Наполи на нашиот Елмас, повторно покажа солидна игра за уште една победа, овојпат против Торино кој беше совладан со 1:0.

Победоносниот гол за наполитанците го постигна Виктор Осимен во 81 минута од натпреварот, по одличната асистенција на македонскиот репрезентативец Елиф Елмас.

Победата против Торино ја коментираше тренерот на Наполи, Спалети кој не пропушти да го пофали младиот Елмас.

“Им честитам на моите играчи за одличната партија против Торино. Осимен покажа колку е силен и работлив, Елмас е исклучително момче кое секогаш го дава својот максимум, поминува километри на теренот дури и кога не е потребно, што е одлична работа“, кажа Спалети.

Еден Азар и Герет Бејл, ќе го пропуштат гостувањето на Реал Мадрид кај Шахтјор од Доњецк во натпреварот од групната фаза на Лигата на шампионите.

Двајцата играчи на „Кралскиот клуб“ се повредени и не се во списокот  на Карло Анчелоти. Италијанскиот стратег исто така нема да може да смета на услугите на Дани Карвахал, Иско и Лука Јовиќ.

Натпреварот во Украина ќе се одигра во вторник во 21.00 часот. За изненадување, лидер во групата „Д“ е дебитантот Шериф Тираспол со освоени 6 бода. Реал Мадрид има 3, додека екипите на Шахтјор и Интер освоија по 1 бод. 

Од таборот на Париз Сен Жермен потврдија дека поради повреда, Нејмар ќе го пропушти дуелот против РБ Лајпциг во Лигата на шампионите кој се игра во вторник вечер.

Бразилецот се врати од обврските со репрезентацијата на Бразил со здобиена повреда и нема да биде подготвен да учествува на натпреварот во Париз.

Во ПСЖ ќе отсуствуваат  и Леандро Паредес кој има повреда на бутниот мускул, додека Серхио Рамос продолжува да се опоравува од повреда и исто така не се очекува да биде спремен за натпреварот.

Кун Агуеро синоќа ги одигра првите минути во дресот на Барселона која со пресврт дојде до победа од 3-1 над Валенсија.

Агуеро во игра влезе во 87. минута, ги одигра последните неколку минути од мечот, но беше среќен што конечно дебитираше.

„Пресреќен сум за моето деби, долго го чекав овој момент. Тоа беше добро деби бидејќи победивме, а тоа е најважно. Беше убаво да се слушнат фановите како го скандираат моето име, и знам дека сега е мој ред да им вратам за нивната љубов“.

Тренерот на Манчестер Сити, Пеп Гвардиола, ќе треба да донесе одлука во последен момент за тоа дали Габриел Жезус и голманот Едерсон, ќе настапат во вторник на натреварот против Бриж од Лигата на шампионите.

Двата бразилски играчи не настапија за Сити во победата над Барнли во Премиер лигата кој се играше во саботата, поради нивниот настап за репрезентацијата на Бразил против Уругвај. Поради овие причини од Манчестер Сити одлучија двата играчи да слетаат директно во Белгија пред натпреварот од Лигата на шампиони.“Во моментов двајцата се во Белгија. Ме известија дека можат да играат, но ќе треба да видиме како се чувствуваат. Ги испративме таму затоа што ден по натпреварот со Бриж, тие можат да се вратат со нас и да имаат нормален живот. Ако се вратеа директно од Бразил во Манчестер, ќе беа изолирани во хотел и ние не го сакавме тоа. Затоа отпатуваа за Белгија. Можеби ќе можат да играат и тоа е добра вест “, изјави Пеп Гвардиола за клубскиот веб сајт.

Звездата на Париз Сен Жермен, Килијан Мбапе навести дека може да остане во клубот од Париз, иако неговиот актуелен договор истекува следното лето.

Мбапе неодамна во негово интервју призна дека сакал изминатово лето да си замине од клубот со цел Парижаните да имаат доволно време да најдат квалитетна замена за него. И покрај неколкуте понуди од Реал Мадрид кој е најсериозниот кандидат за неговиот потпис, ПСЖ се одлучи да го задржи играчот до крајот на договорот.

Сега се чини дека Французинот може да остане на „Паркот на принцовите“ и по завршувањето на оваа сезона. По победата над екипата на Анжер во првенството на Франција, Мбапе објави пост на  Инстаграм во кој напиша: „Секогаш гладен за повеќе. Благодарам, ПСЖ, и стави слика на кој е заедно со сопственикот на клубот, Насер Ал-Калаифи.

Лондонски Арсенал, посакува да се врати во врвот на англискиот фудбал, а еден од играчите кои би помогнале во тоа е и Диминик Калверт Луин.

Одличниот напаѓач на Евертон и репрезентативец на Англија, актуелната сезона ја започна во супер форма со три гола во првите три натпревари од Премиер лигата, но во меѓувреме заработи повреда и е надвор од фудбалските терени.

За купување на 24-годишниот центарфор, Арсенал би требало да одвои околу 50 милиони фунти.  Луин би бил одлична замена за Французинот Лаказет кој е во последната година од договорот и го напушта клубот ова лето.

Голманот на Париз Сен Жермен, Кејлор Навас, по се изгледа ќе го пропушти натпреварот против РБ Лајпциг во Лигата на шампионите, пренесуваат медиумите во Франција.

 34-годишниот голман заработи повреда додека бранеше за својата Костарика. Навас го пропушти и натпреварот на ПСЖ против тимот на Анжер  во првенството на Франција. 

Средбата против германскот РБ Лајпциг е закажан за 19 октомври во Париз, на Паркот на принцовите. 

Павел Недвед испрати критики кон Европската фудбалска унија (УЕФА) поради финансискит фер-плеј. Јувентус застана против УЕФА кога со Барселона и Реал Мадрид се издвои како еден тимовите кои најмногу се залагаа за Суперлигата. На крајот УЕФА не можеше да направи ништо затоа што се донесе одлука дека нема основа за казна.

Главната идеја на Суперлигата беше за големите клубови да добијат поголема стабилност во функционирањето.

„Не знам што УЕФА гледа, но финансискиот фер-плеј кој постои нема врска. Едноставно не функционира. Целта на него е да се троши толку колку што ќе се заработи меѓутоа во реалноста тоа не е така, секој прави што сака и троши колку сака. Сигурно дека нешто треба да се промени“, изјави Недвед.

Екипата на Манчестер Јунајтед направи серија лоши резултати, а позицијата на Норвежанецот Оле Гунар Солскјер е веќе разнишана. Тој им порача на своите фудбалери дека треба да се погледнат во огледало и да направат се за да си одговорат на прашањето каде погрешиле.

„Нашиот настап не беше доволно добар. Мораме да го разгледаме целокупното однесување на тимот. Не треба да го сфаќаме како знак на будење, бидејќи веќе го имавме. Играчите треба да се погледнат во огледало, бидејќи јас веќе го направив тоа и да одговорат соодветно на она што се случи. Хари Мегваер е важен играч за нас, тој е нашиот капитен. Работеше напорно со физиотерапевтите и немаше лоша реакција, па решив да ризикувам. Некогаш функционира, некогаш не. Откако примивме четири гола, сега ми е јасно дека донесов погрешна одлука“, објасни Солскјер.

Тешката програма за Манчестер Јунајтед продолжува затоа шро ќе биде домаќин на Аталанта, по што ќе му гостува на Ливерпул.