Дефанзивецот Клемент Ленгле е подготвен да ја напушти Барселона, но само доколку се најде клуб кој е подготвен да му ја даде истата плата, открива „Спорт“.

Сепак, ова изгледа неостварлив услов, бидејќи Французинот добива 10 милиони евра.

Ленгле е на „Камп Ноу“ четири години, но одамна го изгуби стартното место и навивачите не го сакаат. Каталонците треба итно да се разделат со барем неколку играчи за да привлечат нови.

Барса за Ленгле плати речиси 36 милиони евра, но тој никогаш не успеа да убеди дека трансферот вреди. Договорот со клубот му истекува во 2026 година.

Францускиот репрезентативец Пол Погба на крајот од месецот станува слободен агент и како што стојат работите се е подготвено за неговото враќање во Јувентус.

Познатиот инсајдер за трансфери Џанлука Ди Марцио, најавува дека менаџментот на Погба ги договара последните детали со челниците на Јувентус пред склучувањето на финалниот договор со Бјанконерите. Според информациите, францускиот фудбалер на 1.јули ќе пристигне во Торино на медицински прегледи. 

Пол Погба повторно доаѓа во Јувентус од Манчестер Јунајтед како и пред 10 години кога пристигна како слободен играч. После тоа во 2016 година, тој за 105 милиони евра замина од Торино и заигра на Олд Трафорд.

Екипите на Караорман и Арсими се најновите тимови кои ќе настапуваат во единствената Втора македонска фудбалска лига во сезоната 2022/2023 година.

Караорман својот пласман го обезбеди после победата на пенали во баражот со Вардар Неготино. Регуларниот дел од дуелот заврши 0:0. Ова ќе биде повторно враќање на Караорман во втората лига после пауза од 20 години.

Својот историски успех и пласман во Втората лига, екипата на Арсими го обезбеди после баражот и победата од 4:1 над тимот на Овче Поле.

Тренерот на Ливерпул Јирген Клоп му се заблагодари на Садио Мане за соработката и му посака среќа во новиот клуб.

Мане после шест години поминати на Енфилд, го напушти Ливерпул и потпиша договор со Баерн Минхен.

Репрезентативецот на Сенегал пристигна во редовите на Ливерпул во 2016 година,а беше доведен токму од Јирген Клоп. Мане за „црвените“ на 269 натпревари постигна 120 гола.

„Го почитувам Мане и неговата одлука, а сигурен сум дека и нашите навивачи го мислат истото. Ако го сакаш Ливерпул, тогаш мора да го сакаш и Садио, и околу тоа нема расправа. Му посакуваме успех на секој нареден натпревар, освен кога ќе игра против нас. Не се сомневам дека ќе продолжи да прикажува одлични игри“, изјави Клоп.

Фудбалерот, Себастијан Алер, е новото име во редовите на Борусија Дортмунд. Тој доаѓа од холандскиот Ајакс за 35 милиони евра.

„Милионерите“ од претходно ги договорија личните услови со одличниот напаѓач кој деновиве треба да ги помине задолжителните лекарски прегледи.

Алер во претходната сезона за „копјаниците“ одигра 42 меча на кои реализираше 34 голови.

Барселона веќе подолго време е заинтересирана да го доведе Бернард Силва од Манчестер Сити, кој е најголема желба на Чави.

Португалецот има договор со Сити до 2025 година, а „граѓаните“ сигурно нема лесно да се откажат од него и ќе направат се за да го задржат. Португалецот минатото лето се наоѓаше на излезни врати од „Етихад“, но Гвардиола го убеди да остане и Силва одигра одлична сезона

Гвардиола неколку пати порача дека доколку некој не е среќен во тимот, нема потреба да го држи тука со сила. Поради тоа доколку Португалецот побара трансфер ќе му биде дозволено да замине за 75 милиони евра.

Напаѓачот на Ремс, Уго Екитике е новата француска ѕвезда која го привлече вниманието на многу европски гиганти.

Екитике има само 19 години, а оваа сезона блесна во дресот на Ремс каде постигна 11 гола и запиша 3 асистенции.

Скаутите на многу европски гиганти ги следат неговите настапи, а експертите му предвидуваат голема кариера.

Екитике е централен напаѓач, но може да игра и како крило, а најсилен интерес за него покажува Реал Мадрид.

Марсело би можел да ја продолжи кариерата во Милано, Италија.

Марсело неодамна го напушти Реал, откако помина 15 години во мадридскиот клуб. Со 25 пехари тој е најтрофејниот фудбалер во историјата на „кралскиот клуб“.

Актуелниот шампион на Серија „А“ е заинтересиран за искусниот бразилски фудбалер, кој не очекува место како стартер во редовите на „росонерите“.

Марсело е свесен за годините, не очекува да биде првотимец, но наводно прифатил да биде замена за левиот бек Тео Хернандез. Тој треба да заработува три милиони евра по сезона во Милан, пишува шпанскиот весник.

Челниците на Арсенал преговараат со Лидс во врска со трансфер на Бразилецот Рафиња. Како што пренесуваат англиските медиуми, клубот од Лондон веќе ја испратил првата понуда за офанзивниот фудбалер, но истата била одбиена од Лидс.

Познатиот италијански новинар Фабрицио Романо, претходно ја објави веста дека Рафиња ги договорил личните услови со Барселона,но претставниците на двата клуба сеуште немаат започнато официјални преговори. Менаџер на Бразилецот е бившиот фудбалер на Каталонците, Деко, кој посакува неговиот клиент кариерата да ја продолжи во Барса.

25-годишниот Рафиња има договор со Лидс Јунајтед до 2024 година, и се проценува дека неговото обештетување би вредело помеѓу 65 и 75 милиони евра.

Рома и Интер побараа од Реал Мадрид можност да го ангажираат дефанзивецот Начо Фернандез за време на летниот преоден рок. Оваа информација ја објави „Мундо Депортиво“.

32-годишниот Начо потекнува од фудбалската школа на Реал Мадрид. Минатата сезона, дефанзивецот учествуваше на 42 натпревари во сите натпреварувања, на кои постигна три гола. Договорот меѓу двете страни истекува на крајот на следната сезона. Со Реал Мадрид, Начо Фернандез освои 20 трофеи, вклучувајќи пет победи во Лигата на шампионите.

Да потсетиме дека вчера, Реал Мадрид го претстави дефанзивецот Антонио Рудигер, кој потпиша договор со тимот како слободен играч.