Според информациите кои ги пренесуваат шпанските медиуми, играчот на Барселона Серхио Бускетс по завршувањето на сезоната ќе го напушти клубот од Камп Ноу.

Договорот на 34-годишниот Бускетс со Барселона истекува 2023 година и тој најавува дека нема намера да преговара за продолжување на истиот.

Како негова нова фудбалска дестинација се споменува американската МЛС лига и тимот на Интер од Мајами.

Бускетс своето деби во дресот на Барселона го имаше во 2008 година. Тој со Каталонците има освоено 30 трофеи.

Фудбалерот, Жорџино Вајналдум, кој заработи повреда на тренинг пред стартот на сезоната дури сега им се обрати на фановите на Рома.

31-годишниот играч од средниот ред кој беше ангажиран како големо засилување за „римската волчица“, одигра само еден меч пред да замине на долга рехабилитација.

„Не одговорив на никого по мојата повреда бидејќи бев многу вознемирен и тажен. Сега сум подобар, сакам да им се заблагодарам за поддршката на сите навивачи на Рома“, напиша Вајналдум.

Дефанзивецот на Милан, Тео Хернандез е надвор од терените поради повреда која би можела да го исклучи од натпреварите против Челзи и Јувентус по репрезентативната пауза. 24-годишниот дефанзивец е еден од најважните играчи на Милан. Тој викендов одигра цел натпревар против Наполи, но по натпреварот беше откриено дека има сериозен проблем.

Тестовите направени врз него покажаа истегнување на десниот аддуктор. Повредата предизвика тој да биде повлечен од репрезентацијата на Франција за претстојните натпревари во Лигата на нации. Тој ќе биде подложен на дополнителни тестови следната недела, кога ќе биде појасно кога ќе се врати на терените.

Таквата повреда обично бара околу три недели закрепнување. Сигурно ќе ја пропушти средбата со Емполи на 1 октомври, но под сериозен знак прашалник е за натпреварите од Лигата на шампионите со Челзи на 5 октомври и дербито со Јувентус на 8 октомври.

Ливерпул се обидува да го задржи Артур Мело во оптимална состојба за време на репрезентативната пауза.

За таа цел, играчот од средниот ред, кој беше земен на позајмица од Јувентус во последниот ден од летниот преоден рок, вчера стартуваше за тимот до 21 година против Рочдејл.

Во договорот меѓу Ливерпул и Јувентус има опција за купување на Артур за 37,5 милиони евра.

Фудбалерите на македонската репрезентација ги продолжуваат подготовките пред двата натпревари од Лигата на нации.

Нашата селекција во петок му гостува на Грузија, додека во понеделник во Скопје ќе биде домаќин на Бугарија.

Свое видување за дуелот со Грузија даде голгетерот на репрезентацијата Бојан Миовски кој настапува во одлична форма за својот нов клуб Абердин.

„Грузија бележи видлив напредок во последниве години. Тоа го покажа и на натпреварот во Скопје, посебно во второто полувреме. Јасно е дека ќе настапуваме без неколку клучни играчи, но сите што сме на располагање ќе го дадеме својот максимум. Очекувам пеколен дуел во Тбилиси, но ние мислиме само на победа“, изјави Миовски.

Словачкиот судија Иван Кружлиак ќе бдие на центарот во Тбилиси на дуелот меѓу Грузија и Македонија во рамките на петочниот дуел од Лигата на нации.

Станува збор за судија кој ни судеше на мечот на Исланд во квалификациите за СП кој се одигра минатиот септември, меч кој заврши со резултат 2-2 иако водевме со 2-0.

Селекторот на европскиот шампион Италија, Роберто Манчини, беше принуден да повика тројца нови играчи во проширениот состав за натпреварите со Англија и Унгарија во Лигата на нации.

 Откако Марко Верати го напушти таборот на „Аѕурите“ веќе во понеделникот, истото го направија и Лоренцо Пелегрини и Матео Политано еден ден подоцна.

Новите имиња во составот на Италија се Салваторе Еспосито (СПАЛ), Давиде Фратези (Сасуоло) и Маноло Габиадини (Сампдорија).

Италијанскиот тим Рома би можела да го ангажира играчот од средниот ред на Бодио/Глимт, Оле Солбакен со слободен трансфер во јануари, објави популарниот локален спортски новинар Николо Шира. Договорот на играчот со норвешкиот клуб истекува во декември.

24-годишниот Солбакен се согласил да потпише договор со Римјаните на 4,5 години со плата од 1 милион евра по сезона.

Во претходната сезона во Конференциската лига, Норвежанецот постигна 3 гола против Рома во два натпревари од групната фаза. Оваа сезона, играчот од средниот ред забележа 13 настапи за клубот во сите натпреварувања, постигнувајќи 1 гол и 5 асистенции.

Оливер Кан, кој ја има улогата на извршен директор во Баерн Минхен, ги негира шпекулациите дека се планира ангажман на нов тренер откако Баварците влегоа во серија од четири мечеви без победа во Бундес-лигата. 

„Не контактираме со ниту еден тренер. Целосно му веруваме на Јулијан“, потенцираше кратко Кан.

Баерн Минхен по три нерешени средби забележа неочекуван пораз кај Аугсбург а медиумите веднаш излегоа со шпекулација дека Нагелсман може да добие отказ. 

Килијан Мбапе нема да се појави на утрешната фотосесија на репрезентацијата на Франција Причина за бојкотот на фудбалерот на Пари Сен Жермен е спорот меѓу него и федерацијата околу имиџ правата.

Мбапе сака играчите да имаат збор во изборот на брендови кои ќе се поврзуваат со нивните имиња. Новинарот, Робен Берн, тврди дека раздорот не е за пари бидејќи Мбапе секогаш ги донира бонуси од репрезентацијата.

Според наведеното, голгетерот не сака да се поврзува со компаниите за спортско обложување или брза храна кои се спонзори на „триколорите“.