Во сенка на Европското првенство и Копа Америка, најголемите клубови полека се подготвуваат за новата сезона.

Најнеизвесно е во Барселона, која и понатаму не знае што ќе биде со Лионел Меси, односно за тоа малку се зборува. Марка објави драматичен текст во кој пишува дека на ѕвездата на Барса договорот му истекува во среда на полноќ и дека во клубот веќе владее паника.

„До 30. јуни останаа уште два дена. Доколку нешто не се промени, Меси ќе стане слободен играч, што никој на Камп Ноу не сака да се случи. Лапорта со денови работи на тоа Меси ниту секунда да не помине како слободен играч. Проговорите траат веќе доста долго и наводно се во финална фаза, но капитенот се уште не одлучил. Лапорта се надеваше дека ќе се објави продолжувањето на соработката за роденденот на Меси, но тоа не се случи. Доколку потпише нов договор, тоа ќе биде на две години.“ – пишува Марка.

Додека Лапорта е зафатен со неговиот договор, Меси е на Копа Америка, каде ќе ја предводи Аргентина против Боливија, а неговата репрезентација веќе обезбеди пласман понатаму, па можно е селекторот да го одмори.

Меси за тоа време би можел да го реши својот договор со Барселона, каде за 21 година освои 35 трофеи. ПСЖ пројави интерес за неговиот потпис, но засега најреално е дека тој ќе остане во Барселона.

Еден Азар и Кевин Де Брујне се повредија на вчерашниот меч со Португалија на Европското првенство и засега нема информација колку ќе отсуствуваат од фдубалските терени.  Особено е сериозна состојбата со скочниот зглоб на фудбалерот на Манчестер Сити, чии шанси за понатамошен настап на ЕП се минимални.

„Веројатно ќе ни требаат 48 часа за да констатираме за каква повреда станува збор и кај Кевин и кај Еден“, изјави селекторот на Белгија, Роберто Мартинез. „Како што е моментно глуждот на Кевин Де Брујне, изгледа лошо. Ќе видиме. Во овој момент не сме добиле никаква медицинска дијагноза од медицинскиот оддел“, изјави селекторот на „црвените ѓаволи“.

Реал Мадрид е заинтересиран за ѕвездата на Лајпциг и шпански репрезентативец, Дани Олмо, пренесуваат шпанските медиуми.

Олмо ја помина школата на Барселона во младинските категории, од каде замина за Динамо Загреб каде ја доживеа својата фудбалска афирмација. Минатата година направи трансфер во Лајпциг, каде блескаше оваа сезона, па сега е стандарден член  на шпанската репрезентација.

Лајпциг нема намера да се откаже од услугите на 23-годишниот Олмо за сума помала од 50 милиони евра, па „кралевите“ ќе треба да го одврзат паричникот.

Главна мета на Реал Мадрид ова лето е Килијан Мбапе, а доколку не успеат да го реализираат тој трансфер ќе се насочат кон Дани Олмо.

Манчестер Јунајтед може да се раздели со четворица фудбалери ова лето, од кои две големи ѕвезди.

Според „ЕСПН“ клубот од Олд Трафорд ги ставил на продажба Антони Марсијал и Ван де Бек и за нив очекува понуди ова лето. Неколку клубови веќе покажуваат интерес за двете ѕведи. Холанѓанецот пристигна минатото лето за 40 милиони фунти, но не ги оправда очекувањата и главно ја грее клупата за резерви.

Што се однесува до Марсијал тој самиот побарал да ја промени средината со оглед на се поизвесното доаѓање на Џејдон Санчо. Французинот така ќе го загуби местото во тимот и го известил агентот да му бара нов клуб.

Столе Димитриевски за Македонија на Европското првенство беше еден од најдобрите фудбалери, па неговите настапи не останаа незабалежани. Тој и покрај тоа што прими 8 гола, беше еден од најдобрите голмани на групната фаза, со своите интервенции, смиреноста и сигурноста која што ја покажа на голот, па сето тоа најверојатно ќе му донесе трансфер.

Неговиот клуб Рајо Ваљекано влезе во Примера, откако победи во баражот, каде што ја немаше помошта од нашиот голман, бидејќи тој беше на Европското првенство, а следната сезона сигурно ќе го гледаме во Примера, но не се знае дали во дресот на Рајо Ваљекано или во некој многу посилен клуб.

Според шпанските медиуми, интерес за него покажуваат Гранада и Гетафе, кои се наметнуваат како први фаворити за потписот на Македонецот, посебно ако се знае дека се клубови со многу поголеми амбиции од Рајо, односно последниве сезони редовно играат во Европа, додека тимот од Ваљекано го чека битка за опстанок во новата сезона.

Иван Перишиќ нема да може да и помогне на Хрватска во осминафиналето до ЕУРО 2020 против Шпанија. Тоа ќе биде голем хендикеп за селекторот Златко Далиќ, откако дозна дека тој ќе мора 10 дена да биде во изолација поради позитивен тест на коронавирус.

Меѓутоа Перишиќ денеска по прв пат се огласи од изолација и испрати порака со надеж. Во изолација ќе мора да остане најмалку десетина дена, тоа значи дека Хрватска би морала да стигне до финалето, за тој повторно да заигра на овој турнир.

„Како што веројатно знаете, бев позитивен на КОВИД-19. Ви благодаран на сите за пораките на поддршка. Се чувствувам подобро, но многу сум тажен затоа што нема да можам да и помогнам на Хрватска. Уверен сум дека момците ќе одиграат голем натпревар со поддршка од нашите неверојатни навивачи. И кој знае, можеби на крајот сепак ќе заиграм на овој турнир.“– напиша Перишиќ.

Дефанзивецот Мерих Демирал може да го напушти Јувентус ова лето. Турскиот репрезентативец имал средба со управата на клубот и потенцирал дека не е задоволен од улогата која ја има во екипата.

Јувентус е подготвен да ги разгледа предлозите за трансфер на Демирал, доколку за него бидат понудени најмалку 40 милиони евра. Евертон, Тотенхем, Аталанта и Рома покажуваат интерес за турскиот дефанзивец, но засега нема клуб кој може да ја плати целата сума на трансферот. Затоа многу поверојатно е тој ова лето да оди на позајмица со опција за откуп на договорот следната сезона.

Реал Мадрид не планира да прави голем број трансфери ова лето. Од клубот се децидни, летово се заинтересирани само за две имиња: Халанд од Борусија и Мбапе од ПСЖ.

Новиот тренер Карло Анчелоти најавил дека клубот нема намера да купува нови играчи ова лето, освен ако двајцата млади голгетери успеат да се договорат со управата на мадридскиот тим.

Италијанецот е подготвен да работи со постојниот состав, со едно конкретно засилување во името на Мартин Одегард, кој се врати на „Бернабе“ по позајмицата во Арсенал. Анчелоти верува дека тој ќе биде изненадувањето на Реал во новата сезона.