Лече беше блиску и играше плеј-оф, но не успеа да се врати во Серија А, но и покрај тоа што остана второлигаш извесно е дека овој клуб ќе ја продолжи соработката со македонскиот играч од средниот ред, Бобан Николов.
Николов во Италија пристигна ова зимо од МОЛ Фехевар, договорот му истекувал на 30 јуни, но во истиот имало опција за продолжување на соработката на три години. Според информациите на „Газета дело Спорт“, Лече не бил најзадоволен од учиникот на Николов во изминатиот период, но сепак ќе му го продолжи договорот.
Како што се наведува, Лече одлучил да му даде втора шанса на Николов најмногу затоа што нашиот репрезентативец го очекува Европското првенство каде што секако ако одигра добро цената може да му порасне.
Најавите се дека новиот договор со Николов Лече ќе го продолжи пред почетокот на Европското првенство затоа што не сака да ризикува и да го чека 30 јуни.
Ловрен го пропушта Европското првенство
Еден од главните играчи на хрватската репрезентација – дефанзивецот Дејан Ловрен, скоро сигурно ќе го пропушти Европското првенство ова лето, објавија медиумите во Хрватска.
Искусниот централен дефанзивец на Зенит заработи повреда на тетивата за време на еден од последните тренинзи на „коцкестите“ и според првичните прогнози ќе му требаат од 3 до 6 недели за да се опорави.
Ловрен има 64 натпревари и 4 гола за репрезентацијата на Хрватска, која освои сребрен медал на СП 2018 во Русија.
Хрватите ќе играат две контроли пред почетокот на Евро 2020 – против Ерменија на 1 јуни и против Белгија на 6 јуни. Хрватска го започнува учеството на шампионатот на Европа со натпревар против Англија на 13 јуни, а другите две селекции во групата Д се Шкотска и Чешка.
ЕУРО 2020 – 13. Хрватска одблиску
Хрватска веќе е европска фудбалска велесила.
Фудбалската репрезентација на Хрватска ја претставува Хрватска на меѓународните фудбалски натпреварувања и е под контрола на Фудбалскиот сојуз на Хрватска, формиран во 1990 година.
Федерацијата е призната од страна на ФИФА, фудбалската репрезентација на Хрватска во минатото одиграла деветнаесет натпревари за Бановина Хрватска и Независна Хрватска во периодот помеѓу 1940 и 1944. Првиот натпревар го одиграла на 2 април 1940 година, кога ја победиле репрезентацијата на Швајцарија со 4-0 во Загреб. Подоцна со приклучувањето на Хрватска во Југославија оваа репрезентација била укината и Хрватска не настапувала самостојно, туку нејзините играчи играле за југословенската репрезентација.
Со распадот на Југославија во 1990 година, Хрватска повторно формирала репрезентација (официјалното формирање), која во 1993 официјално стана членка на ФИФА и на УЕФА. Првиот официјален натпревар во рамките на денешната држава, Хрватска го одиграла на 5 јули 1992 против Австралија. За првпат во квалификациите за едно натпреварување Хрватска учествувала во квалификациите за Европското првенство во 1996 година и се пласирала на ова натпреварување, стигнувајќи до четвртфиналето. Досега Хрватска има четири настапи на Светските првенства, а најдобар резултат им е третото место во Франција 1998 година. На Европските првенства исто така досега настапила четири пати, а најдобар резултат им е четвртфинале каде играле двапати во 1996 и 2008 година.
Најголемиот број домашни натпревари хрватската репрезентација ги игра во Загреб на стадионот „Максимир“.
Херојот Далиќ ја препороди Хрватска
На граничниот премин меѓу Хрватска и БиХ кај местото Каменско во јули 2018 година имаше застој и за влез во Босна се чекало повеќе од еден час. Причината за гужвата е Златко Далиќ, херојот на хрватската, ама и на босанската нација каде е роден тој.
Според проценките на локалните власти, во Ливно се собрале меѓу 50.000 и 60.000 луѓе за да го пречекаат селекторот кој го направи најголемиот успех за хрватскиот фудбал. Освен локалците, во Ливно имало и Хрвати, како и луѓе од дијаспората.
За збирно место го одбраа стадионот на фудбалскиот клуб Троглав, каде Далиќ ги направил првите фудбалски чекори.
„Јас сум еден од вас и никогаш не заборавив од каде сум и каде почнав. Знам со колку трпение и емоции навивавте за хрватската репрезентација. Не сме светски прваци, но знаете дека момците дадоа сè од себе. Кога човек ќе види волку емоции кај народот, јас реков, јас сум дел од овој народ. Овој народ е мојата снага“, рече Далиќ.
Лука Модриќ е повеќе од обичен фудбалер – единствена хрватска „Златна топка“
Лука Модриќ ја освои и „Златната топка“ 2018 година, откако „Франс фудбал“ го прогласи за најдобар светски фудбалер на церемонијата во Париз. По Бразилецот Кака во 2007 година, овој престижен трофеј го освојуваа исклучиво Кристијано Роналдо и Лео Меси.
Зад хрватскиот плејмејкер на Реал Мадрид се пласираа Кристијано Роналдо, Антоан Гризман и Килијан Мбапе.
„Чувството е неверојатно, особено ако се земе предвид какви играчи завршија зад мене. Свесен сум дека оваа година направив извонредни работи. Ова е година од сништа“, кажа тпгаш Модриќ, европски првак со Реал и светски вицешампион со Хрватска.
Претходно, тој беше избран за најдобар играч на Мундијалот во Русија, УЕФА го прогласи за најдобар фудбалер за сезоната 2017/18 и потоа и ФИФА му ја додели Златната топка.
Сари пред промоција во Лацио
Италијанскиот фудбалски стратег, Маурицио Сари, ќе седне на кормилото на Лацио за наредната натпреварувачка сезона.
Тоа е уште една промена во Серија „А“ откако Жозе Мурињо ја презеде Рома, Фиорентина го ангажираше Џенаро Гатузо, Јувентус го врати Масимилијано Алегри, Лучано Спалети е нов кормилар на Наполи а Симоне Инзаги ќе го води шампионскиот состав на Интер.
Сари во неговата богата тренерска кариера беше тренер на Челзи, Наполи и Јувентус.
Нојер: Ќе играм за Германија за да го достигнам рекордот на Матеус
Мануел Нојер не планира да престане да игра за Бундес тимот. Голманот додаде дека едвај чека да започне соработка со новиот тренер Ханзи Флик како селектор, со кого беа заедно последните две сезони во Баерн Минхен. Флик ќе ја предводи германската репрезентација по крајот на Евро 2020, заменувајќи го Јоаким Лев.
„За мене лично, отсекогаш било забавно и задоволство да играм за националниот тим. Ме прави горд и ќе бидам среќен ако продолжам да го носам овој дрес и во иднина”, изјави 35-годишниот голман на прес-конференцијата.
„Не планирам да го прекинам учеството во националниот тим. Секој знае дека имам одлична врска со Ханзи Флик”, додаде играчот на Баерн.
Нојер исто така постави цел да го подобри рекордот на Лотар Матеус за одиграни натпревари за Германија. Во моментов тој е лидер со 150 натпревари за Бундес тимот, додека Нојер има 98 настапи и ќе треба да одигра уште многу за да дојде Матеус.
Чеферин најави Ф4 на Лигата на шампионите во фудбал
Претседателот на УЕФА, Александар Чеферин, во интервју за „Л`Екип“ изјави дека европскиот шампион од 2024 година ќе се добие на „фајнл фор“ турнир, наместо последниот натпревар да се игра на неутрален терен.
Словенецот размислува за оваа идеја по успешно спроведениот турнир „Фајнал ејт“ минатата сезона, кој беше организиран во Лисабон поради доцнење на календарот на натпреварувањето поради пандемијата на коронавирусот.
„Лично, би сакал тоа да се направи. Јас се залагам за „фајнал-фор“ во Лигата на шампионите. Би можело да биде одлично. И ефикасно во поглед на приходите доколку тоа се направи добро. Разговараме за оваа идеја, но ништо не е одлучено, не брзаме. Можеме да одлучиме за една година“, рече Словенецот.
ПСЖ тргнува по Ашраф Хакими
Ашраф Хакими е многу блиску до трансфер во Пари Сент Жермен. Интер има големи финансиски проблеми и после заминувањето на Конте јасно е дека ќе бидат продадени некои од ѕвездите во тимот.
Италијанските медиуми тврдат дека прв кој ќе биде продаден е токму Хакими бидејќи пристигнала богата понуда од Париз.
„Газета дело Спорт“ пренесува дека преговорите се во напредна фаза и дека трансферот ќе изнесува 60 милиони евра со вклучени бонуси.
„Нероаѕурите“ минатото лето го донесоа Мароканецот за 40 милиони евра, а тоа значи дека ќе имаат заработка од цели 20 милиони евра.
Челзи сака да го врати Лукаку во своите редови
Приоритет на Челзи на лето ќе биде доведување на врвен напаѓач, а прва желба е Ромелу Лукаку.
Белгиецот одигра фантастично во дресот на Интер и беше најзаслужен за освојување на шампионската титула.
„Нероаѕурите“ моментално имаат финансиски проблеми, па Реал ќе се обиде да ги искористи и веќе стапил во контакт со агентите на Лукаку.
После заминувањето на Конте и самиот Лукаку сериозно размислува да го напушти Интер, а покрај Челзи интерес за него покажува и Реал Мадрид.
Џака е желбата на Мурињо за новиот среден ред на Рома
Новиот тренер на Рома, Жозе Мурињо, тргнува во обид да го донесе во Рома фудбалерот на арсенал, Гранит Џака.
Според информациите, Мурињо сака во тимот да го има 28-годишниот фудбалер на репрезентацијата на Швајцарија, а Арсенал е подготвен да го ослободи за 25 милиони евра.
Преговарачите од Рома се обидуваат да ја спуштат цената на 20 милиони евра плус бонуси.
Колумбија без Хамес Родригез на Копа Америка
Хамес Родригез нема да настапи за Колумбија во квалификациите за СП во јуни и за целиот турнир од Копа Америка. Плејмејкерот на Евертон е повреден, но репрезентацијата не ја откри природата на неговата повреда. Тој пропушти неколку натпревари во Англија со болка во мускулот. „Во последниве денови, Хамес Родригез помина неколку медицински тестови и открија дека не е во оптимална форма. Поради оваа причина, Хамес отпадна од списокот на селекторот Рејналдо Руеда”, соопшти фудбалска федерација на Колумбија. Колумбија игра на светски квалификации со Перу и Аргентина на 3 и 8 јуни. Копа Америка започнува на 13 јуни, а Колумбија ја загуби можноста да биде еден од организаторите на ова натпреварување, па сите натпревари ќе се играат во Аргентина.
