Реал Мадрид на лето ќе прави голема реконструкција на тимот, а некои од актуелните ѕвезди ќе бидат ставени на продажба. Шпанските медиуми пренесуваат дека меѓу нив ќе биде и Еден Азар. Белгиецот пристигна на „Сантијаго Бернабеу“ за 100 милиони евра плус бонуси, но не успеа да оправда ниту еден цент од парите што ги вложи клубот во неговиот трансфер.
Шпанските медиуми пишуваат дека Реал е подготвен да го продаде Азар за 50 милиони евра, што е помалку од половина од сумата која ја платија „кралевите“ за него.
На продажба исто така се ставени Иско и Марсело, кои оваа сезона се во втор план кај Зидан и клубот веќе им ја отвори излезната врата.

Роберт Левандовски би можел да го напушти Баерн Минхен ова лето, јавува ЕСПН. За 33-годишниот полски напаѓач, освојувач на наградата за најдобар фудбалер на светот во 2020. година, интерес владее кај Челзи и Манчестер Сити. Левандовски има договор со Баерн до 2023. година и германскиот првак за него бара 60 милиони евра. Левандовски претходно тврдеше дека кариерата ќе ја заврши во Баерн, но интересот од Премиерлигата би можел да го натера да го промени мислењето. Во Челзи го сакаат Левандовски по тешката дебитантска сезона на Тимо Вернер во Лондон, а Сити во него гледа наследник на Серхио Агуеро, кој по 10 години си заминува од Манчестер. Интерес за Левандовски покажува и ПСЖ, но до тој трансфер би дошло само доколку Мбапе го напушти Париз. Левандовски сезонава има постигнато 36 погодоци во Бундеслигата и е блиску до рекордот на легендарниот Герд Милер кој во сезоната 1971/72 постигна 40 погодоци.

Италијанскиот фудбал повторно ќе има „атракција“ во видот на Жозе Мурињо. Трофејниот Португалец се враќа во Италија после пауза од 11 години. Ја напушти „Чизмата“ како победник, во 2010. година ја освои историската „триплетаа“, а се враќа по очајната сезона во Тотенхем. „Специјалниот“ ќе ја води Рома, но италијанските медиуми пишуваат дека португалскиот стручњак не беше првиот избор на „волчицата“. Сопственикот на Рома пред Мурињо го контактирал Марсело Гаљардо, тренерот на Ривер Плата. Сепак, Аргентинецот ја одбил понудата од една причина. Неговиот договор со Ривер истекува на крајот од годината, а до тогаш не сака да размислува за промена. Гаљардо е доста барано име во светот на фудбалот, своевремено се споменуваше и како еден од кандидатите за преземање на Барселона, но и на Реал Мадрид.

Унаи Емери е човекот кој треба да го имате во клубот доколку сакате финале во Лига Европа, го однесе и Вилјареал во финале, откако „жолтата подморница“ издржа во Лондон со Арсенал и со 0-0 стигна до финале, а секако клучна беше победата на првата средба со 2-1 во Шпанија.
Виљареал стигна до прво европско финале во историјата, Емери до петто, откако претходно тоа му успеа со Севиља и со Арсенал.
Емери со Виљареал ќе игра за титула против Манчестер Јунајтед во Лига Европа.

Марко Матерациа беше член на генерацијата на фудбалерите на Интер кои освоија триплета во 2010 година.
Таа генерација на Интер од клупата беше предводена од Жозе Мурињо кој од наредната сезона ќе биде тренер на Рома.
За Матераци е подобро што Мурињо ќе ја води Рома отколку Јувентус или Милан.
„Подобро што е во Рома отколку во Јувентус и Милан. Ќе бев навистина изненаден ако преминеше Јувентус. За навивачите на Интер е неприфатливо да прифатеше понуда од Јувентус или Милан. Мислам дека треба да се разбере неговиот избор, Мурињо направи многу за Интер“, изјави Матераци.
Матераци верува дека Мурињо може многу да направи за Рома.

Фудбалерот на Валенсија, Хозе Гајa, може да добие понуда во текот на летото да се пресели во Атлетико Мадрид или во Барселона.
Според шпанските медиуми, Каталонците бараат замена за ветеранот, Жорди Алба додека пак, мадриѓани, сакаат да се засилат во дефанзивата која се чини е послабиот дел од тимот.
Хозе Гајa досега има одиграно 258 натпревари и постигнато 6 голови во дресот на „лилјаците“ додека за репрезентацијата на Шпанија, има 13 средби на кои постигнал два гола.

Медиумите на Апенините веќе неколку недели пренесуваат дека Џанлуиџи Донарума е пред трансфер во редовите на Јувентус. Наводно, голманот и челниците на Јувентус ќе направат финални разговори по крајот од сезоната каде треба да бидат договорени и деталите за трансферот на голманот во торинскиот клуб. Според информациите Јувентус на Донарума му понудил петгодишен договор според кој ќе заработува 10 милиони евра по сезона, но за реализација на трансферот има еден проблем. Имено, Јувентус мора прво да се ослободи од Шчешни за да го комплетира трансферот на Донарума, но тоа нема да биде воопшто лесно.

Претседателот на ПСЖ, Насер Ал-Келаифи го повика раководството на Барселона да ја остави бразилската sвезда Нејмар на мира. Разговорите меѓу Парижаните и напаѓачот за продолжување на договорот, кој истекува во летото 2022 година, се тешки. Според Ал- Халаифи, постојат контакти меѓу Барселона и поранешниот играч на оваа екипа и за тоа се делумно виновни од Барселона. Според „Радио Каталонија“, Ал-Келаифи побарал од Барселона да престане да комуницира со Бразилецот. На почетокот на овој месец стана познато дека Барселона ќе се обиде да го врати играчот ова лето, подготвувајќи 100 милиони евра за оваа намена.

Англиската Премиер лига ги потврди датумите на трансфер периодот за летото 2021 година. „Трансфер периодот ќе биде отворен 12 недели од 9 јуни и ќе се затвори на 31 август. Датумите ќе бидат во согласност со другите европски лиги“, стои во официјалното соопштение на лигата. Да потсетиме дека претходно премиерлигашкиот преоден рок не беше синхронизиран со другите европски лиги, затворајќи се пред првото коло на шампионатот. По 34 одиграни кола во Англискиот шампионат 2020/21, Манчестер Сити е во водство (80). За да ја освојат лигата, на Манчестер Сити им треба само еден натпревар од преостанатите четири или да очекуваат кикс на второпласираниот Манчестер јунајтед, кој има 67 бода од 33 натпревари.

Италијанските медиуми тврдат дека голема е веројатноста Мауро Икарди да се врати во Серија А на лето. Маурицио Покетино наводно не е симпатизаер на играта на Икарди и веќе му порачал дека може да си бара нов клуб. Италијанските медиуми пренесуваат дека Аргентинецот ќе биде примарна цел на Жозе Мурињо во Рома. Реален проблем може да биде високото обештетување што ПСЖ сигурно ќе го побара за Икарди, па ќе се обидат да го донесат на позајмица со право на откуп.