Баерн има намера да го задржи 33-годишниот камерунски напаѓач Ерик Чупо-Мотинг, кој покажа високи перформанси оваа сезона. Според извори во клубот, за новиот договор на Чупо-Мотинг ќе се разговара во наредните месеци. Тој е речиси клучен играч во тимот на Нагелсман, а во последниот натпревар од 6. коло од групната фаза на Лигата на шампионите на УЕФА со Интер (2:0) постигна уште еден гол.

Севкупно, Чупо-Мотинг оваа сезона забележа 13 настапи за Баерн во сите натпреварувања, постигнувајќи дури осум гола и обезбедувајќи три асистенции. Тој му се приклучи на германскиот клуб во октомври 2020 година како слободен агент од ПСЖ, а има актуелен договор кој истекува ова лето.

Младата фудбалска ѕвезда на ПСЖ, Килијан Мбапе, со 23 години, десет месеци и 13 дена, стана најмладиот играч во Лигата на шампионите кој стигнал до 40 голови.

Тој со вчерашната реализација во мрежата на Јувентус го помина неговиот соиграч, Лео Меси, кој досега беше рекордер со 24 години, четири месеци и осум денови.

Аргентинецот го држеше рекордот од 2011 година.

Дисциплинската комисија на УЕФА го казни Фудбалскиот сојуз на Хрватска, поради однесувањето на дел од навивачите на натпреварот со Австрија во Виена, во рамките на Лигата на нации.

Хрватскиот фудбалски сојуз е казнет со 20 илјади евра и затворање на дел од трибините на следниот натпревар на репрезентацијата, поради дискриминирачко однесување.

Сојузот е казнет и со 20.625 евра поради фрлање на предмети на теренот од страна на навивачите, како и со 2.500 евра поради палење пиротехника.

Хрватска обезбеди пласман на завршниот турнир во Лигата на нации каде ќе играат и Италија, Шпанија и Холандија.

Победата на Челзи против Динамо Загреб со 2:1 во Лигата на шампионите и обезбедувањето на првото место во групата пред настапот во осминафиналето, ќе остане во сенка на повредата на Бен Чилвел.

Репрезентативецот на Англија се повреди во последните моменти од средбата на Стенфорд Бриџ, и според информациите се работи за оштетување на мускулот од ногата. Во изјава после натпреварот, тренерот на Челзи Грем Потер изјави дека во моментот многу се мали шансите Чилвел да заигра за Англија на Мундијалот во Катар.

Англискиот фудбалски прволигаш Вулверхемптон е во поодмината фаза на преговори со Јулен Лопетеги за да седне на тренерското столче, јавија британските медиуми.     

Според истите извори, двете страни неделава ги обновиле преговорите, откако шпанскиот стратег минатиот месец ја одби понудата на Вулверхемптон да го ангажира Лопетеги на местото на Бруно Лаж.

Клубот и самиот тренер се надеваат дека наскоро ќе биде постигнат договор, особено поради тоа што Лопетеги е без ангажман по отказот во Севиља, објави телевизијата Скај. Лопетеги во преговорите го застапува познатиот менаџер Жорж Мендеш, кој е близок соработник на раководството на Вулверхемптон.

Фудбалерот на Тотенхем и репрезентативец на Јужна Кореја, Хонг Мин Сон, заработи повреда на натпреварот од Лигата на шампионите против Олимпик Марсеј, и мораше да биде принудно заменет од игра. Сон во еден дуел со противнички играч доби удар во окото по што се јави голем оток па беше одлучено дека тој не може да го продолжи натпреварот.

Од Тотенхем информираат дека следуваат подетални лекарски прегледи и најверојатно тој ќе го пропушти неделниот дерби натпревар во Премиер лигата со Ливерпул.

Продолжуваат проблемите на Барселона со повредени фудбалери, а последен на оваа листа е Френк Кеси.

Вчера на натпреварот од Лигата на шампионите против Викторија Плзен Кеси се здоби со повреда на задната ложа. Повредата ја потврди и тренерот Чави по средбата.

„Не е добро, изгледа дека задната ложа е во прашање“, изјави Чави.

Според првите прогнози, Кеси ќе отсуствува околу шест недели, што значи дека ќе ги пропушти Алмерија и Осасуна и ќе биде подготвен кога ќе продолжи првенството на крајот на декември.

Она што треба многу повеќе да го загрижува Чави се честите повреди на неговите играчи. Кеси од почетокот на сезоната е дури деветти играч кој треба да направи одредена пауза, која нема да биде кратка.

Веќе со недели учеството на фудбалската репрезентација на Иран на Светското првенство е доведено во прашање поради наводната помош на земјата за Русија во тековната војна.

Најгласен во лобирањето за протерување на Иран е фудбалскиот сојуз на Украина, кој сега и официјално побара исфрлање на оваа азиска земја од Светското првенство во Катар.

И покрај притисокот од Украина, ФИФА остана на својата првична одлука да го задржи Иран во натпреварувањето

Една од причините за овој потег е желбата на Украинците наместо Иран да бидат тие кои ќе влезат на Мундијалот. Но, правилата налагаат во случај на исклучување таа селекција да ја замени само некој од истата федерација. Според информациите тоа најверојатно ќе биде репрезентацијата на Обединетите Арапски Емирати.

Тренерот на фудбалерите на Манчестер Јунајтед, Ерик тен Хаг, јавно го пофали Касемиро кој во текот на летото го напушти Реал Мадрид и се пресели во Премиер-лигата.

„Јас за него велам дека е бетон во нашиот среден ред. Каземиро навистина има одлична соработка со сите на теренот. Секогаш може да види што се случува“, вели Холанѓанецот.

Ќе потсетиме дека  бразилскиот интернационалец  со „краелвите“ успеа да освои дури пет пехари во Лигата на шампионите.

Глазгов Ренџерс и официјално е најлошиот тим кој учествувал во групната фаза од Лигата на шампионите. по синоќешниот пораз од Ајакс во последното коло од натпреварите по групи, шкотскиот клуб групата ја заврши без да освои ниту еден бод во шесте одиграни натпревари.

Ренџерси претрпеа два порази со резултат 3-0 од Наполи, 2-0 и 7-1 од Ливерпул, како и два порази од Ајакс со 4-0 и 3-1.

Тоа значи дека избраниците на Џовани ван Бронкхорст во шест меча примија вкупно 22 гола, а постигнаа само два со негативна гол разлика од -20. Со овој антирекорд, Ренџерс го минаа хрватски Динамо Загреб, кој групната фаза од Лигата на шампионите во сезоната 2012/13 ја заврши без бодови и негатива од -19 голови.