Не по своја заслуга, Челзи се пласираше во Лигата на шампионите наредната сезона. Голема работа им заврши Тотенхем кој славеше кај Лестер со 4:2 и така ги исфрли „лисиците“ од европската елита. Тухел по крајот на натпреварот призна дека беа среќни што Тотенхем ја одработи нивната работа. Англиските медиуми пишуваат дека ниту случувањата пред натпреварот во Бирмингем не им одеа од рака на „сините“ од Лондон. Клупскиот автобус на Челзи беше примен на паркингот на стадионот со 15-минутно задоцнување и тоа верувале или не, поради сладолед. Имено, редарите кои беа задолжени да го расчистат просторот за гостинскиот автобус тоа не го направиле на време. Тие не добиле повик од надредениот, па решиле да уживаат во сладоледот додека автобусот на Челзи чекал пред влезот. Раководството на Челзи веќе поднесе жалба за ваквото однесување, а тимот на Тухел за малку ќе останеше без пласман во Лигата на шампионите поради опуштеното однесување на неговите домаќини.

Манчестер Сити ја прослави титулата во англиското првенство со убедлива победа од 5:0 против Евертон. Серхио Агуеро постигна два погодоци и во последниот лигашки натпревар за Сити го сруши рекордот на Вејн Руни со 184 премиерлигашки погодоци за еден клуб. Договорот на аргентинецот истекува по крајот на сезоната и тој го напушта клубот како слободен играч. Медиумските шпекулации веќе подолг период го селат во Барселона, а Гвардиола по натпреварот доста емотивно говореше за својот напаѓач и практично ги потврди гласините. „Можеби ќе откријам тајна, можеби е блиску до договор со клубот на моето срце, со Барселона.“ – вели Пеп во разговор за Би-Би-Си. „Ќе игра со најдобриот фудбалер на сите времиња, Лео Меси. Сигурен сум дека ќе ужива, а можеби и Барселона со него на теренот ќе биде се подобра и подобра.“ – додаде Гвардиола.

Управата на Џенова размислува за ангажман на Игор Ангеловски, откако Горан Пандев веќе дал препораки за поранешниот тренер на Работнички, сега селектор на сениорската репрезентација на Македонија. Ова го пренесува угледниот новинар на „Газета Дело Спорт“, Алфредо Педула на неговиот личен блог. Тој наведува дека Ангеловски е еден од кандидатите за нов тренер на Џенова. Ангеловски има договор со Македонија до завршувањето на ЕУРО 2020, по што извесно е дека ќе бара нов ангажман, иако популарниот „Мрме“ најави дека посакува да ја однесе нашата репрезентација и на СП во Катар. Пандев се уште нема донесено одлука дали активно ќе игра и следната сезона, но ако Ангеловски се договори со Џенова, нема да биде изненадување доколку Пандев остане активен уште една сезона.

Џон Тери ќе биде на летен одмор на денот кога Челси ќе го игра големото финале во Лигата на шампионите, а како поранешен капитен на клубот, не крие дека со цело срце ќе навива за тимот кој сега го предводи Томас Тухел. Тери потенцира дека Тухел завршил извонредна работа во послендо време по пристигнувањето во Лондон, но не пропушти да ја пофали и работата на својот сакан соиграч Лампард, кој според него ги поставил темелите за да гледаме еден ваков Челси составен од играчи од школата. „Погледнете ги двајцата младинци, Мејсон Маунт и Рис Џејмс, каде беа пред Лампард, а каде се сега. Сето тоа е благодарение на Френк и Томас всушност му се заблагодари за тоа“, изјави Тери за „Тајмс“.

Откако не успеа да обезбеди пласман во Лигата на шампионите, Наполи го очекува бурно лето, нов тренер и промени во составот. Сопственикот на Наполи, Аурелио Де Лаурентис на Твитер потврди дека Гатузо нема да го води клубот во новата сезона. „Драг Рино, среќен сум што ги поминав овие две сезони со тебе. Ти благодарам за работата која ја заврши и ти посакувам се најдобро каде и да одиш. Исто така ти испраќам прегратка за твојата сопруга и за твоето дете.“ – напиша Де Лаурентис. Наполи вчеравечер ремизираше со Верона по што падна на петтото место, а од Италија во Лигата на шампионите пласман покрај Интер, Милан и Аталанта, обезбеди и Јувентус.

Зинедин Зидан беше максимално задоволен од залагањето на неговите фудбалери до последната минута во Ла Лига, а истовремено немаше проблем да му честита на Атлетико Мадри за освоената титула во домашното првенство по пауза од седум години. „Сакам да им се заблагодарам на нашите фанови кои правеа да чувствуваме поддршка и покрај тоа што беа далеку од нас. Сите навивачи можат да бидат горди на овие фудбалери бидејќи дадоа се од себе. Му честитам на цел тим, победивме и на овој меч, без оглед на тоа што не ја освоивме титулата. Мора да му се честита на Атлетико. Оној што е на врвот по 38 кола, заслужува да биде таму. Сепак, за мене најважни се моите фудбалери, покажаа борба до последна минута и горд сум на нив. Има време пред нас, сега смирено ќе разговарам со одговорните лица во клубот“, смета Французинот.

Tренерот на Сити, Пеп Гвардиола имаше интервју за „Кориере дело Спорт“ во кое помеѓу останатото зборуваше и за својата кариера во Бреша. Бреша за Гвардиола беше последен европски клуб во играчката кариера пред да премине во Ал-Ахли и Дорадос каде што ја заврши кариерата. Гвардиола во Бреша дојде во 2001 година и се задржа до 2003.
Во Бреша играше со големиот Роберто Баџо.
„Кројф секогаш го фалеше. Сакаше да го види во шпанската лига, го интересираше како ќе се прилагоди на шпанскиот фудбал. Баџо во тие години можеше да игра каде сака, но никој не можеше да го убеди да ја напушти Италија. Во Италија беа сите најдобри играчи, а оние кои не беа сакаа да одат таму. Кога ме контактираа луѓето од Бреша не ми требаше многу време да одлучам. Кога Баџо беше таму се знаеше дека плановите им се големи. Баџо беше ѕвезда, но сите околу себе ги третираше еднакво, од претседателот до хигиеничарот“.

Контроверзниот италијански напаѓач, Марио Балотели ќе го напушти италијанскиот второлигаш после науспешната сезона во која клубот стигна до плеј-офот за пласман во Серија Б. Италијанските медиуми тврдат дека Балотели со сигурност нема да остане во Монца. Во договорот на Балотели имало опција истиот да биде продолжен ако тимот влезе во Серија А, тоа не се случи па затоа 30 годишниот фудбалер одново ќе ја промени средината. Балотели за Монца и немаше така лош учинок, одигра 14 натпревари и во нив запиша шест погодоци. Ќе потсетиме дел од Монца во наредната сезона ќе биде македонскиот фудбалер Лука Станковски кој во италијанскиот второлигаш пристигнува од Работнички.

Ханси Флик ја потврди информацијата дека најверојатно ќе ја преземе германската репрезентација. Тој тоа ќе го стори откако ќе ја напушти тренерската позиција во Баерн на крајот од оваа сезона. „Јасно е дека разговарав со Германската фудбалска асоцијација. Секој знае како се чувствувам во врска со репрезентацијата. Некои работи сепак треба да се решат. Станува збор за ситници. Доколку се поправат, можеме брзо да ги објавиме вестите. Сега, сепак, фокусот ми е на натпреварот со Аугсбург. Дали имав разочарувања во текот на сезоната? Да, две работи. Испаѓање во Купот на Германија од Холштајн Кил, како и четвртфиналето во Лигата на шампионите против ПСЖ. Тимот го покажа својот квалитет, но за жал тоа не беше доволно. Беше големо разочарување за сите нас“, рече Флик за време на неговата прес-конференција пред неговиот последен натпревар на клупата на Баерн. Тој беше баран и од Барселона и Тотенхем, но тренерот одлучил да го наследи Јоаким Лев како селектор на Германија по Евро 2020. Неговиот договор ќе биде до 2024 година со годишна плата поголема од 5 милиони евра.

Сите фудбалски активности се суспендирани во Аргентина во следните девет денови, воочи воведување карантин во поголемиот дел од државата поради пандемијата со ковид-19. Аргентинската фудбалска федерација се одлучи на таков чекор три недели пред Копа Америка, што започнува на 13 јуни во Аргентина. Од одлуката на аргентински власти се изземени само натпреварите кои идната недела ќе се играат во рамки на Копа Либертадорес. Во овој момент кога нашата земја мора да се потруди да ја стави под контрола оваа вознемирувачка пандемија од која сите сме погодени, Федерацијата и фудбалот мораат уште еднаш да ги следат властите и да ги суспендираат сите натпревари во следните девет денови, соопшти денеска Фудбалската федерација на Аргентина. Оваа јужноамериканска држава дневно во просек бележи околу 35.000 новозаразени со коронавирус, а како последица на ковид-19 во Аргентина досега починаа 73.000 луѓе. Карантинот во високоризичните региони во Аргентина ќе биде воведен в сабота и ќе трае до 31 март.