Роберт Левандовски на натпреварот помеѓу Фрајбург и Баерн минатиот викенд го постигна 40. погодок во лигата сезонава.
Полскиот интернационалец со тоа го израмни рекордот на Бундеслигата стар 49 години. Легендарниот Герд Милер досега беше единствениот фудбалер кој во една сезона постигнал 40 погодоци, а тоа успеа да го направи во сезоната 1971/72.
Сега Левандовски во 28 одиграни натпревари го израмни неговиот рекорд, а може и да го сруши во последното коло против Аугсбург.
Но, некои германски медиуми, па дури и фудбалски легенди, јавно го замолија да не го направи тоа.
„Се укажува на тоа дека Левандовски ќе го сруши рекордот, но што ако доброволно се откаже од тоа? Незамисливо, зар не? Кога само овој викенд би можел да биде препуштен на Милер. Зошто? Бидејќи тоа е Герд Милер. Бидејќи Баерн никогаш не би бил клуб каков што стана доколку не беше Милер. Тоа би бил најубавиот начин да му се оддаде почит на Милер.“ – пишува Петер Аренс, колумнист на „Дер Шпигел“.
„Од почит кон Герд Милер, Левандовски не би требал да настапи против Аугсбург.“ – додава Дитмар Хаман, поранешен германски репрезентативец.
Меѓутоа, се чини дека сите тие барања се залудни, бидејќи Левандовски изрази желба да го постигне 41. погодок во последното коло.

Голманот на Барселона и германската репрезентација Марк-Андре Тер Штеген објави дека ќе го пропушти претстојното Европско првенство во фудбал.
„Разочаран сум од вчерашниот пораз и фактот дека ги загубивме шансите за шампионската титула (Барселона загуби од Селта со резултат 1-2). По тешкотиите на почетокот на сезоната, покажавме карактер и одигравме серија од 19 натпревари без пораз. Но, не бевме во можност да ја задржиме оваа форма. Медицинскиот персонал на клубот и јас решивме да направиме дополнителна операција на коленото. Тажен сум што ќе ми недостига Евро 2020… За прв пат по многу години, ќе бидам навивач кој ја поддржува мојата земја од дома. Се надевам дека ќе го освоиме турнирот! Исто така се надевам дека во наредната сезоната ќе можам да играм пред навивачите, навистина ми недостасуваат! Ви благодариме за поддршката во оваа тешка сезона и грижете се за себе!“, напиша Тер Штеген на својот Инстаграм.
Репрезентацијата на Германија во групната фаза на Евро 2020 ќе игра со Франција, Португалија и Унгарија.

Николо Барела претпладнево беше подложен на успешна операција на носот, соопштија од италијанскиот тим.
Играчот од средниот ред беше опериран поради потреба од корекција во внатрешноста на носот. Италијанскиот репрезентативец ќе добие неколку слободни дена, а потоа ќе продолжи со тренинзите.
24-годишниот Николо Барела има 3 гола и 9 асистенции на 36 натпревари во Серија А оваа сезона, и има 24 натпревари за репрезентацијата на Италија. Фудбалерот во моментов е проценет на 60 милиони евра, а за неговите услуги се заинтересирани голем број на клубови од Европа, но тој и понатаму му останува верен на Интер со кој ја освои титулата оваа сезона.

Репрезентативецот на Англија, Хари Кејн дефинитивно ќе ја промени средината ова лето, откако побарал од управата на Тотенхем да биде ставен на трансфер листа.
Според „Скај Спорт“, Кејн одлучил дека е време за промени и трансфер во клуб кој ќе се бори за титули.
Англичанецот е трансфер цел на повеќе тимови, од кои двата од Манчестер и Челси се главни фаворити за негов ангажман.
Според последните информации на англиските медиуми, Тотенхем од продажбата на нивниот капитен очекува најмалку 120 милиони евра.

Роберто Манчини официјално потпиша нов договор со Италијанската фудбалска федерација. Претседателот на федерацијата Габриеле Гравина потврди дека Манчини потпишал нов договор, кој ќе заврши во 2026 година.
Така, 56-годишниот фудбалски стручњак ќе ги предводи „азурите“ на уште 2 европски и две светски шампионати, доколку, се разбира, четирикратниот светски шампион се квалификува за сите овие завршни турнири. Тој ќе биде на кормилото на тимот до СП 2026 година, каде домаќини ќе бидат САД, Мексико и Канада.
Гравина рече дека Манчини заврши брилијантна работа како национален селектор на Италија од 2018 година и Федерацијата се чувствува должна да го продолжи проектот што го започнаа заедно со поранешниот напаѓач. Италија е во група со Турција, Велс и Швајцарија на Европското првенство, кое започнува на 11 јуни.

Првиот тренер на Сасуоло, Роберто Де Зерби, по мечот со Парма (3-1) објави дека ќе го напушти клубот на крајот од сезоната во Серија А. Од поодамна се зборува дека тој е близу до преземање на украински Шахтјор. „Пред натпреварот против Џенова минатата недела разговарав со управата на клубот и играчите. Им реков дека донесов одлука да заминам. Оваа одлука ме загрижи екстремно и не ме направи среќен, но заминувам, бидејќи верувам дека повеќе не можам да дадам ништо на овој тим. Се чувствувам како да сум го достигнал плафонот во овие три години. Се надевам дека новиот тренер ќе биде уште подобар од мене“, рече Де Зерби.

Селекторот на фудбалската репрезентација на Курасао, легендарниот Холанѓанец Гус Хидинк нема да може да го води тимот во квалификациите за СП 2022.
Поранешниот селектор на „лалињата“ се опоравува од коронавирусот кој го поминал со многу потешка клиничка слика. 74-годишниот Хидинк побарал од директорот на академијата на Барселона, Патрик Клајверт, да го замени на претстојните квалификациски средби на чело на Курасао.
Клајверт ја прифатил неговата покана и побарал од претседателот на Барса, Жоан Лапорта, да го ослободи за привремена работа во репрезентацијата на Курасао. Лапорта му дозволил, по што Клајверт ќе биде на клупата на оваа селекција на 5 јуни против британските Девствени острови и на 8 јуни на средбата со Гватемала.

Македонскиот судиски интернационалец, Александар Ставрев, ќе биде главен судија на финалето во Купот на Македонија. Финалето на националниот куп е на програмата во среда на Националната Арена во Скопје. Познато е дека во битката за пехарот се среќаваат екипите на Академија Пандев и Силекс, а мечот стартува во 19:00 часот. На Ставрев ќе му помагаат Дејан Костадинов и Гоце Петрески, додека четврти ќе биде Марјан Маркоски, кој со овој меч веројатно се простува од својата долгогодишна успешна судиска кариера.

Милан по киксот против Каљари го остави Јувентус во игра, но и понатаму сам одлучува за својата судбина. Ако победат против Аталанта во Бергамо, неважен ќе биде дуелот на Јувентус со Болоња. Дали Пирло ќе преживее доколку го освои Купот и стигне до четвртото место. Ако го земе само трофејот и биде петти, секако не. Во случај да се пласира во Лигата на шампионите, би можел да остане. Јувентус наводно преговараше со Алегри, но сега се појави Реал кој во Италијанецот гледа замена за Зидан. Самиот Зидан е желба на Ањели, но Јувентус нема многу финансии, плус веројатно Французинот сака одмор. Како име сега се појави Џенаро Гатузо. Тој е прва алтернатива, заминува од Наполи, се зборува за Фиорентина. Наполи, доколку ја победи Верона, ќе се пласира во Лигата на шампионите идната сезона. Се верува дека Гатузо, кој е одличен мотиватор и човек кој заговара дисциплина, ќе успее да извлече максимум од Јувентус. Тој, во таков случај, би го наследил својот најдобар пријател од светот на фудбалот, Пирло. Тие двајца беа и цимери, а „Моцарт“ во биографијата изнесе и неколку смешни детали од нивното другарување и заедничките настапи во Милан и репрезентацијата.

Италијанскиот стручњак Масимилијано Алегри се сретна со управата на Реал Мадрид минатата недела и сака да го преземе местото тренер во мадридскиот клуб, пишува новинарот Фабрицио Романо. Зидан скоро сигурно го напушта клубот на крајот од сезонава, а се чека само уште официјалната потврда. Романо наведува дека Алегри е во контакт со Реал веќе неколку месеци, го сакаат и некои италијански клубови, пред сите веројатно Јувентус, но за Алегри приоритет е заминувањето во Мадрид. Сепак, се уште не е сигурно дека во Мадрид ќе се одлучат за него. Се разгледуваат и други опции, а една од нив е и клупската легенда Раул, кој во моментот го води вториот тим. За Раул тоа би бил прв тренерски ангажман, додека Алегри е слободен од летото 2019. година кога го напушти Јувентус после освоената петта титула по ред.