивен интерес, но досега Италијанците немаат дадено официјална понуда за неговите права. Сепак, се чини дека тоа може да се промени на лето, кога Пауло Дибала ќе го напушти Торино со слободен трансфер и клубот итно треба да му најде квалитетна замена. Манчестер Сити е подготвен да се раздели со Жесус само со добра понуда. Пеп Гвардиола веќе е во потрага по нов напаѓач и се чини дека нема намера да се потпре на Жесус во улога на главен голгетер. На „Етихад“ се насочија кон Ерлинг Халанд, за да можат да му направат простор на Норвежанецот со продажба на бразилскиот репрезентативец.
Габриел Жесус ја игра својата шеста сезона во Манчестер Сити откако беше купен од Палмеирас во 2016 година. Досега за Граѓаните има одиграно 224 натпревари и постигнато 88 голови. За Бразил има 54 натпревари и 18 голови.
Капитенот на македонската фудбалска репрезентација, Стефан Ристовки, во изјава после финалниот бараж, признава дека Португалија беше надмоќен противник и дека заслужено ќе патува на СП во Катар.
„Честитки до Португалија за триумфот. Тие доминираја во овој отворен натпревар. Ние мораме да заминеме од овде со кренати глави. Горд сум на моите соиграчи и на мојата земја, бидејќи го изненадивме фудбалскиот свет. На првенството во Катар ќе навивам за Португалија, бидејќи се чувствувам малку Португалец. Мојот син е роден тука и ќе бидам радосен доколку тие го освојат шампионскиот пехар“, порача Ристовски.
