Македонската репрезентација се наоѓа во Букурешт, каде што ги одработува последните подготовки пред настапот на Европското првенство. Нашата репрезентација се наоѓа во групата Ц заедно со селекциите на Холандија, Австрија и Украина. Првиот натпревар избраниците на селекторот Игор Ангеловски го играат на 13 јуни против Австрија со почеток од 18:00 часот.

Енис Барди, фудбалерот на шпански Леванте се чувстува одлично по десет дневната изолација и вели дека тој и неговите соиграчи извлекле голема поука од натпреварот со Австрија во Скопје и поразот од 4-1. Уверен е дека нема да ги повторат истите грешки.

„Пред се би сакал да се заблагодарам многу на селекторот, моите соиграчи и федерацијата за поддршката што ја добив додека бев во изолација. Беше тешко, но се помина во најдобар ред. Не чувствувам никакви проблеми, се е во најдобар ред, подготвен сум и физички и психички за Европското првенство. Со нетрпение го очекувам стартот на ова првенство, сите сме максимално фокусирани на првиот натпревар против Австрија, селекција која ни е многу добро позната. Тоа што го постигнавме со селекцијата до 21 година во Полска е нешто незаборавно, но овој настап и овој турнир е нешто сосема различно. Не се чувствуваме како аутсајдери, тоа го докажавме и покажавме на претходните натпревари. На ова Европско првенство ќе потврдиме колку навистина вредиме како тим. Ми претставува огромна чест што сум дел од оваа генерација која успеа да оствари историски успех, пласман на едно Европско првенство. Ќе дадам се од себе на секој натпревар, а на селекторот е да одлучи дали ќе играм од почеток. Треба да бидеме максимално концентрирани на секој натпревар и во текот на сите 90 минути”, вели Енис Барди.

Фудбалерот на Реал Мадрид се повреди на вчерашниот натпревар на Франција со Бугарија, но според извештаите повредата не е толку сериозна за да го загрози настапот на Карим Бензема на ЕП.

„Карим доби удар во мускулот. Тој почувствува дека болката му се зголемува, па не сакавме да ризикуваме. Медицинскиот тим во репрезентацијата направи добра работа, па денеска ситуацијата е многу подобра. Повредата не е драматична“, изјави селекторот Дидие Дешан.

Карим Бензема се врати во репрезентацијата по шест години откако беше исфрлен поради скандалот со соиграчот Матие Валбуена.

Марио Балотели веројатно ќе ја напушти Монца ова лето. Италијанскиот напаѓач има понуда од новиот турски прволигаш Адана Демирспор, а од Монца потврдија дека се уште не започнале да преговараат за нов договор со 31-годишниот Балотели. Тој имаше договор со италијанскиот второлигаш до крајот на сезоната.

„Договорот на Балотели истече. Ќе видиме со новиот тренер Џовани Стропа што ќе одлучиме.“ – рече главниот човек на Монца, Адриано Галијани.

Балотели во Монца помина пет месеци и постигна шест погодоци во 14 настапи, но не успеа да го зацврсти своето место во првиот тим. Претходно, тој настапуваше за Интер, Манчестер Сити, Милан, Ливерпул, Ница, Марсеј и Бреша.

Барселона ова лето ќе продаде неколку играчи, а повеќе шпански медиуми пишуваат дека на трансфер листата се наоѓаат Филипе Кутињо, Миралем Пјаниќ и Самуел Умтити.

Кутињо е едно од најголемите промашувања во историјата на Барселона. Платен е 135 милиони евра, најскап фудбалер во историјата на клубот, а минатата сезона одигра само 792 минути. Мадридски „Ас“ пишува дека постои можност Кутињо да се врати во Ливерпул. Имено, Барселона се обврза да го исплаќа Кутињо на рати, а се уште не е исплатена последната рата во вредност од околу 50 милиони евра. Со оглед на тоа што се наоѓа во големи финансиски проблеми, „Ас“ наведува дека Барселона испрати понуда до Ливерпул да го врати Кутињо под услов англискиот клуб да ја „прости“ последната рата.

Пјаниќ минатото лето пристигна од Јувентус, но на Камп Ноу беше во втор план, па сега каталонците се обидуваат да се ослободат од него. Фудбалерот од Босна и Херцеговина се поврзува со Јувентус и Челзи. Умтити пак, веќе три сезони не е стандарден во одбраната и сега сака да го промени клубот како би имал поголема минутажа.

Барселона ова лето ги доведе Серхио Агуеро и Ерик Гарсија од Манчестер Сити, како и Емерсон од Бетис.

Фудбалерот на шведската репрезентација, Дејан Кулушевски е позитивен на КОВИД-19 и ќе го пропушти првиот натпревар против Шпанија, објави Шведскиот фудбалски сојуз.

Играчот на Јувентус остана во Стокхолм, додека остатокот од репрезентативците отпатуваа за Гетеборг, каде ќе ги одработат последните подготовки за првенството.

„Дејан Кулушевски ја извести лекарската екипа дека има симптоми на настинка. Веднаш беше тестиран и тестот беше позитивен. Дејан од тогаш е во изолација од останатите во репрезентацијата и не отпатува со нив во Гетеборг.“ – објави лекарот на репрезентацијата, Андерс Валентин.

Шведскиот селектор Јане Андерсон изјави дека нема да повика друг играч и се надева дека Кулушевски ќе биде во можност да се приклучи на екипата по првиот натпревар против Шпанија, кој е на распоредот во понеделник и се игра во Севиља.

Капитенот на шпанската репрезентација, Серхио Бускетс исто така е позитивен на КОВИД-19.

Хвича Кварацхелија, репрезентативец на Грузија, е на радарот на неколку европски гиганти.

Грузиецот го сврте вниманието кон себе со добрите настапи не само во националниот тим, туку и во дресот на Рубин Казан. Борусија Дортмунд подолго време го следи крилниот напаѓач, а сега во трката за неговиот потпис се приклучија Милан и Јувентус.

Агентот на Кварацхелија веќе имал средба со споменатите клубови, па сега останува да видиме каков избор ќе направи грузискиот талент.

Матс Хумелс истакна дека Германија има најголеми амбиции на претстојнато Европско првенство, иако според неговите зборови не спаѓа во групата на најголеми фаворити.

Репрезентацијата на Германија е во групата Ф со селекциите на Франција, Португалија и Унгарија. Турнирот ќе го започќна со светскиоит шампион во вторник.

„Сакаме да ја освоиме титулата, затоа сме тука. Дури иако не сме фавороти, знаеме дека можеме да победиме во секој натпревар на овој турнир“, изјави Хумелс.

Откако ги доведе Серхио Агуеро и Ерик Гарсија, Барселона ова лето се обидува да доведе уште еден играч на Манчестер Сити.

Каталонски „Спорт“ објави дека шпанскиот великан преговара со Сити за Ајмерик Лапорт. Барселона на стоперската позиција ги има Пике, Ленгле, Умтити, Араухо, Мингеза и Гарсија, но тренер Роналд Куман смета дека му е потребен уште еден играч.

Лапорт во Сити кај Пеп Гвардиола стана резерва на Рубен Диас и Џон Стонс, па и тој ова лето би сакал да го промени клубот. Претходно, тој ја промени репрезентацијата и нема да игра за Франција, туку за Шпанија, па со тоа заминувањето во Барселона се чини уште пологично. Пред Сити, тој настапуваше за Билбао, кој го продаде во Англија за 60 милиони евра.

Во размената, каталонците го нудат Серхи Роберто, играч кој дебитираше кај Гвардиола во 2011. година, во полуфиналето против Реал.