Менаџерот на Манчестер Сити, Пеп Гвардиола во новата сезона ќе се потпира на поинаков напад, но едно име останува константа – Фил Фоден. Репрезентативецот на Англија, како и неговиот тимски колега Родри, добија понуди за нов договор.

Клубот веќе има усмен договор со Фоден за новиот договор, според кој неговата плата ќе се зголеми за три пати.

Според „The Sun“, тој ќе добива 200.000 фунти неделно. Надоместокот е колку за неговиот развој, толку и за поголемата улога што ќе ја има во новата сезона.

„Граѓаните“ веќе го продадоа Габриел Жесус на Арсенал, а се очекува да се разделат и со Рахим Стерлинг кој ќе се пресели во Челси.

Арсенал размислува за шокантна понуда за еден од најважните играчи на Челзи во последните години – Н’Голо Канте. Неуморниот Французин е под договор со својот сегашен клуб уште само 12 месеци и тоа им дава надеж на „топџиите“ кои бараат квалитетен дефанзивен играч за врска.

31-годишниот Канте минатата сезона имаше вкупно 42 настапи во сите натпреварувања, но исто така помина многу минути на клупата бидејќи проблемите со повредата на коленото го спречија да ги покаже своите несомнени квалитети во поголемиот дел од сезоната. Пред извесно време се тврдеше дека за овој Французин е заинтересиран и Манчестер Јунајтед.

Претходно денеска, Челзи објави дека Н’Голо Канте и Рубен Лофтус-Чик ќе ја пропуштат турнејата на тимот низ САД бидејќи не го завршиле целосниот циклус на вакцинација потребен за влез во земјата.

Манчестер Јунајтед е заинтересиран за потписот на играчот од средниот ред на Пари Сен Жермен, Леандро Паредес, но цената која за него во моментов ја бара францускиот шампион е превисока.

Англиски извори тврдат дека Јунајтед е подготвен да плати максимум 28 до 30 милиони евра за Паредес, додека ПСЖ веќе ја утврди неговата цена на 35 милиони евра.

Преговорите меѓу двете страни треба да продолжат, но прашање е дали наскоро ќе има некаков напредок.

Атлетико Мадрид ги започна претсезонските тренинзи за новата сезона. Фудбалерите се собраа во Мадрид, но утре заминуваат во Сеговија на двонеделен камп.

Првата контрола на екипата ќе биде на 27 јули против Нумансија. Три дена подоцна избраниците на Диего Симеоне во Осло ќе ги одмерат силите со Манчестер Јунајтед, а на 4 август ќе играат со Кадиз.

На почетокот на подготовките се собраа 29 играчи, меѓу нив и Алваро Мората и Саул Нигез кои се вратија од позајмица. Се појавија и новите засилувања Аксел Витсел и Самуел Лино. Во оваа фаза нема поголеми промени во составот, единствена посериозна е заминувањето на Луис Суарез кому му истече договорот.

Шпанскиот весник Спорт пренесува дека холандскиот репрезентативец Френки де Јонг одбил да ја продолжи својата кариера во Манчестер Јунајтед.

Новиот тренер на Јунајтед Ерик тен Хаг инсистираше на ангажман на Де Јонг, но шпанските медиуми наведуваат дека холандскиот фудбалер од лични и спортски причини одлучил да остане во Барселона.

Според информациите челниците на Манчестер Јунајтед сега ќе пробаат да го ангажираат дефанзивецот на Ајакс Лисандро Мартинез, играчот на ПСЖ Леандро Паредес и фудбалерот на Волвс Рубен Невес.

Досегашниот фудбалер на Баерн од Минхен Омар Ричардс потпиша четиригодишен договор со новиот премиерлигаш Нотингем Форест.

Ричардс минатата сезона воглавно ја мина на клупата на Баерн каде пристигна во 2021 година од англискиот Ридинг. Тој одигра 12 натпревари во шампионската сезона на тимот од Минхен, но само на еден натпревар ги одигра сите 90 минути.

Нотингем Форест мора да ја засили екипата бидејќи оваа сезона повторно ќе игра во Премиер лигата, прв пат после 1999 година.

Капитенот на Интер, голманот Самир Хандановиќ го продолжи договорот со клубот до летото 2023 година. 

Искусниот Словенец изјави дека е среќен што ќе остане со нероазурите уште една година.

„Пристигнав во врвен клуб пред десет години, и сеуште сум во врвен клуб. Многу сум среќен и горд што сум капитен на овај тим и привилегија е да продолжам да играм за Интер“, изјави Хандановиќ.

Словенецот својата кариера ја започна во Домжале, а во 2004 година прејде во Удинезе од каде подоцна стигна во Интер.

За репрезентацијата на Словенија одигра вкупно 81 натпревар.

Според последните информации од Шпанија, Селта е новиот тим кој покажал интерес за македонскиот голман Столе Димитриевски.

Селта е во потрага по голман, а наводно еден од оние кои се на нивниот „радар“ е и Македонецот. За Димитриевски во изминатиот период имаше интерес и од клубови од други земји, меѓутоа негова желба е да остане во Шпанија.

Рајо неодамна го промовираше Диего Лопез за нов голман, па затоа и не е исклучена можноста Димитриевски да биде продаден ова лето.

Фудбалерот на Реал Мадрид, Федерико Валверде, бил ограбен во шпанското одморалиште Ибица, каде бил на одмор со својата девојка Мина Бонино, објавија шпанските медиуми.

Кон крајот на јуни на истото место беше ограбен и фудбалерот на ПСЖ, Марко Верати, кој беше на одмор со сопругата Џесика Еди. Криминалците тогаш му одзеле на Италијанецот накит, пари и други работи вредни околу три милиони евра.

Валверде поминал подобро бидејќи сумата што исчезнала е многу помала, а неговата поубава половина смета дека во се е вмешан готвачот кој ги пречекал.

„Кога стигнавме до куќата, готвачот веќе беше таму, ни рече дека во моментот има само еден клуч од куќата и дека ќе го задржи за да влезе во куќата наутро и да ни подготви појадок. без да нè вознемирува. Следното утро не можев да станам од креветот, ми се вртеше, повраќав“, рекла Бонино, пренесуваат шпанските медиуми.

Новото засилување на Тотенхем, Клемент Ленгле го даде своето прво интервју како играч на клубот. Во него тој ја изрази својата возбуда за неговиот трансфер и откри кои се неговите цели во следната сезона, која ќе ја помине со Спарс на позајмица од Барселона.

„Многу сум среќен што сум овде во овој град и во овој клуб. Зборував со семејството и пријателите за да ја донесам мојата одлука и сите зборови беа многу, многу добри за клубот. Прилично сум возбуден што ќе ја започнам сезоната со моите нови соиграчи, стадионот и градот. Сето ова ми е ново, но гладен сум. Сакам да играм и да бидам најдобар фудбалер за да му помогнам на тимот да освојува трофеи и да се бори во сите натпреварувања.Пред се, сакам да бидам добар соиграч и дефанзивец кој е силен, агресивен и му помага на тимот да ја освои топката. Многу е важно, пред се, да се биде добар дефанзивец, а потоа да се биде добар играч и да се помогне на тимот“, истакна тој.

Антонио Конте, продолжи тој, е тренер кој има освоено многу трофеи и има големо искуство.